Omerikotameneno meyuru
1 Kombunda yaimbi ami mba muna omuvero mbwa ri kamwaha meyuru. Neraka nda posire otja ohiva, nu ndi mba zuvire amari hungire ku ami rutenga, ra tjere: “Ronda nguno, nami me ku raisire imbi mbi mavi tjitwa kombunda yanai.” 2 Nu tjimanga Ombepo ya honapara mu ami. Nu meyuru mwa ri otjihavero tjouhona, nu ku tjo kwa haamene omundu. 3 Omurungu we aa u keṋakeṋa otja omawe omahuze omajaspis nomakarneol. Nu kombanda yotjihavero tjouhona kwa ri outa wombura mbwa ri notjivara tjewe esmarag. 4 Nu okukondoroka ihi otjihavero atjihe tjouhona pa ri ovihavero ovikwao vyouhona omirongo vivari na vine, nu ku vyo kwa haamene ovanene omirongo vivari na vane, mba zarere ozombanda ozombapa, nu mba twire ko omakori wouhona wongoldo. 5 Motjihavero tjouhona mwa zire otutjeno twombura notuṱuṱumo nombosiro yomaraka. Nu momurungu watjo iyamu yaka oviyumbu hambombari vyomuriro. Ovyo Ozombepo hambombari za Ndjambi. 6 Nu wina momurungu wotjihavero tjouhona iyamu munika aayo mu nomeva womuronga omanyeṋanyeṋe otja otjiritarero ngaa e yere otja ewe ekristala.
Nu ongondoroka notjihavero tjouhona nu popezu na tjo pa ri oviutwa ovinamuinyo vine mbye urire omeho komurungu na kongotwe. 7 Nu ihi otjinamuinyo otjitenga tja sanene nongeyama, notjitjavari tja sanene nondwezu yongombe, notjitjatatu tja ri nomurungu tjimuna owomundu, notjitjaine tja sanene nonguvi ndji mai tengerere. 8 Otjinamuinyo atjihe peke tjaimbi vine tja ri novivava hamboumwe; novivava mbi vye urire omeho kombanda nokehi. Ovinamuinyo mbi kavi suvire ko okuimbura omutenya nouṱuku amavi tja:
“Omuyapuke, omuyapuke, omuyapuke eye Muhona Ndjambi, Omunamasaaehe,
ngu ri po, nu ngwa ri po, nu ngu meya.”
9 Ovinamuinyo vine mbi vi imbura omaimburiro wondjozikiro nondengero nowokutja okuhepa ku ingwi ngwa haama kotjihavero tjouhona, nu ngu nomuinyo aruhe nga ko nga aruhe. Nu otjikando atjihe tji mavi imbura nao, 10 ovanene mba omirongo vivari na vane ve riwisa pehi komurungu wa ingwi ngwa haama kotjihavero tjouhona, nave rikotamene ku ye ngu nomuinyo aruhe nga ko nga aruhe. Nu imba ovanene ve twa omakori wawo wouhona pehi momurungu wotjihavero tjouhona ave tja:
11 “Muhona, Ndjambi wetu,
ove wa pwirondjozikiro nondengero nomasa;
orondu ove wa uta oviṋa avihe;
novyo avihe vya utwa navi
pewa omuinyo i ombango yoye.”
© Herero Revision Bible © Bible Society in Namibia, 2021.
