Eksodus 12 - Herero Revision Bible (HRR)

Omazikiro wOpaska

1 Muhona wa hungira kooMoses na Aron mehi ra Engipte na tja: 2 “Omueze mbwi ngau rire omueze omutenga womautiro womieze vyombura ku eṋe. 3 Tjiviseye kombongarero aihe yOvaisrael nu itjeye nai: Meyuva oritjamurongo romueze mbwi, auhe nga toorore ondjona, eṱunḓu arihe ondjona imwe poyaro. 4 Nungwari eṱunḓu, ndi hi nanḓengu okurya ondjona ndji aihe, ngari rikute kumwe nomuraranganda ngu ri popezu otja potjivaro tjawo; ku auhe pa iririra okurya, vareye otjivaro tjaimba mbu mave ri ondjona ndjo. 5 Mamu sokutoorora ondjona, poo ongombo, nungwari nga rire tjimwe tjavyo otjirume tjombura imwe nu tji tji hi notjipo. 6 Iṱizeye nawa nga koritjamurongo na yane komueze mbwi. Nu ombongarero aihe yOvaisrael ngai i zepe komuihi otja komaṱunḓu wawo. 7 Nu ngave toore ombinḓu, ve i hwe kozongambezero zomivero na kotjipamba tjondjuwo aihe mu mave rire ondjona ndji. 8 Nonyama ndja terekwa pomakara ngave i rye puna ozomboroto nḓe hi nosurise, na puna omiti omitjatise omiruru, mouṱuku tjingewo. 9 Ngaamu ri ngunda ai ri ombihu poo aya pi momeva, nungwari ngai pye aihe ombomba pomakara notjiuru nozonyu novyopehuri. 10 Nu ngaamu hupisa okaṋa nga komuhuka weyuva rarwe. Nonyama ndja hupu ngai ningiririsiwe momuriro. 11 Nu i ryee komuhingo mbwi: Rivarangeye nomakwamo pehuri, nozongaku kareye na zo kozombaze, nokati meke. Nu i ryee ohakahana. Ihi omukandi wOpaska wokuyozika Muhona.

12 “Ami mouṱuku mbwi me tuurunga ehi ra Engipte ne zepa omaveri aehe mu ro, wovandu nowovinamuinyo. Nu me vere oomukuru avehe va Engipte. Owami, ngu mbi ri Muhona. 13 Nungwari indji ombinḓu kozondjuwo mu mu ri mai rire otjihako ku eṋe. Ami tji me munu ombinḓu ndji, me kapita pu eṋe. Nu kape nokukara otjiwonga tjomanyoneno ku eṋe, ami tji me tono ehi ra Engipte. 14 Eyuva ndi ngari rire oromazemburukiro ku eṋe. Ri yapureye ri rire eyuva romukandi ndi ma rimuzemburukisa imbi ami, ngu mbi ri Muhona, mbi mba tjita. Nyandereye ro nga kozondekurona zeṋu oruveze aruhe.

Omukandi wOzomboroto nḓe hi nosurise

15 “Oure womayuva hambombari ryee ozomboroto nḓe hi nosurise. Tjimanga meyuva etenga iseye mo osurise mozondjuwo zeṋu. Orondu auhe ngu ma ri ozomboroto nḓe nosurise okuza keyuva etenga nga koritjahambombari, nga kondwe kombongo ya Israel. 16 Nu meyuva etenga na mu indi oritjahambombari ngape kare ombongarero yomerikotameneno. Ape kara oviungura momayuva ngo, posi yovikurya mbi mavi hepwa okuriwa i auhe, ombi mavi ungurwa. 17 Ṱizeye Eyuva romukandi ndi, orondu meyuva ndo ami otji mba pitisa omihoko vyeṋu mehi ra Engipte. Opu mamu sokuṱakamisa eyuva ndo ri rire omazikamisiro waaruhe mozondekurona zeṋu. 18 Momueze omutenga, meyuva oritjamurongo na yane, ongurova ryee ozomboroto nḓe hi nosurise, nga keyuva oritjamirongo vivari na rimwe mongurova. 19 Oure womayuva hambombari amu munika osurise mozondjuwo zeṋu. Orondu auhe ngu ma ri otjiṋa tji tji nosurise, nga kondwe kombongo yOvaisrael, nangarire kutja owozonganda poo omukwatera wehi ndi. 20 Amu ri ko otjiṋa tji tji nosurise. Pomaturiro weṋu aehe ryee ozomboroto nḓe hi nosurise.”

Opaska ondenga

21 Nu Moses wa isana ovanane avehe vOvaisrael na tja ku wo: “Kaeteye ozonyanda otja komaṱunḓu weṋu, mu ze zepere omukandi wOpaska. 22 Tjazumba poreye otjiyao komuti omuhisop, nu mu tji tjaveke mombinḓu, ndji ri motjiyaha, nu mu i hwe kotjipamba tjondjuwo na kozongambezero zomuvero. Nu ape ningi omundu ngu ma piti momuvero wondjuwo ye nga komuhuka. 23 Orondu Muhona ma tuurunga nu ma zepa Ovaengipte. Nungwari tji ma munu ombinḓu kotjipamba na kozongambezero zomivero, ma kapita na tjaere ingwi omunyone okuhita mozondjuwo zeṋu okumuzepa. 24 Ṱakamiseye etwako ndi otja omazikamisiro ku eṋe na kovanatje veṋu nga aruhe. 25 Nu tji mwa vaza mehi Muhona ndi ma yandja ku eṋe otja pe mu kwizikira, ṱakamiseye omuano mbwi omuyapuke. 26 Novanatje veṋu tji mave kemupura kutja omuano mbwi omuyapuke u ha tjike, 27 nu eṋe itjeye nai: ‘Oyo ombunguhiro yOpaska ku Muhona, ngwa kapitire pozondjuwo zOvaisrael mOengipte, eye tja zepere omaveri vOvaengipte na yama ozondjuwo zetu.’ ”

