Ongeṋangeṋeno ya Muhona mai zu mo mondjuwo ya Muhona
1 Ami mba tara kevaverwa nda ri kombanda yovakerubi, nu kwa ri otjiṋa tjaa tji munika otja otjihavero tjouhona tji tja ungurwa pewe rosafir. 2 Ndjambi wa tja nai komurumendu ngwa zarere ombanda oheze: “Kawondje pokati koviryo vyetemba kehi yovakerubi nu u urise omake woye nomakara omapyu nge ri pokati kovakerubi. Kombunda yanao u handjaure omakara nga kombanda yotjihuro.”
Ami mbe mu tarera ama hiti mondjuwo ya Muhona. 3 Ovakerubi va kuramene komukuma wokeyuva kokumuho kwondjuwo ya Muhona eye tja hita, notjikamba tje urisa orupanda rwomoukoto. 4 Ondjerera ongeṋangeṋe ya Ndjambi otji ya yeruruka kombanda okuza kovakerubi nai i komahitiro wondjuwo ya Muhona, norupanda aa ru yerisiwa i ondjerera ongeṋangeṋe ndji. 5 Omapakapakero wovivava vyovakerubi aaye zuvaka, nandarire morupanda indwi rwopendje; iyaye pose otja eraka ra Ndjambi Omunamasaaehe.
6 Muhona tja rakiza komurumendu ngwi ngwa zarere ombanda oheze kutja a toore ko omuriro pokati koviryo vyetemba kehi yovakerubi, omurumendu ngwi arire tja hiti na kakurama potjiryo tjimwe tjaro. 7 Omukerubi umwe wa twa eke re momuriro mbwa ri mokati kawo, a toora omakara tjiva ne ye twa momake womurumendu ngwi wombanda oheze. Omurumendu wa kambura omakara nga na i.
8 Ami mba muna kutja omukerubi auhe peke wa ri notjiṋa tjaa tji munika tjimuna eke romundu kehi yotjivava atjihe tje. 9-10 Ami wina mba muna kutja pa ri oviryo vine, avihe mbya sana; otjiryo tjimwe tja ri meṋe yomukerubi auhe peke. Oviryo mbi aavi keṋakeṋa tjimuna omawe omahuze, notjiryo atjihe wina tja ri aayo tji ri moukoto wotjikwao. 11 Ovakerubi tjaave kayenda, ave i momuhunga ngamwa auhe nokuhinokutanauka. Owo avehe aave kayenda pamwe momuhunga ngamwa auhe mbwaa ve vanga okuyenda nokuhina okuvingurukira komuhunga warwe. 12 Otutu twawo nomatambo nomake novivava noviryo vya twirwe ko omeho okukondoroka. 13 Oviryo mbi vya sanene ku imbi mbi mba munine motjirimunikise tjandje ihi otjitenga.
14 Omukerubi auhe wa ri nomirungu vine. Omurungu omutenga wa ri owondwezu yongombe, outjavari wa ri owomundu, outjatatu wa ri owongeyama, nu imbwi outjaine wa ri owonguvi. 15 Ovakerubi mba va sanene kovinamuinyo mbi mbi mba mwine ponḓonḓu Kebar. Ovakerubi tji va yeruruka kombanda 16 nu tji va ya, oviryo wina vya ya puna wo naruhe tjaave nyaturura ovivava vyawo kutja ve tuke, oviryo wina aavi i puna wo. 17 Ovakerubi tjaave kurama, oviryo wina aavi kurama; ovakerubi tjaave tuka, oviryo wina aavi i puna wo, orondu ombepo yovinamuinyo mbi ya ri moviryo.
18 Tjazumba ongeṋangeṋeno ya Muhona ya zapo pomahitiro wondjuwo ya Muhona nai i kombanda yovakerubi. 19 Owo va nyaturura ovivava vyawo nave tuka okuza pehi ami ngunda ame tarere, noviryo vya ya puna wo, nowo va kakurama pomuvero wokomuhuka wondjuwo ya Muhona, nongeṋangeṋeno ya Ndjambi wa Israel ya ri kombanda yawo. 20 Ami mbe ve zemburuka kutja owo ombe ri ovinamuinyo tjingevyo mbi mbi mba munine kehi yotjihavero tjouhona wa Ndjambi wa Israel ponḓonḓu Kebar.
21 Atjihe tjovinamuinyo mbi tja ri nomirungu vine, novivava vine, notjiṋa tjaa tji munika tjimuna eke romundu nda ri kehi yotjivava atjihe peke. 22 Omirungu vyavyo aavi munika nawanawa tjimuna omirungu mbi mbi mba munine ponḓonḓu Kebar. Otjinamuinyo atjihe aatji kayenda osemba komurungu.
© Herero Revision Bible © Bible Society in Namibia, 2021.
