Eksodus 31 - Herero Revision Bible (HRR)

Omahaṋeno woviungura

1 Muhona wa hungira ku Moses a tja: 2 “Tara, ami mba toorora Besalel, omuzandu wa Uri, omuzandu wa Hur, wotjiwaṋa tja Juda. 3 Ami mbe mu urisa nOmbepo ya Ndjambi nounongo nozondunge nondjiviro a yenene koviungura vyounongo ngamwa avihe, 4 okuripura noviungura vyongongo, okuviungura mongoldo na mosilveri na mongoporo; 5 nu wina a tjiwe okuhonga omawe omahuze okuetwa moviungura vyongongo. 6 Nu tara, mbe mu pere po Oholiab, omuzandu wa Ahisamak, wotjiwaṋa tja Dan, okuungura puna ye. Nu ku avehe, mba pewa ounongo, ami mba yandja ko ozondunge kutja owo ve ungure avihe, mbi mba rakiza kove. 7 Nowo mave tungu indji Ondanda yOmahakaeneno, nOtjipwikiro tjOmerikutiropamwe, notjikamo tjatjo na avihe, mbi ri mOndanda, 8 notjiriro noviungurise vyatjo, notjikurameno tjomamunine tjongoldo ongohoke noviungurise vyatjo avihe, notjipunguhiro tjomatwimisiro; 9 wina otjipunguhiro tjozombunguhiro ozoningiririsiwa noviungurise avihe vyatjo, notjiyaha tjomerikohero notjikurameno tjatjo. 10 Rukwao mave tungu ozombanda ozombwa ozomanise nozondjapuke zomupristeri Aron novazandu ve, okukarera na zo moupristeri. 11 Nu mave rungu omaze wokutwirisa, novitwimise vyomiti vyOtjouyapuke. Otja ami pu mbe ku rakiza, nga rire pu va tjiti okuyeneneka.”

Omayapuriro wEsabata

12 Norukwao Muhona wa hungira ku Moses a tja: 13 “Raera kOvaisrael nu itja: ‘Eṋe, tjiri, ṱakamiseye esabata randje, orondu otjo otjiraisiro tjomerikutiropamwe pokati ka ami na eṋe nozondekurona zeṋu, ovandu ve tjiwe kutja owami, ngu mbi ri Muhona, ngu mbe mu yapura. 14 Ṱakamiseye esabata, orondu oro eyapuke ku eṋe. Ingwi ngu hi nokuyapura ro, nga ṱe; orondu ingwi ngu ma tjiti oviungura mu ro, ma kondwa kotjiwaṋa. 15 Oure womayuva hamboumwe mamu yenene okuungura oviungura, nungwari meyuva oritjahambombari ngari rire eyuva rokusuva, tjiri, eyapuke ku Muhona. Auhe ngu ma ungura meyuva ndi rEsabata, tjiri, nga ṱe. 16 Ovaisrael ngave ṱakamise esabata okutjita eyuva ndi ri rire Eyuva enene mozondekurona zawo otja omerikutiropamwe omakarerere. 17 Ihi otjo otjiraisiro otjikarere pokati kandje nOvaisrael; orondu ami, ngu mbi ri Muhona, mba mema eyuru nehi momayuva hamboumwe, nu meyuva oritjahambombari mba yandisa oviungura ne suva.’ ”

18 Nu Muhona tja mana okuhungira ku Moses kondundu Sinai, arire tje mu pe imbi ovitjangero vyomawe vivari vyomatwako, mbya tjangerwe nomunwe wa Ndjambi.