Esra 3 - Herero Revision Bible (HRR)

Omerikotameneno maye utwa rukwao

1 Momueze outjahambombari Ovaisrael avehe tjandje va tura movirongo vyawo. Avehe otji va woronganena mOjerusalem, 2 nu Jesua, omuzandu wa Josadak, novapristeri ovakwao na Serubabel, omuzandu wa Sealtiel, puna ovazamumwe ve va tungurura otjipunguhiro tja Ndjambi wa Israel okupunguhira ko ozombunguhiro ozoningiririsiwa otja komaraerero nga tjangwa mEmbo rOmatwako ra Moses, ingwi omurumendu ngwa toororwa i Ndjambi. 3 Imba ovahuurwa, mba kotokere, nangarire kutja aave tira ovandu mba turire mehi, owo va tungurura otjipunguhiro poṋa pu tja ri rukuru. Tjazumba otji va uta okuningiririsira ko ozombunguhiro zomuhuka nozongurova. 4 Owo va yandera Omukandi wOviranda vyOmaso komuhingo womazikamisiro; eyuva arihe ave punguha ozombunguhiro nḓaa ze heperwa po eyuva ndo; 5 nu kombunda yanao aave punguha ozombunguhiro ozoningiririsiwa zeyuva arihe peke, na inḓa zOmukandi wOmatendameno wOmueze, na pOmikandi mbya zikamisirwa Muhona, na wina ozombunguhiro azehe nḓaa ve punguhire Muhona otja kouharupu wawo oveni. 6 Ovandu ngunda ave hiya uta okutungurura ondjuwo ya Muhona va yaruka okupunguhira Muhona ozombunguhiro ozoningiririsiwa meyuva etenga romueze outjahambombari.

Omatungururiro wondjuwo ya Muhona maye utwa

7 Ovandu va yandja ovimariva okusuta na vyo ovahonge womawe novomiti, nave hindi ovikurya nomanuwa nomaze womiṋinga kovihuro Tirus na kOsidon, okukapimbasana notupapa twa Libanon, kokutja tu etwe kOjopa mokuvare. Avihe mbi vya tjitwa nousemba wa Kirus, ombara ya Persie. 8 Momueze outjavari wombura oitjavari tji va za nokukotoka kondjuwo ya Muhona mOjerusalem, otji va uta oviungura. Serubabel na Jesua novakwao, okutja ovapristeri nOvalevi, novahuurwa avehe mba kotokere kOjerusalem, va ungura pamwe. Ovalevi avehe, mba ri nozombura omirongo vivari nokomurungu, va tuwa mokutjevera oviungura vyokutungurura ondjuwo ya Muhona. 9 Omulevi Jesua, novazandu ve novazamumwe ve, na Kadmiel novazandu ve, nonganda ya Hodawija ve rikuta kumwe okutungurura ondjuwo ya Muhona. Owo va vaterwa i Ovalevi vonganda ya Henadad.

10 Imba ovatunge tji va uta okutunga omazikameno wondjuwo ya Muhona, ovapristeri mba hwikikire ozombanda zawo otji va kurama potuveze twawo ave nozohiva momake, nOvalevi vonganda ya Asaf wina va kurama novihumba vyovitenda. Owo va tanga Muhona otja komaraerero nga yandjerwe okuza koruveze rwombara David. 11 Owo va imburira Muhona ozondangero amave yaruka po rukwao amave tja:

“Muhona eye omuwa

norusuvero rwe ku Israel orukarerere.”

Otjiwaṋa atjihe tja ravaera neraka enene ama tji tanga Muhona, oviungura vyomazikameno wondjuwo ya Muhona tjinga avya utwa. 12 Ovapristeri ovengi nOvalevi noviuru vyozonganda ovakururume va munine indji ondjuwo ya Muhona ondenga, nowo tji va muna inga omazikameno wondjuwo ya Muhona ombe otji va ura nave riri. Nungwari ovengi vawo mba ri mbo va ravaera nondjoroka. 13 Kape na umwe ngwaa pangura pokati kondavaerero yondjoroka noyokurira, orondu ondokohero ndjaave tjiti ya ri onene nga tjiyai zuvakere kokure akuhe.