Otjiwaṋa opu tje rikotemenena mozongumbiro. 28 NOvaisrael va katjita nao otja Muhona punga a raera kooMoses na Aron.

Onḓiro yomaveri

29 Nu mokati kouṱuku, Muhona wa zepa omaveri aehe mOengipte, okuza keveri ra Farao, ndi mari kahaama kotjihavero tjouhona, nga keveri romupandekwa ngwa ri motjovakamburwa, na inga omaveri aehe wovinamuinyo wina. 30 Farao novakarere ve nOvaengipte avehe va penduka ouṱuku. Nu pa kara ondjuriro onene mOengipte, orondu tji pe ha ri ondjuwo mu mu ha ri orurova.

31 Farao opa isanena ooMoses na Aron ouṱuku, na tja: “Eṋe nOvaisrael hakahaneye okupita, ve eseye ovandu vandje, nu mu kakarere Muhona weṋu otja tji mwa heya. 32 Twaetereye ozonyanda nozongombe zeṋu otja punga amwa heya, twendeye nu mu kendjikumbire ondaya wina.”

33 NOvaengipte otji va hekena otjiwaṋa tji ze mo tjimanga mehi. Orondu owo va tja: “Eṱe atuhe matu ṱu, tji mu hi nakutjinda.” 34 Otjiwaṋa otji tja toora otjisema tjomboroto, ngunda amu hiya tuwa osurise, movitjuma oviterekero. Nowo ve vi manga momarapi wawo nave vi tjindi koviṱuve. 35 NOvaisrael va tjitire otja komararerero wa Moses. Owo va ningirire oviwerawere ovisilveri novingoldo, nozombanda kOvaengipte. 36 Nu Muhona wa tjita nai kutja Ovaengipte ve yandje ondjingonekero kOvaisrael; nowo ve ve pa imbi mbi va ningira. Komuhingo mbwi otji va huura Ovaengipte.

Ovaisrael mave zu mo mOengipte

37 NOvaisrael va tjinda okuza kOramses okuyenda kOsukot. Owo va ri ovarumendu vopehi mangara omayovi omasere hamboumwe, nokuhinokuvara ovakazendu novanatje. 38 Notjimbumba tjovandu varwe wozonganda, nozonyanda nozongombe otuwondja vya tjinda puna wo. 39 Nu ihi otjisema tjomboroto tji va isa mOengipte, va tereka po omavanda wovikokotwa nge ha ri nosurise. Otjisema katji surisirwe, tjinga ava rambwa mOengipte nokuhaperwe oruveze; notji ve ha toorere onguta.

40 Nu indwi oruveze Ovaisrael ndu va turire mOengipte, rwa ri oure wozombura omasere yane nomirongo vitatu. 41 Nozombura nḓa omasere yane nomirongo vitatu tji za kapita, meyuva tjingero, omihoko avihe vyotjiwaṋa tja Muhona otji vya tjinda mehi ra Engipte. 42 Imbwi ombu ri ouṱuku mbwa pu pokuṱakamisiwa kondjozikiro ya Muhona, eye tjinga e ve pitisa mehi ra Engipte. Nu wina ombu ri ouṱuku mbwa yapurirwa Muhona, okuzemburukwa i Ovaisrael avehe nga kozondekurona zawo.

Omazikamisiro wOpaska

43 Komurungu Muhona wa tja nai kooMoses na Aron: “Inga owo omazikamisiro wOpaska: Kape nomundu wozonganda ngu ma yenene okurya ombunguhiro yOpaska. 44 Nungwari omukarere auhe ngwa randwa novimariva ma yenene okuirya tja zu nokusukarekwa. 45 Nungwari omuriyazemise nomuungurire wondjambi ngaave ri yo. 46 Ngai rirwe mondjuwo. O pitisa nangarire okanyama pendje; neṋe amu teya eṱupa rondjona ndji yOpaska. 47 Nu indji ombongo aihe ya Israel ngai nyandere Eyuva ndo. 48 Nu owambangu tji ma kara puna ove, na vanga okutjita Opaska kondjozikiro ya Muhona, rutenga omuvena auhe nga sukare; otji ma ryama popezu nokutjita omukandi wOpaska. Neye otji ma varwa otja omukwatera wehi ndo. Nungwari ngu hiya sukara, ngaa ri ku yo. 49 Etwako tjingero ndo ngari kare komukwatera na kowambangu ngu ri mokati keṋu.” 50 NOvaisrael avehe va tjita nao otja Muhona punga a raera kooMoses na Aron. 51 Nu meyuva tjingero ndo Muhona otja pitisa Ovaisrael mehi ra Engipte otja komihoko vyawo.