Jerusalem matji pangurwa
1 Omasa wOmbepo ya Ndjambi ye ndji yera naye ndji twara komuvero wokomuhuka wondjuwo ya Muhona. Imbo popezu nomuvero mbwi mba muna po ovarumendu omirongo vivari na vetano puna Jaasanja, omuzandu wa Asur, na Pelatja, omuzandu wa Benaja, aveyevari mba ri ovanane votjiwaṋa.
2 Ndjambi wa tja nai ku ami: “Muatje womundu, ovarumendu mba ve ripura omeripura omavi nu ve yandja ondunge ombi motjihuro hi. 3 Owo ve tja nai: ‘Eṱe matu tungu ozondjuwo tjimanga rukwao, otjihuro tja sana nonyungu ondereke, neṱe twa sana nonyama ndji ri mu yo, nungwari korusenina otjo tji tu yama komuriro.’ 4 Nambano rira omuprofete, nu u tji uke, muatje womundu!”
5 Ombepo ya Muhona otji ya hita mu ami, nu Muhona we ndji raera kutja mbi hungire ombuze ndji kotjiwaṋa: “Tjiwaṋa tja Israel, ami me tjiwa imbi mbi mo ripura na mbi mo hungire. 6 Eṋe mwa zepa ovandu ovengi nai motjihuro, nga omivanda tji vye ura noturova.
7 “Ami ngu mbi ri Muhona Ndjambi opu me tjere nai ku eṋe: ‘Otjihuro hi otjo onyungu ondereke, nungwari indji onyama otjikeṋa? Oyo oturova twa imba mbu mwa zepa! Eṋe kamu nokukara muno, ami me mu nakaura motjihuro hi! 8 Mamu tira omangaruvyo are? Ami me eta ovarumendu kutja ve mu rwise nomangaruvyo. 9 Ami me mu pitisa motjihuro nu me mu yandja kovandu wozonganda. Ami me mu pangura kokuṱa, 10 neṋe mamu ṱu motjirwa mehi reṋu oveni. Auhe otji ma tjiwa kutja owami, ngu mbi ri Muhona. 11 Otjihuro hi katji nokumuyama otja onyungu tji i yama onyama ndji ri mu yo. Ami me mu pangura ngamwa akuhe ku mamu kakara mehi ra Israel. 12 Eṋe otji mamu tjiwa kutja owami, ngu mbi ri Muhona, nokutja eṋe, ngunda amamu ṱakamisa omazikamisiro womihoko omiraranganda, mwa katuka omatwako wandje namu kara nokuhinonḓuviro komarakiza wandje.’ ”
13 Ami ngunda ame uku, Pelatja, omuzandu wa Benaja, wa wa na koka, mba wa onḓurumika ne ravaere nai neraka enene: “Ayee, kako, Muhona Ndjambi! Ove mo zepa ovandu avehe mba hupa po mOisrael are?”
Omakwizikiro wa Ndjambi kovahuurwa
14 Muhona wa hungira ku ami a tja: 15 “Muatje womundu, ovandu mba tura mOjerusalem ve hungira ohunga na ove novazamumwe voye nOvaisrael ovakweṋu mbe ri mouhuura, amave tja nai: ‘Ovahuurwa ve ri kokure tjinene pu ve ha sere okurikotamena ku Muhona. Eye we tu pa ehi ndi okurira ouini wetu.’
16 “Nambano raera kovahuurwa ovakweṋu imbi mbi me hungire. Owami ngu mbe ve hinda okukakara momihoko, mbi ri kokure, nu mbe ve rimba momahi wozonganda. Nungwari moruveze orusupi ami me kara puna wo momahi ku va ya kokutja ve rikotamene ku ami.
17 “Opu mo keveraerera imbi ami, ngu mbi ri Muhona Ndjambi, mbi me hungire. Ami meve woronganisa momahi mu mbe ve rimba, nu e ve kotorere ehi ra Israel. 18 Nowo tji va kotoka mu ro mave imbirahi oviserekarera avihe vyovisenginina ovinandova noviyaukise, mbi mave vaza mo. 19 Ami meve pe omitima omipe nombepo ombe. Ami me isa mo omitima vyawo omirangaranga nomikukutu, nu meve pe omitima ominanḓuviro. 20 Nowo mave ṱakamisa omatwako wandje nu ave kara nonḓuviro komaraerero wandje aehe nouṱakame. Owo mave rire otjiwaṋa tjandje, nami e rire Ndjambi wawo. 21 Nungwari ami me vere otjiwaṋa tji tja suvera okurikotamena koviserekarera vyovisenginina ovinandova noviyaukise. Ami meve verere imbi mbi va tjita.” Muhona Ndjambi ongwa hungire.
Ondjerera ongeṋangeṋe ya Ndjambi mai zu mo mOjerusalem
22 Ovakerubi va uta okutuka, noviryo vyetemba vya ya puna wo. Ondjerera ongeṋangeṋe ya Ndjambi wa Israel ya ri kombanda yawo. 23 Tjazumba ondjerera ndji ya za mo motjihuro nai i kondundu kuṱa komuhuka watjo. 24 Motjirimunikise omasa wOmbepo ya Ndjambi ye ndji yera naye ndji twara kovahuurwa mObabilon. Otjirimunikise tja zenga, 25 nami mba karaera ovahuurwa oviṋa avihe Muhona mbye ndji raisira.
© Herero Revision Bible © Bible Society in Namibia, 2021.
