Jakob me rirongerere okuhakaena na Esau
1 Jakob ngunda ama kayenda mondjira ye komurungu, ovaengeri va Ndjambi arire tji ve mu tjakanene. 2 Neye tje ve muna wa tja: “Ihi otjo otjimbumba tja Ndjambi.” Komuhingo mbwi otja ruka poṋa mbo Mahanaim, okutja “Ovimbumbavivari.”
3 Nu Jakob wa tuma ovahindwa komurungu we kerumbi re Esau kehi ra Seir, komukuma wa Edom. 4 Neye e ve rakiza na tja ku wo: “Kahungireye komuhona wandje Esau: ‘Ami, omukarere woye Jakob, me ku tjivisa kutja mba kakara puna Laban, noku mba kawomba nga nai. 5 Ami mbi nozongombe nousino nozonyanda, novakarere ovarumendu novakazendu; nu mbe ku hindira ombuze kutja mbi mune ondjingonekero move.’ ”
6 Novahindwa tji va kotoka ku Jakob va tja: “Eṱe twa kavaza kerumbi roye Esau, neye nai wa sekama okukutjakanena puna ovarumendu omasere yane.” 7 Jakob wa tira tjinene na uruma. Eye wa haṋa imba ovandu, mba ri puna ye, nozonyanda nozongombe nozongamero, movimbumba vivari. 8 Eye we ripura nai: “Esau tje ya na taurire motjimbumba ihi otjitenga, ihi otjikwao matji yenene okutaura.”
9 Nu Jakob arire tja kumbu na tja: “Ndjambi wa tate mukururume Abraham na Ndjambi wa tate Isak, ove we ndji raera, Muhona, no tja: ‘Twende u yaruke kehi roye na komuhoko woye, nu ami me ku tjitire ouwa.’ 10 Ami hi yenenene kotjari tjoye atjihe na kouṱakame woye auhe, mbu wa raisira omukarere woye. Ami mba kondere onḓonḓu ndji Jordan ambi ri tjo, nokati kandje okahoneno komeke porwako. Nambano mba kotoka novimbumba vivari mbi. 11 Arikana, ndji yama komazenge werumbi randje Esau! Ami me tira kutja ngahino meya okutunyona atuhe, novakazendu novanatje wina. 12 Ove we ndji raera no tja: ‘Ami me ku tjitire ouwa, tjiri, nu me takavarisa ozondekurona zoye pu pe ṱeki eheke meṋe yomuronga, nga tji ze hi nokusora okuvarwa.’ ”
13 Nouṱuku mbo eye wa rara mbo. Nu eye wa toororera erumbi re Esau oviyandjewa mu imbi, mbya ri na vyo mbo, 14 ozongombo omasere yevari ozonḓenḓu nozondwezu omirongo vivari, nozonḓu omasere yevari ozonḓenḓu, nozondwezu omirongo vivari, 15 nozongamero omirongo vitatu ozondaambe nozondana zazo, nozongombe omirongo vine ozonḓenḓu nozondwezu omurongo, nousino ouzenḓu omirongo vivari, nousino outwezu omurongo. 16 Orupanda aruhe peke we ru yandja komukarere umwe okurisa. Neye arire tja tja ku wo: “Kayendeye komurungu wandje nu mu twe po oruveze pokati kotupanda.” 17 Neye wa rakiza komukarere ingwi omutenga a tja: “Tji mwa hakaene nerumbi randje Esau, neye a pura kutja omuhona woye owaṋi, nu mo i pi, novinamuinyo, mbi ri momurungu woye, ovyauṋe, 18 zira kutja ovyomukarere woye Jakob, nu eye we vi hindi otja otjiyandjewa komuhona we Esau, nu Jakob omuini ma yende kombunda yetu.” 19 Neye arire tja yandja omaraa tjingewo komukarere outjavari noutjaine, mbaa ve kongorere itwi otupanda, na tja ku wo: “Inga ongu mamu hungire ku Esau, tji mamu hakaene na ye. 20 Eṋe kahungireye nai wina: ‘Tara, omukarere woye Jakob u ri kombunda yetu.’ ” Orondu Jakob we ripura nai: “Ami me mu hanganisa noviyandjewa, mbi me mu hindire komurungu wandje. Nu tjazumba tji mba hakaene na ye, ngahino eye me ndji isire.” 21 Oviyandjewa otji vya ya komurungu we; neye omuini ouṱuku mbo wa rara mondanda.
Jakob ma kondjo na Ndjambi
22 Ouṱuku tjingewo mbo Jakob wa sekama na toora ovakazendu ve aveyevari, novakarere ve ovakazendu aveyevari, novanatje ve omurongo na umwe, nave kondo onḓonḓu Jabok. 23 Neye tja zu noku kondisa avihe mbya ri na vyo. 24 Nu Jakob erike wa sewa kombunda.
Nomurumendu umwe worive wa kondja puna ye nga tji pa tji. 25 Nomurumendu tja muna kutja ke tji mu urire, arire tja tono Jakob kevango; nevango re arire tji ra pihuka momakondjero. 26 Nomurumendu arire tja tja: “Ndji esa mbi yende, pa tji.”
Nungwari Jakob wa zira a tja: “Ami himee ku esa, ngunda au hiye ndji sera ondaya.”
27 Nomurumendu we mu pura a tja: “Ove oovyaṋi?”
Neye we mu zira na tja: “Owami Jakob.”
28 Nomurumendu wa tja: “Ena roye kari tji nokurira Jakob rukwao, orondu ove wa kondjo na Ndjambi no toṋa, nungwari mari rire Israel, okutja wa kondja na Ndjambi!”
29 Jakob arire tja tja: “Arikana, ndji raera ena roye.”
Nungwari omurumendu wa zira a tja: “Ena randje mo ri purire tjike?” Tjazumba a sere Jakob ondaya.
30 Jakob wa tja: “Ami mba munasana na Ndjambi omurungu nomurungu, nu ngunda mbi nomuinyo.” Neye otja ruka poṋa mbo Penuel, okutja “Omurungu wa Ndjambi.” 31 Nu eyuva tjandje ra piti, Jakob tja za pOpenuel. Neye wa tenḓuna evango. 32 NOvaisrael opu ve ha zu okurya omusepa mbu ri pomahakaeneno wevango nga ku ndinondi, orondu opo opevango Jakob pa tonwa.
© Herero Revision Bible © Bible Society in Namibia, 2021.
