Eksodus 38 - Herero Revision Bible (HRR)

Omaunguriro wotjipunguhiro tjozombunguhiro ozoningiririsiwa

1 Eye wa ungura otjipunguhiro tjozombunguhiro ozoningiririsiwa pomue. Omikuma vine vyatjo vya ṱekire pamwe ozometa mbari nohinga koure na kouparanga, nometa imwe nohinga koutonga. 2 Nozonya zatjo we ze twa kovikoro vine; nozo za ri otjiṋa tjimwe notjipunguhiro na twako ongoporo. 3 Eye we tji ungurira oviungurise avihe vyotjipunguhiro, okutja ovikangero vyokuukira mo omutwe womaze, noviwote, noviyaha, novitwere, novikangero vyomuriro. Oviungurise mbi avihe we vi ungura pongoporo. 4 Nu wina wa twako otutenda twongoporo kotjipunguhiro tu twa pingasanisiwa ne tu twa kehi yomukuro watjo nga mokati kotjipunguhiro. 5 Tjazumba wa hamburira ko ozongoho ine kovikoro vine vyaitwi otutenda tu twa pingasanisiwa, mu mamu hiti ovinḓe vyomatjindiro. 6 Neye wa ungura ovinḓe mbi pomue na twako ongoporo. 7 Tjazumba a hweke ovinḓe mbi mozongoho zotjipunguhiro okutjitjinda na vyo; neye wa tunga otjipunguhiro notutapo komuhingo mbwi kutja moukoto mu kare nomututu.

Omaunguriro wotjiyaha tjomerikohero tjongoporo

(Eks 30:18)

8 Notjiyaha tjomerikohero nombaze yatjo wina we vi ungura pongoporo yoviritarero vyovakazendu mbaa ve ungura pomahitiro wOndanda yOmahakaeneno.

Omaunguriro worumbo rwOndanda yOmahakaeneno

(Eks 27:9-19)

9 Eye wina wa ungura orumbo. Komukuma wokokumuho kweyuva wa twako omarapi omatjizikize, nga ungurwa porupera ndwa tungwa nozosepa ozoheze, zoure wozometa omirongo vine nandano. 10 Wina wa ungura ozongunḓe omirongo vivari, nozombaze zazo omirongo vivari zongoporo; novipa nozongoho zozongunḓe vya ri ovisilveri. 11 Komukuma wokokunene kweyuva eye wa twako omarapi omatjizikize wozometa omirongo vine nandano koure nḓaa ze ṱiziwa i ozongunḓe omirongo vivari nozombaze zazo zongoporo. Ovipa nozongoho zozongunḓe vya ri ovisilveri. 12 Komukuma wokongurova kwa ri omarapi omatjizikize roure wozometa omirongo vivari na mbari, nḓa ṱiziwa i ozongunḓe omurongo nozombaze zazo omurongo; ovipa nozongoho zozongunḓe vya ri ovisilveri. 13 Nu komukuma wokomuhuka kwa ri omarapi omatjizikize wozometa omirongo vivari na mbari kouparanga; 14 nu komukuma umwe womahitiro worumbo kwa ri omarapi omatjizikize wozometa hamboumwe nohinga kouparanga, nozongunḓe ndatu nozombaze zazo ndatu; 15 wina komukuma warwe womahitiro kwa ri omarapi omatjizikize wozometa hamboumwe nohinga kouparanga, nozongunḓe ndatu nozombaze zazo. 16 Omarapi omatjizikize nga aehe, nga kondoroka indwi orumbo, za ri ozorupera ndwa tungwa nozosepa ozoheze. 17 Nozombaze zozongunḓe za ri ozongoporo; novipa nozongoho zozongunḓe vya ri ovisilveri; nu koviuru vyazo kwa tuwa osilveri, nozongunḓe azehe zorumbo za tuwa ko ozongoho zosilveri. 18 Nerapi etjizikize romuvero worumbo ra ri oromarapi wovivaravara, okutja erovazu neserarovazu neserandu pyu, noyorupera ndwa tungwa nozosepa ozoheze. Oro ra ri noure wozometa muvyu, nozometa mbari koutonga tjimuna inga omarapi omatjizikize omakwao worumbo. 19 Owo ya ṱiziwa i ozongunḓe ine nozombaze zazo zongoporo. Novipa noviuru vyazo nozongoho zazo vya ri ovisilveri. 20 Nozomboha azehe zOndana yOmahakaeneno nozorumbo ndwe i kondoroka za ri ozongoporo.

Otjivaro tjovihepwa vyondungiro yOndanda yOmahakaeneno

21 Ihi otji tji ri otjivaro tjovihepwa vyondungiro yOndanda yOmahakaeneno, mu mwa ri ovitjangero vyomawe vyomatwako. Otjivaro hi tja rakiziwa i Moses natji ungurwa i Ovalevi kehi yondyero ya Itamar, omuzandu womupristeri Aron.

22 Nu Besalel, omuzandu wa Uri, ondekurona ya Hur, womuhoko wa Juda, wa ungura atjihe Muhona tja rakiza ku Moses; 23 nomuvatere we wa ri Oholiab, omuzandu wa Ahisamak, womuhoko wa Dan; neye wa ri omuhambure, nomuungure onongo, nomutunge onongo womarapi omarovazu nomaserarovazu nomaserandu pyu, noworupera oruheze.

24 Ongoldo aihe ndja ungurisiwa koviungura vyOtjouyapuke ya ri ongoldo ndja punguhirwa Muhona; noyo ya ri nondjinda mangara ozokirograma eyovi rimwe otja ponḓengu yotjouyapuke. 25 Osilveri ndja yandjewa i imba mba varwa mombongo ya ri nondjinda yozokirograma mangara omayovi yetatu nomasere yane nomirongo vitatu otja ponḓengu yotjouyapuke. 26 Onḓengu ndji i ṱeki pu indji ndja sutwa i ovandu avehe, mbe ritjangisa komavarero; auhe wa suta ihi tji tja vangwa otja ponḓengu yotjouyapuke. Nu pa ri ovarumendu omayovi omasere hamboumwe na yetatu nomasere yetano nomirongo vitano votjiwondo tjozombura omirongo vivari nokomurungu wanao mbe ritjangisa komavarero. 27 Osilveri yondjinda yozokirograma omayovi yetatu nomasere yane ondja ungura inḓa ozombaze esere rimwe zOtjouyapuke nozotutapo, okutja osilveri yondjinda yozokirograma omirongo vitatu nandano kombaze aihe peke. 28 Osilveri yondjinda yozokirograma mangara omirongo vitatu Besalel wa ungura na yo ovipa nozongoho zozongunḓe ne i twa koviuru vyozongunḓe wina. 29 Nu indji ongoporo ndja yandjewa ku Muhona ya ri nondjinda yozokirograma mangara omayovi yevari nomasere yane. 30 Neye ondja ungura na yo ozombaze zozongunḓe zopomahitiro wOndanda yOmahakaeneno notjipunguhiro tjongoporo notutenda twatjo, noviungurise avihe vyotjipunguhiro, 31 na inḓa ozombaze zozongunḓe zorumbo ndwa kondoroka, nozombaze zomuvero warwo, nozomboha azehe zOndanda yOmahakaeneno nozorumbo.