Ouyapuke wovapristeri
1 Muhona wa hungira ku Moses a tja: “Raera kovapristeri, imba ovazandu va Aron, nu itja nai ku wo: ‘Omupristeri ke nakusokurizunḓa omuini mokukara norupa momikandi vyozonḓiro omuzamumwe we tja ṱu, 2 posi yovazamumwe wopopezu na ye, okutja ooina na ihe, nomuzandu nomusuko we, nerumbi poo omuangu we 3 nomuṱena wopopezu na ye, ngu hiya kupwa. 4 Neye ka sokurizunḓa ponḓiro ya imba mba rira ovazamumwe naye motjimbe tjorukupo.
5 “ ‘Ovapristeri ave rihora oviuru, nu ave rihora otuyezu twawo ovikoro, nu ave ritjanga mokutopora otutu twawo, okuraisa kutja ve ri moruhoze. 6 Owo ngave kare ovayapuke ku Ndjambi wawo, tjinga ave punguha ozombunguhiro ozoningiririsiwa ku Muhona; opu va pu okurira ovayapuke. 7 Owo ave kupu omukorondu poo omukazendu ngwa zunḓaka, nandarire ngwa isa orukupo; orondu omupristeri wa yapurirwa Ndjambi. 8 Otjiwaṋa ngatji mu vare otja omuyapuke, eye tjinga e punguha ozombunguhiro oningiririsiwa za Ndjambi watjo. Eye nga rire omuyapuke ku eṋe, orondu ami ngu mbi ri Muhona, ngu mbi mu yapura, owami omuyapuke. 9 Omukazona womupristeri tja rire omukorondu, eye wa yamburura ihe; neye nga ningiririsiwe momuriro nga tja koka.
10 “ ‘Omupristeri Otjiuru wokombanda, ngwa tirirwa omaze omatwirise kotjiuru, nu ngwa zikwa okurira omupristeri, nu ngwa zarisiwa ozombanda zoupristeri, a isa ozondjise ze aze hiya kamurwa, nu a nyondorora ko ozombanda ze okuraisa oruhoze rwe. 11 Eye, eya popezu norurova rwomundu, nandarire kutja orwa ihe poo orwaina; eye ke nokurizunḓa na rwo. 12 Neye a piti ko moruveze romerikotameneno kutja a ha yamburura ondjuwo ya Ndjambi we, eye tjinga a yapurirwa Ndjambi we nomaze omatwirise. Owami ngu mbi ri Muhona. 13 Eye nga kupe omukazona ngu hiya rara puna omurumendu. 14 Eye ngaa kupu omuhepundu poo omukazendu ngwa isa orukupo poo omukorondu; nga kupe omusuko mokati kotjiwaṋa tjawo 15 kutja a ha yamburura ozondekurona ze mokati kotjiwaṋa tjawo, ami tjinga ambi ri Muhona ngu mbe mu yapura otja Omupristeri Otjiuru.’ ”
16 Rukwao Muhona wa hungira ku Moses a tja: 17 “Raera ku Aron nai: ‘Tji pe nomuzandu mozondekurona zoye, okuza komihoko nga komihoko, ngu notjipo morutu, eye ke nakusokundjipunguhira ombunguhiro yovikurya. 18 Kape nomundu ngu notjipo morutu, ngu ma sokupunguha ombunguhiro, okutja omupoṱu nomuremane, nomundu ngu notjipo momurungu, na ngu notjiṋepo otjire potjikwao; 19 nandarire ngwa teka okurama poo okuoko, 20 poo ngu nondjinda poo ngwa sepunuka poo ngu nondwinga poo ngu novinyuru poo eyaze poo ngu nomutupa. 21 Kape nomundu mozondekurona za Aron ingwi omupristeri, ngu notjipo morutu, ngu ma sokundjipunguhira ombunguhiro oningiririsiwa. 22 Omurumendu otja ingwi ma yenene okurya ovikurya oviyapukeyapuke vya Ndjambi we. 23 Nungwari eye ke nakusokuya popezu nerapi etjizikize nokuya kotjipunguhiro, tjinga e notjipo morutu rwe kutja a ha yamburura ovyouyapuke vyandje, ami tjinga ambi ri Muhona, ngu mbi vi yapura.’ ”
24 Imbi Moses ombya raera kooAron novazandu ve na kOvaisrael avehe.
© Herero Revision Bible © Bible Society in Namibia, 2021.
