Eksodus 6 - Herero Revision Bible (HRR)

Muhona ma isana Moses

1 Rukwao Ndjambi wa hungira ku Moses a tja: “Owami ngu mbi ri Muhona. 2 Owami ngu mbe rimunikisa kooAbraham na Isak na Jakob, ambi ri Ndjambi Omunamasaaehe; nungwari ena randje ndi ‘Muhona’ hi ve tjivisire ko. 3 Nu wina mba zikamisa omerikutiropamwe wandje na wo, okuvepa ehi ra Kanaan, ehi mu va kara otja ovozonganda. 4 Nu ami wina mba zuva ondjuriro yOvaisrael mba ṱizirwa i Ovaengipte mouhuura, nami mbe ripura nomerikutiropamwe wandje na wo. 5 Nopu mo sokukaraera kOvaisrael nai: ‘Owami Muhona, nu me mu kutura koviungura ovizeu vyOvaengipte. Nu me mu yama kouhuura wawo, ne mu kutura nomasa wandje nozombanguriro zomaverero omazeu. 6 Ami me mu isa po otjiwaṋa tjandje, ne rire Ndjambi weṋu. Neṋe mamu rimwine kutja owami Muhona, Ndjambi weṋu, ngu me mu pitisa moviungura ovizeu vyOvaengipte. 7 Ami me mu twara kehi, ndi mba yanena ooAbraham na Isak na Jakob okuvepa. Nami me ri yandja ku eṋe ri rire ouini weṋu, owami, ngu mbi ri Muhona.’ ” 8 Moses otja hungira nai kOvaisrael, nungwari owo kave puratenene ku Moses, tjinga ave rihahiza mena roviungura vyawo ovizeu.

9 Norukwao Muhona wa hungira ku Moses ama tja: 10 “Twende, karaere Farao, ombara ya Engipte kutja a ise Ovaisrael ve tjinde mehi re.”

11 Nungwari Moses wa raera Muhona a tja: “Imba Ovaisrael tji ve hi nakupuratena ku ami, Farao ma puratene vi ku ami ngu mbi hi neraka?”

12 Muhona wa rakiza kooMoses na Aron ne ve hindi nombuze kOvaisrael na ku Farao, ombara ya Engipte, okupitisa Ovaisrael mehi ra Engipte.

Embo rorukwato rwooMoses na Aron

13 Imbi ovyo oviuru vyomaṱunḓu wooMoses na Aron: Ovazandu va Ruben, ngu ri everi ra Israel, va ri: OoHenok na Palu na Hesron na Karmi; owo ombe ri ovanatje va Ruben. 14 Nu imba ovazandu va Simeon va ri: OoJemuel na Jamin na Ohad na Jakin na Sohar na Saul, ngu ri omuzandu womukazendu Omukanaan; owo ombe ri ovanatje va Simeon. 15 Nu inga owo omana wovazandu va Levi otja kozondekurona zawo: OoGerson na Kehat na Merari. Nozombura zoure womuinyo wa Levi za ri esere rimwe nomirongo vitatu na hambombari. 16 Ovazandu va Gerson va ri: OoLibni na Simi otja kozondekurona zawo. 17 Novazandu va Kehat va ri: OoAmram na Jishar na Hebron na Usiel. Nozombura zoure womuinyo wa Kehat za ri esere nomirongo vitatu nandatu. 18 Novazandu va Merari va ri: OoMakli na Musi. Imba ombe ri oveṱunḓu ra Levi otja kozondekurona zawo.

19 Nu Amram wa kupa hongaze Jokebed. Neye we mu pandukira ooAron na Moses. Nozombura zoure womuinyo wa Amram za ri esere nomirongo vitatu na hambombari. 20 Novazandu va Jishar va ri: OoKora na Nefeg na Sikri. 21 Novazandu va Usiel va ri: OoMisael na Elisafan na Sitri.

22 Nu Aron wa kupa Eliseba, omusuko wa Aminadab, omuṱena wa Nakson; neye we mu pandukira ooNadab na Abihu na Eleasar na Itamar. 23 Novazandu va Kora va ri: OoAsir na Elkana na Abiasaf. Imba ombe ri ovanatje va Kora. 24 Nu Eleasar, omuzandu wa Aron, wa kupa omusuko wa Putiel; neye we mu pandukira Pinhas. Avehe mba ombe ri oviuru vyomaṱunḓu wa Levi otja kozondekurona zawo.

25 KooAron na Moses Muhona oka hungira, indu tja tja: “pitiseye Ovaisrael mehi ra Engipte otja kouingi wovimbumba vyawo.” 26 Owo omba hungira puna Farao, ombara ya Engipte, kutja a pitise Ovaisrael mOengipte. Owo ombe ri ooMoses na Aron.

Omarakiza wa Muhona kooMoses na Aron

27 Eyuva Muhona nda hungira ku Moses mehi ra Engipte, 28 Eye wa hungira omambo nga ku ye: “Owami, ngu mbi ri Muhona. Karaere ku Farao, ombara ya Engipte, oviṋa avihe mbi me hungire kove.”

29 Nu Moses arire tja hungire ku Muhona a tja: “Ami hi nomirya. Indu Farao ma puratene ku ami are?”