Muhona ma isana otjiwaṋa tje kutja tji kotoke ku ye
1 Momueze outjahambondatu wombura oitjavari Darius tja ri ombara ya Persie, Muhona otja yandja ombuze komuprofete Sakaria, omuzandu wa Berekja, omuzandu wa Ido. 2 Muhona Omunamasaaehe wa raera Sakaria kutja a tje nai kotjiwaṋa: “Ami, ngu mbi ri Muhona, mba ṱire omazenge tjinene nooiho mukururume, 3 nungwari nambano ami me tja nai ku eṋe: ‘Kotokeye ku ami, nami me kotoka ku eṋe! 4 Amu kara otja ooiho mukururume. Rukuru ovaprofete ve ve pere ombuze yandje yokutja ave ha uhara amave hupu mourunde na mouvi rukwao. Nungwari owo kave puratenene nu kave karere nonḓuviro ku ami. 5 Ooiho mukururume novaprofete mbo kave tji nomuinyo. 6 Ami mba yandja omarakiza nomaronga kooiho mukururume novinyo vyovakarere vandje, imba ovaprofete, nungwari owo ve ve nyengura; notji va hihamisirwa oviṋa mbi. Nowo otji va tanauka nave tjiwa kutja ami, ngu mbi ri Muhona Omunamasaaehe, mbe ve verere otja pu va sokuverwa, notja pu mba tyere okutjita nao.’ ”
Otjirimunikise tjomuprofete tjoukambe
7 Mombura oitjavari Darius tja ri ombara, meyuva oritjamirongo vivari na yane komueze outjamurongo na umwe, omueze Sebat, Muhona we ndji pa ombuze motjirimunikise mouṱuku. 8 Ami mba muna omuengeri wa Muhona a kavire kokakambe okasazu. Eye wa kuramene mokati komimbango momukutu, nu kongotwe ye kwa ri oukambe oukwao, ousazu noupawe nouvapa. 9 Ami mba pura omuengeri ngwi e tja: “Muhona, oukambe mbwi mau hee tjike?”
Eye wa zira a tja: “Ami me ku raisire kutja oukambe mbwi mau hee tjike. 10 Muhona we u hinda kutja owo u kahore ehi.”
11 Oukambe mbwi arire tji wa hepura komuengeri au tja: “Eṱe twa ryanga mouye auhe, nu twa muna kutja owo wa mwina nu u ri morusuvo.”
12 Nomuengeri wa tja nai: “Muhona Omunamasaaehe, ove wa pindike na Jerusalem novihuro vyehi ra Juda oure wozombura omirongo hambombari. Ma rire oure mbu ṱa pi komurungu ngunda au hiye vi ṱira otjari?”
13 Muhona wa zira omuengeri nomambo omawa nomahuhumiṋe, 14 nomuengeri we ndji raera kutja mbi serekarere imbi Muhona Omunamasaaehe mbya hungira, indu tja tja: “Ami mbi norusuvero orunene nongendo kOjerusalem, otjihuro tjandje otjiyapuke, 15 nungwari mba pindika tjinene noviwaṋa, mbya hirimana mohange. Ami ngunda amba tjaere omazenge wandje kotjiwaṋa tjandje, oviwaṋa mbyo tjandje mavi takavarisire ko omihihamo kotjiwaṋa tjandje. 16 Ami opu mba kotokera kOjerusalem okutjiṱira ondjenda. Ondjuwo yandje mai tungururwa, notjihuro matji yarurwa ko.”
17 Omuengeri we ndji raera kutja mbi zuvarise rukwao nai: “Muhona Omunamasaaehe ma tja ovihuro vye mavi rire ovaṋingandu rukwao, nokutja eye ma vatere Jerusalem rukwao, nu me rityere otjihuro hi okurira otje omuini.”
Otjirimunikise tjozonya
18 Motjirimunikise tjarwe ami mba muna ozonya ine zonduwombe. 19 Ami mba pura nai komuengeri ngwaa hungire kuna ami: “Ozonya nḓa maze hee tjike?”
Eye wa zira nai: “Ozo maze kuramenepo omahi omanamasa mouye, nga rimba otjiwaṋa tja Juda notja Israel novature va Jerusalem.”
20 Muhona we ndji raisira ovahambure vane. 21 Ami mba pura nai: “Ovarumendu mba ve ya okuungura tjike?”
Omuengeri wa zira a tja: “Owo ve ya okutirisa nokunakaura oviwaṋa mbye ya okuṱukuṱura ehi ra Juda nokurimba ovandu varo.”
© Herero Revision Bible © Bible Society in Namibia, 2021.
