Ongwatero ya Simson
1 Ovaisrael va tura ondjo rukwao komurungu wa Muhona. Nu Muhona we ve yandja mouvara wOvafilisti oure wozombura omirongo vine.
2 Nu pa ri omurumendu wena ra Manoah, womuhoko wa Dan, ngwa zire kotjihuro Sora. Omukazendu we wa ri ongandji. 3 Omuengeri wa Muhona we rimunikisa komukazendu ngwi na tja ku ye: “Tara, oove ongandji, nungwari nambano mo rire otjingundi, nu mo panduka omuzandu. 4 Ritjevera kutja o ha nu omavinu poo omanuwa omazeu oparukaze, no ha ri ovikurya ovihakohoke. 5 Orondu ove mo rire otjingundi, nu mo panduka omuzandu. Ozondjise zomuzandu ngwi aze ha horwa, eye tjinga ama yapurirwa Ndjambi okurira Omunasirite okuza mezumo raina. Eye ma rire ingwi ngu ma utu okukutura Ovaisrael kOvafilisti.”
6 Okuzambo omukazendu wa karaera omurumendu we a tja: “Omundu wa Ndjambi weya ku ami, nombunikiro ye ya ri tjimuna oyomuengeri wa Ndjambi, neye wa ri omuurumise tjinene. Ami hi mu purire kutja ma zu pi, neye ke ndji raerere ena re. 7 Nungwari eye wa tja nai ku ami: ‘Tara, ove mo rire otjingundi, nu mo panduka omuzandu. Okuzamba o nu ko omavinu poo omanuwa omazeu, nu o ri ko ovikurya ovihakohoke, omuzandu ngwi tjinga ama yapurirwa Ndjambi okurira Omunasirite okuza kongwatero nga konḓiro ye.’ ”
8 Manoah wa kumba ku Muhona a tja: “Arikana, Muhona, omundu wa Ndjambi ingwi ngu wa hindire nga kotoke ku eṱe rukwao okuyekutuhonga kutja matu tjiti vi nomuzandu ngwi ngu ma pandukwa.”
9 Ndjambi wa zuvira ongumbiro ya Manoah, nomuengeri wa Ndjambi wa kotoka komukazendu, ngunda a haama mokuti; nomurumendu we Manoah ka ri puna ye. 10 Nomukazendu wa tupuka tjimanga komurumendu we ne kemu raera a tja: “Tara, omundu ngwi ngwe ere ku ami eyuva ndina we rimunikisa ku ami rukwao.”
11 Manoah wa sekama na kongorere omukazendu we. Eye wa ya ku ingwi omundu ne mu pura a tja: “Oove ngu u ri omundu ngu wa hungira kuna omukazendu wandje are?”
Neye wa zira nai: “Ii, owami.”
12 Manoah wa pura nai: “Omambo woye tji ya yenenisiwa, omuzandu ma sokuritjinda vi, nu ma sokuungura tjike?”
13 Nomuengeri wa Muhona wa zira Manoah a tja: “Omukazendu woye ma sokuritjaera koviṋa avihe mbi mbe mu raera. 14 Eye a roro ko otjiṋa ngamwa atjihe tji matji zu komuvite, nu a nu ko otjiṋa ngamwa atjihe tji matji zu komuvite, nu a nu ko omavinu poo omanuwa omazeu, nu a ri ko ovikurya ovihakohoke. Eye nga ṱakamise nawa ihi atjihe ami tji mbe mu raera.”
15 Manoah wa tja nai komuengeri wa Muhona: “Arikana, o yaruka tjimanga, tu esa tu ku terekere okangombona.”
16 Nungwari omuengeri wa Muhona wa zira nai ku Manoah: “Nandarire tji mba kara puna ove, ami himee ri ovikurya vyoye. Nu tji movanga okukeṱuna ke rire ombunguhiro oningiririsiwa ke punguhira Muhona.” Manoah ka tjivirwe kutja ingwi eye omuengeri wa Muhona.
17 Nu Manoah wa zira nai komuengeri wa Muhona: “Tu raera ena roye kutja imbi mbi wa hungire tji vya yenenisiwa tu ku yozike.”
18 Nomuengeri wa Muhona we mu pura a tja: “Mo vangere tjike okutjiwa ena randje? Oro ehimise.”
19 Manoah arire tja toora okangombona novirya ne vi punguhire Muhona kotjipunguhiro tjoruuwa. Nu ngunda ama punguha, tjandje Muhona ma tjiti ovihimise momurungu wa Manoah nomukazendu we. 20 Otururumo ngunda amatu rondo kombanda okuza kotjipunguhiro, owo va muna omuengeri wa Muhona ama rondo keyuru motururumo twi. Nowo va wa onḓurumika. 21 Nomuengeri wa Muhona ka munikire rukwao ku Manoah nomukazendu we. Manoah opa tjivirwa kutja ingwi wa ri omuengeri wa Muhona.
22 Manoah wa tja komukazendu we: “Eṱe, tjiri, matu koka, orondu twa munu Ndjambi.”
23 Nungwari omukazendu we we mu zira a tja: “Andakuzu Muhona wa vanga okutuzepa, katja yakura ozombunguhiro zetu. Eye ketje tu raisira avihe mbi poo okuturaera oviṋa otja imbi moruveze ndwi.”
24 Nomukazendu wa panduka omuzandu ne mu ruku Simson. Omuatje ngwi we kura, nu Muhona we mu sera ondaya. 25 Nombepo ya Muhona ya uta okumupa omasa, ngunda e ri mozondanda za Dan pokati ka Sora na Estaol.
© Herero Revision Bible © Bible Society in Namibia, 2021.
