Esekiel 36 - Herero Revision Bible (HRR)

Ndjambi ma sere Israel ondaya

1 Muhona wa tja nai: “Muatje womundu, hungira kozondundu za Israel nu u ze raere kutja ze puratene kombuze 2 Ami, ngu mbi ri Muhona Ndjambi, ndji mbi na yo kOvaisrael, nu itja nai: Ovanavita na Israel va nyekerera ave tja: ‘Ha ha! Ozondunda inḓa ozonguru nambano ozetu!’

3 “Uka u zuvarise imbi ami, ngu mbi ri Muhona Ndjambi, mbi me hungire. Oviwaṋa vyopopezu tji vya kambura nu tji vya punda ozondundu za Israel, ovyo avihe vya yamburura Israel. 4 Nambano purateneye ku imbi ami, ngu mbi ri Muhona Ndjambi, mbi me hungire ku eṋe ozondundu novivanda, nomiramba nomikutu, na ku eṋe ovirongo mbu mwa isiwa ovitambatundu, na ku eṋe ovihuro mbu mwa tjindwa nu mbu mwa pundwa oviṋa mokunyekererwa i oviwaṋa avihe mbye mu kondoroka.

5 “Ami, ngu mbi ri Muhona Ndjambi, mba hungira moupyu womazenge wandje koviwaṋa mbya kondoroka ozondundu za Israel, nu tjinenenene kOedom. Ovyo vya kambura ehi randje navi huura omaryo waro nondjoroka nonyekera.

6 “Opu mo sokuukira ehi ra Israel; raera ozondundu novivanda nomiramba nomikutu omambo nga ami, ngu mbi ri Muhona Ndjambi, ngu me hungire momazenge na momapindi wandje, mena rokutja oviwaṋa mbi vya yamburura nokunyengura ehi ra Israel. 7 Ami, ngu mbi ri Muhona Ndjambi, tjiri, me yana kutja oviwaṋa mbya kondoroka ozondundu za Israel mavi nyengurwa. 8 Nungwari omiti, mbi ri kozondundu za Israel, mavi hapa omaso rukwao nu avi ku etere ovihape, tjiwaṋa tjandje Israel. Ove mo kotoka konganda tjimanga. 9 Ami meya ku eṋe, nu mbi ri puna eṋe, tjiri, ehi reṋu romakunino mari taurwa rukwao, nozondwi maze kunwa mu ro. 10 Me mu takavarisa rukwao; novihuro mavi turwa, novitambatundu mavi tungururwa. 11 Ami me takavarisa ovandu nozongombe. Mamu rire ovengi pu indu tji mwa ri rutenga nu mamu kara novanatje ovengi. Me mu turisa mo tjimuna indu tji mwa turire rukuru, nu me mu ṋingaparisa komurungu waindu rukuru. Notji mamu tjiwa kutja owami ngu mbi ri Muhona. 12 Ami me mu kotora, tjiwaṋa tjandje Israel, kutja mu yekutura mehi rukwao. Oro mari rire ehi reṋu oveni, nu kamaari zepaisisa ovanatje veṋu kondjara rukwao.

13 “Ami, ngu mbi ri Muhona Ndjambi, me tja nai: Imbwi ouatjiri kutja ovandu ve isana ehi kutja otjiryavandu, nokutja oro ri yeka otjiwaṋa ovanatje vatjo. 14 Nungwari okuzamba oro kari tji nokurira otjiryavandu rukwao, nu kari tji nakumuyeka ovanatje veṋu. Ami, ngu mbi ri Muhona Ndjambi, owami ngu mba hungire. 15 Ehi kari tji nakupuratena koviwaṋa, mbi mavi ri nyekerere, nu kari tji nokumuna ovandu mbu mave ri nyengura. Ehi kari tji nakuyeka otjiwaṋa ovanatje vatjo. Ami, ngu mbi ri Muhona Ndjambi, owami ngu mba hungire.”

Ongarero ombe yOvaisrael

16 Muhona wa hungira ku ami a tja: 17 “Muatje womundu, Ovaisrael tji va turire mehi rawo va yambururire ro nomihingo nozondjito zawo. Ami mba muna kutja omeritjindiro wawo omahakohoke tjimuna omukazendu tje ri komayuva we woukazendu. 18 Ami mbe ve munisa omasa womazenge wandje mena romazepero ngu va tjitire mehi, na mena rovisenginina, mbi va zunḓire na vyo indi ehi. 19 Ami mbe ve vera mena romihingo nozondjito zawo nḓa, nu e ve rimbi momahi wozonganda. 20 Ngamwa ku va ya mokati koviwaṋa va eta ohoṋi kena randje eyapuke, ovandu tjinga ave tja: ‘Ovandu mba va sere okuza mo mehi Muhona wawo oveni nde ve pere.’ 21 Ihi tje ndji kenda mena rokutja Ovaisrael va eta ohoṋi kena randje eyapuke koṋa akuhe kuyave i mokati koviwaṋa.

