Isak ma hindi Jakob ku Laban
1 Isak otja isana Jakob ne mu sere ondaya ne mu rakiza a tja: “O kupu omukazendu movasuko vOvakanaan! 2 Rirongera u yende kOmesopotamie kondjuwo ya Betuel, ihe yanyoko; nu kakupe omukazendu umwe wovasuko vongundwoye Laban, omuṱena wanyoko. 3 Ndjambi Omunamasaaehe nge ku sere ondaya, nu nge ku pe orukwato oruingi, nga tji mo karira ihe yomihoko omingi. 4 Nu eye nge ku sere ondaya nozondekurona zoye otja tja sera Abraham ondaya kutja ove u kambure ehi ndi, mu wa tura otja owozonganda nu Ndjambi nda yandja ku Abraham ri rire ouini woye.” 5 Komuhingo mbwi Isak arire tja hindi Jakob kOmesopotamie ku Laban, omuna wa Betuel Omuaramea; Laban wa ri omuṱena wa Rebeka, ina yooJakob na Esau.
Esau ma kupu omukazendu warwe
6 Esau wa tjiwa kutja Isak wa sera Jakob ondaya, nokutja we mu hindi kOmesopotamie, okukakupa omukazendu koṋa ngo; neye wa tjiwa wina kutja Isak, tje mu sere ondaya, we mu rakiza kutja a ha kupu umwe wovakazendu mba Ovakanaan. 7 Neye wa muna kutja Jakob wa zuva kooihe na ina, na i kOmesopotamie. 8 Esau wa tjiwa kutja ihe Isak kaa vanga ovakazendu mba Ovakanaan. 9 Neye otja ya ku Ismael, omuzandu wa Abraham, na kakupira po omukazendu omukwao povakazendu ve, wena Mahalat, omusuko wa Ismael nomuṱena wa Nebajot.
Oruroto rwa Jakob mObetel
10 Jakob wa tjinda okuza mOberseba na i kOharan. 11 Neye weya poṋa porive na kuturire mbo; tjandje eyuva ratoko. Neye wa toora ewe ne ri twa kehi yotjiuru tje, na rara. 12 Neye wa rota kutja ma munu otjirondero tji tja kurama pehi, nohonga yatjo aya katjova meyuru. Novaengeri va Ndjambi aave rondo ku tjo nokuheruka. 13 Nu tara, Muhona wa kurama pu tjo na tja: “Owami Muhona, Ndjambi wa Abraham na Isak. Ehi ndi mu wa rara me ri yandja kove na kozondekurona zoye. 14 Ozondekurona zoye maze ṱeki poruuma rwehi; ozo maze tandavara mehi razo komikuma avihe. Nu move na mozondekurona zoye omihoko avihe, mbi ri kombanda yehi, mavi serwa ondaya. 15 Tara, ami me kara puna ove, nu me ku tjevere akuhe ku mo i. Nu ami me ku kotora mehi ndi, nu himee ku esa nga tji mba yenenisa avihe, mbi mbe ku raera.”
16 Jakob arire tja yanḓimuka mozomboṱu a tja: “Tjiri, Muhona u ri poṋa mba, nami hi tjivirwe.” 17 Jakob wa uruma tjinene na tja: “Tjaa poṋa pe nooma mba, pa tjita vi! Poṋa mba opomaturiro wa Ndjambi, nopomuvero weyuru!”
18 Nomuhuka omunene Jakob wa penduka, neye wa toora ewe ndi ka haverisire otjiuru tje ne ri kengamisa e ri ziki ri rire otjizemburukiro, na tirire ko omaze womiṋinga. 19 Neye wa ruka poṋa mbo Betel, okutja “Ondjuwo ya Ndjambi”. Nungwari indi ena rotjirongo rukuru ra ri Lus. 20 Nu Jakob wa tjita omakwizikiro ku Muhona Ndjambi a tja: “Ndjambi tji ma kara puna ami ne ndji yama mondjira youyenda wandje mbu me tjiti, ne ndji pe ovikurya nozombanda, 21 nami tji mba yaruka nokuhinatjipo konganda ya tate, nu Muhona ma rire Ndjambi wandje. 22 Indi ewe, ndi mba zikamisa otja ewe rotjizemburukiro, oro mari rire ondjuwo ya Ndjambi, nu ami me ku pe nouṱakame ngamwa otjitjamurongo tjaavihe, mbi mo ndji pe.”
© Herero Revision Bible © Bible Society in Namibia, 2021.
