Esekiel 12 - Herero Revision Bible (HRR)

Omuprofete otja omutaure

1 Muhona wa hungira ku ami a tja: 2 “Muatje womundu, ove mo tura mokati komuhoko omupikapike. Owo ve nomeho, nungwari kave na tji ve muna; ve nomatwi, nungwari kave na tji ve zuva, orondu owo ovapirukire.

3 “Nambano, muatje womundu, kuta omutwaro otja omutaure tjinga e tjita, nu mutenya u kumuke. Auhe nga mune kutja ove mo tjindire kotjirongo tjarwe. Ngahino ovapirukire mbo mave ku munu, 4 ngunda e ri mutenya, kuta omutwaro woye otja omuhuurwa tje tjita kokutja ve ku mune; nu tjita kutja ve ku mune, tji mo i ongurova aayo mo i kouhuura. 5 Ngunda amave ku tarere, topora ondovi mekuma rondjuwo yoye nu u pitisire mo omutwaro woye. 6 Ngave ku tarere tji mo toora omutwaro woye komutenge; nu tji wa piti konḓorera, kutjira omurungu woye kutja o ha munu ehi ku mo i. Imbi mbi mo tjiti mavi rire otjiraisiro tjomaronga kOvaisrael.”

7 Ami mba tjita imbi Muhona mbye ndji raera okutjita. Eyuva ndo mba kuta omutwaro wandje otja omutaure tje tjita; nongurova tji kwa zorere, ami arire tji mba topora ondovi mekuma rondjuwo nomake wandje nu arire tji mba piti. Ngunda amave tarere, mba twa omutwaro komutenge ne i.

8 Mependukirwa Muhona wa hungira ku ami a tja: 9 “Muatje womundu, nambano ovapirukire mbo tji mave ku pura kutja mo ungura tjike, 10 ve raera imbi ami, ngu mbi ri Muhona Ndjambi, mbi me hungire ku wo. Ombuze ndji oyomupingene wombara ngu honapara mOjerusalem, noyOvaisrael avehe mba tura mo. 11 Ve raera kutja imbi mbi wa tjita, ovyo otjiraisiro tjaimbi mbi mavi katjitwa ku wo, owo mave taura nave rire ovahuurwa. 12 Omupingene ngu ve honaparera ma toora omutwaro we komutenge konḓorera na henene mondovi, ndji ve mu toporera mekuma. Eye ma kutjire omurungu we kutja a ha munu ehi ku ma i. 13 Nungwari ami me yara ombate yandje ne mu kambura na yo. Tjazumba me mu twara kotjihuro tja Babilon kehi ra Asur, ku ma kaṱira nokuhinokumuna ro. 14 Ami me piza kominda avihe ovandu avehe mbe ri puna ye, okutja ovayandjandunge ve novarwe ve wovita, nu meve paha kutja mbi ve zepe nomangaruvyo.

15 “Ami tji mba zu nokuverimba mokati koviwaṋa vyarwe na momahi wozonganda, mave tjiwa kutja owami ngu mbi ri Muhona. 16 Ami me tjiti kutja tjiva vawo ve hupe kovita na kondjara na komutjise omuzeu, kokutja imbo mokati koviwaṋa ve serekarere ozondjito zawo ozondjaukise, nokutja ovyo wina vi tjiwe kutja owami ngu mbi ri Muhona.”

Otjiraisiro tjomuprofete ngu ma zezera

17 Muhona wa hungira ku ami a tja: 18 “Muatje womundu, zezera tji mo ri omboroto yoye, nu u rihakihe mondira tji mo nu omeva. 19 Raera otjiwaṋa atjihe kutja indji oyo ombuze ya Muhona Ndjambi kovature va Jerusalem ingee mba rimbara mehi ra Israel. Owo mave zezera tji mave ri omboroto yawo nave rihakiha mondira tji mave nu omeva; orondu ehi rawo mari sewa tjo mena routwe wovature varo. 20 Ovihuro nambano mbye ura novandu mavi nyonwa, nehi mari rire ongaango. Nowo otji mave tjiwa kutja owami ngu mbi ri Muhona.”

Omiano omitjiukwa nombuze ndji he ri ondjiukwa

21 Muhona wa hungira ku ami a tja: 22 “Muatje womundu, okutjavi Ovaisrael tji ve yarukirapo omuano mbwi povikando ovingi nai: ‘Oruveze ru kapita, nomaukiro ye rira omungandjo’? 23 Nambano ve raera imbi ami, ngu mbi ri Muhona Ndjambi, mbi me hungirire omuano mbwi. Ami me yandisa omuano mbwi. Kau nokuhungirwa rukwao mOisrael. Moruveze rwanao ve raera nai: ‘Oruveze rweya, nomaukiro maye rire ouatjiri!’ ”

24 “Mokati kotjiwaṋa tja Israel kamu nokukara ovirimunikise vyoposyo rukwao poo omaukiro omapukise. 25 Ami, ngu mbi ri Muhona Ndjambi, me hungire ku wo, nu imbi mbi me hungire mavi yenenisiwa. Kape nokukara omawombero. Moure wominyo vyeṋu, tjiwaṋa otjipirukire, ami me yenenisa imbi mbi mbe mu raera kutja me yenenisa. Ami, ngu mbi ri Muhona Ndjambi, owami ngu mba hungire.”

26 Muhona wa tja nai ku ami: 27 “Muatje womundu, Ovaisrael ve tjangovasi ovirimunikise vyoye nomaukiro woye vi heya oviṋa vyoruveze ndu ri kokure. 28 Opu mo sokuveraera kutja ami, ngu mbi ri Muhona Ndjambi, me tja nai: ‘Kape tji nokukara omawombero rukwao. Mbi mba hungira mavi tjitwa.’ Ami, ngu mbi ri Muhona Ndjambi, mba hungire.”