22 “Nambano, yandja kOvaisrael ombuze, ami ngu mbi ri Muhona Ndjambi, ndji mbi na yo ku wo, itja nai: Imbi mbi me katjita hi nokukevitjita mena reṋu, Vaisrael, nungwari omotjimbe tjena randje, ndi mwa yamburura mehi arihe mu mwa kakara mokati koviwaṋa. 23 Ami tji me raisa ouyapuke wena randje enene koviwaṋa, indi ena, ndi mwa yamburura mokati kavyo, ovyo mavi tjiwa kutja owami ngu mbi ri Muhona Ndjambi ngu mba hungire. Mu imbi mbi me tjiti ku eṋe me raisire oviwaṋa kutja owami omuyapuke. 24 Me mu isa mo motjiwaṋa ngamwa atjihe na mehi arihe, nu me mu kotora mehi reṋu oveni. 25 Ami me pemenene omeva omakohoke kombanda yeṋu, nu e mu kohorora kovisenginina na koviṋa avihe ovikwao mbye mu zunḓa. 26 Me mu pe omitima omipe nomeripuriro omape, nu e isa mo omitima vyeṋu omirangaranga nomikukutu, nu e mu pe omitima ominanḓuviro. 27 Ami me twa ombepo yandje mu eṋe, nu e mu pe omasorero wokutja mu kongorere omazikamisiro wandje nu mu ṱakamise omatwako wandje aehe nokuyetjita. 28 Neṋe mamu tura mehi, ndi mba yandjere kooiho mukururume. Mamu rire otjiwaṋa tjandje, nami me rire Ndjambi weṋu. 29 Ami me mu yama koviṋa avihe, mbi mu zunḓa. Me rakiza ovikokotwa kutja vi takavare kokutja amu ha uhara amamu ṱondjara. 30 Me takavarisa ovihape vyomiti novyomahi weṋu womakunino kokutja amu ha uhara amamu kara ondjara, ndji mai mu yambururisa mokati koviwaṋa. 31 Eṋe mamu zemburuka omeritjindiro weṋu omanaurunde nozondataiziro nḓu mwa tjita, neṋe mamu riyaukisa oveni mena romauvi weṋu nozongatukiro zeṋu. 32 Vaisrael, ami me vanga kutja mu tjiwe kutja ami hi nokutjita oviṋa avihe mbi mena reṋu. Me vanga kutja mu ṱohoṋi nu mu rimune okuyamburuka mena raimbi mbi mu tjita. Ami, ngu mbi ri Muhona Ndjambi, owami ngu mba hungire.”

33 Muhona Ndjambi ma tja nai: “Tji mbe mu kohorora komauvi weṋu aehe, ami me mu turisa movihuro vyeṋu rukwao, nu e mu esa kutja mu tungurure ovitambatundu. 34 Auhe ngwaa ryanga meṋe yovikunino vyeṋu, aa munu tji mwa hapa ozohongwe tjinene, nungwari ami nambano me mu pe ombepo yokutja mu vi ungure rukwao. 35 Auhe ma tja ehi ndi nda ri okuti onguza ra sana kotjikunino tja Eden, novihuro mbya hahaurirwe nokupundwa nokuisiwa omatundu nambano vya turwa nu vya zeuparisiwa. 36 Oviwaṋa vyopopezu mbya hupa po mavi tjiwa kutja ami, ngu mbi ri Muhona, mba tungurura ovihuro omatundu nu mba kuna omahi womakunino nga isirwe ongaango. Ami, ngu mbi ri Muhona, owami ngu mba kwizika kutja me tjiti nai; nu, tjiri, me tjiti.”

37 Muhona Ndjambi ma tja nai: “Ami me yandjere kutja Ovaisrael ve ndji ningire ombatero rukwao, nu meve takavarisa tjimuna orupanda rwozonḓu. 38 Ovihuro nambano mbya rira omatundu mavi urisiwa novature, otja Jerusalem rukuru tji tje urire nozonḓu nḓaa ze punguhwa okurira ozombunguhiro mOmukandi. Novandu otji mave tjiwa kutja owami ngu mbi ri Muhona.”