Omerikutiropamwe wa Ndjambi na Abram
1 Kombunda yoviṋa mbi Muhona we rimunikisa ku Abram na tja: “O tira, Abram! Ami owami oruvao rwoye; nondjambi yoye mai rire onene tjinene!”
2 Nu Abram wa tja: “Muhona Ndjambi wandje, mo ndji pe otjingee tjiyandjewa, ami tjinga ambi hi novanatje? Omurumate weṱa randje ma rire Elieser wa Damaskus erike. 3 Ove ko ndji pere ovanatje; omukarere umwe wondjuwo yandje ongu maa karira omurumate weṱa randje.”
4 Nu Muhona we mu zira a tja: “Omukarere ngwi Elieser kamaa rumata eṱa roye; nungwari omuzandu woye omuini ongu ma rire omurumate weṱa roye.” 5 Nu Muhona we mu pitisa pendje na tja: “Tara keyuru, nu vara ozonyose, tji mo sora okuzevara.” Tjazumba Muhona a ryama nokutja: “Moo kakara nozondekurona ozengi pu pe ṱeki mbo.”
6 Nu Abram wa kambura mu Muhona; nu Muhona ope mu varera otja omusemba komurungu we.
7 Muhona wa hungira ku ye a tja: “Ami owami Muhona ngu mbe ku tjindisa kOur tja Kaldea kutja mbi ku pe ehi ndi ri rire oroye.”
8 Nungwari Abram wa pura nai: “Muhona Ndjambi wandje, ami me tjiwa vi kutja oro mari rire orandje?”
9 Nu Muhona wa zira a tja: “Ndji etera ondana ondema, nongombo ondema nondwezu yonḓu, aihe ndji nozombura ndatu, nohanda notjingutyona.” 10 Neye arire tje kemuetera avihe mbi, ne vi haṋa motumbembera, notwo we tu twa ozombarakana motuteto tuvari; nungwari inḓa ozonḓera ka haṋene mokati. 11 Novimbirinyama arire tji vya wirire konyama, nungwari Abram we vi ramba.
12 Neyuva tji ra ri pokutoka, Abram wa rara ozomboṱu ozonḓeu, narire tja tira ooma tjinene. 13 Nu Muhona opa tjera nai ku Abram: “Tjiwa nawanawa kutja ozondekurona zoye maze karira ozambangu mehi rozonganda; maze karira ovakarere ngo naze katatumisiwa oure wozombura omasere yane. 14 Nungwari ami mee vere otjiwaṋa wina tji matji ze isa po ovakarere, nu kombunda ozo maze twaerere outumbe ouingi, tji maze zu mehi ndi. 15 Nungwari ove moo i kooiho, mba suva mohange, nu mo kapakwa awa rire omukururume. 16 Nu ma rire omuhoko outjaine wozondekurona zoye mbu maau kakotoka ngunongwi; orondu ami himee pitisa Ovaamori ngandu tjiva rire ovanauvi kokutja ve mune omberero.”
17 Neyuva tji ra toka nu tji kwa zorera ṱukuṱuku otji pa kayenda ezuko romuise notjiumbu tjomuriro pokati kovindimbu mbi vyonyama. 18 Nu meyuva ndo Muhona otja tjita omerikutiropamwe na Abram, na tja: “Ehi ndi arihe me ri yandja kozondekurona zoye, okuza konḓonḓu ya Engipte nga konḓonḓu onene, indji Eufrat; 19 nu mari kara notukondwa twomahi womihoko mbi: Ovakeni nOvakenasi nOvakadmoni 20 nOvahetite nOvaperesi nOvarefai 21 nOvaamori nOvakanaan nOvagirgasi nOvajebusi.”
© Herero Revision Bible © Bible Society in Namibia, 2021.
