Ovaheberi 9 - Herero Revision Bible (HRR)

Omerikotameneno wokombanda yehi noweyuru

1 Omerikutiropamwe inga omatenga ya ri nomazikamisiro womerikotameneno, nu wina ya ri nopotjouyapuke pu pa tungirwe i ovandu. 2 Nu pa tungirwe Ondanda yOmerikutiropamwe, nu metuwo etenga ndi yari isanewa kutja Otjouyapuke, mwa ri otjikurameno tjomamunine, notjiriro ku kwa ri ozomboroto nde punguhirwa Ndjambi. 3 Kongotwe yerapi etjizikize oritjavari kwa ri etuwo ndi yari isanewa kutja Otjouyapukeyapuke. 4 Mutjo omu mwa ri otjipunguhiro tjongoldo tjomatwimisiro womoro omuwa, nOtjipwikiro tjOmerikutiropamwe tji tja twirwe ko ongoldo atjihe. MOtjipwikiro hi mwa ri ehoro rongoldo mu mwa ri otjimana, nokati ka Aron ku ka nyomokere omaso nokutauka osunda, novitjangero imbi vivari vyomawe mu mwa kororerwe inga omatwako omurongo. 5 Kombanda yOtjipwikiro tjOmerikutiropamwe kwa ri ovakerubi mbaa ve raisa kutja Ndjambi ope ri mbo, nu mba tandavarisire ovivava vyawo kotjikamo tjomahanghanganisiro. Nungwari nambano eṱe katu nakuhepa okuhandjaura otjiṋa atjihe peke.

6 Noviṋa avihe vya ṱuninwe komuhingo mbwi. Eyuva arihe ovapristeri aave hiti metuwo etenga rOndanda yOmerikutiropamwe okukaungura oviungura vyawo. 7 Nungwari Omupristeri Otjiuru porwe ngwaa hiti metuwo ndi romokwara, nu aa tjiti nao rumwe mombura. Eye aa toora ombinḓu ne i punguhirire eye omuini nourunde wovandu mbu ve ha tjitirire wina. 8 Nu monḓunino aihe ndji Ombepo Ondjapuke ma honga kutja ondjira ndji twara kOtjouyapukeyapuke kaiya patururwa, etuwo etenga rOndanda yOmerikutiropamwe ngunda ari ri po. 9 Etuwo ndi otjisanekero tji ma tji raisa oruveze rwanambano. Pu mape hee kutja oviyandjewa nozombunguhiro zovinamuinyo nde punguhirwa Ndjambi, kamaaze sora okupwisa omeritjiviro womomutima waingwi ngu ma tjiti omerikotameneno. 10 Avihe mbi vya tjitirwa ovikurya nomanuwa nomakohororero womihingo pekepeke uriri. Omazikamisiro aehe nga ye ṱuna koviṋa vyopendje porwavyo, nu ya tuwa ko nga koruveze ndwi Ndjambi ndu ma ziki onḓunino ombwa nosemba.

11 Nungwari Kristus weya otja Omupristeri Otjiuru woviṋa oviwa mbi ri po nambano. NOndanda eye me karera mo oyo onene nombwa omanise nosemba; oyo kai ungurirwe nomake wovandu, okutja kayouye mbwi. 12 Kristus tja tuurungira mOndanda a kahite mOtjouyapukeyapuke, ka hitire mu tjo nombinḓu yozongombo noyozondana ondume, nungwari wa hitire rumwe uriri nombinḓu ye omuini ne tu etere onguturiro yaaruhe. 13 Ombinḓu yozongombo noyozondwezu zozongombe nomutwe wongombe ondema aavi pamenenwa kovandu ovahakohoke kokutja owo ve kohororwe kombanda, 14 nu hapo, ombinḓu ya Kristus, tjiri, ya yenena tjinene pupeṱapi okukohorora omitima vyetu na koviungura mbi twara konḓiro, kokutja eṱe tu karere Ndjambi omunamuinyo. MOmbepo ya Ndjambi Kristus we ripunguha omuini ku Ndjambi otja ombunguhiro ohinatjipo.

15 Komuhingo mbwi Kristus opa zokurira omuute womerikutiropamwe omape, kokutja imba mba isanewa i Ndjambi ve mune otjirumatwa tjaaruhe Ndjambi tja kwizika. Ihi matji sora okutjitwa, onḓiro ye tjinga ai kutura ovandu kozongatukiro nḓu va tjitire moruveze rwomerikutiropamwe omatenga.

16 Pe ri otja komazeva womahaṋeno weṱa: Rutenga pe sokuraisiwa kutja ingwi omuini weṱa wa ṱu, 17 orondu inga omazeva womahaṋeno weṱa owo katjiṋa, ingwi omuini weṱa ngunda e nomuinyo; owo kaye ungura eye ngunda e nomuinyo. 18 Omerikutiropamwe omatenga wina opu ye ha zokuzikamisiwa nokuhinombinḓu. 19 Rutenga Moses wa tjivisire kotjiwaṋa inga omazikamisiro aehe nga tjangwa mOmatwako. Tjazumba arire tja toora ombinḓu yozondana ozondume noyozongombo, ne i rungu mumwe nomeva, ne i pemenene kembo rOmatwako ama ungurisa okayao kohisopa nomainya wozonḓu omaserandu, 20 na tja: “Indji oyo ombinḓu yomerikutiropamwe Ndjambi nge mu rakizire okuṱiza.” 21 Nu momuhingo tjingewo Moses wa pamenena ombinḓu kOndanda yOmerikutiropamwe na koviṋa avihe, mbi ungurisiwa momerikotameneno. 22 Nu otja kOmatwako wa Moses oviṋa avihe vi kohororwa nombinḓu otja kOmatwako, nu nokuhinomatirahiro wombinḓu kape tjitwa ondjesiro yourunde.

Kristus eye ombunguhiro yatjiri

23 Novisanekero vyaimbi mbi ri meyuru vya sokukohororwa komuhingo mbwi. Nungwari imbi oviṋa vyomeyuru ovini vi hepa ozombunguhiro ozombwa komeho. 24 Orondu Kristus ka hitire motjouyapuke tji tja ungurwa nomake wovandu, nu tji tji ri otjiserekarera uriri tjaihi otjinitjini. Eye wa hita meyuru orini kutja eye a munikire eṱe komurungu wa Ndjambi. 25 Ingwi Omupristeri Otjiuru wOvajuda u hita mOtjouyapukeyapuke ombura aihe nombinḓu yotjinamuinyo; nungwari Kristus ka hitire mo okukeripunguha omuini potuingi. 26 Nungwari eye atja sokuhihamisiwa potuingi okuza kombutiro youye. Nungwari eye nambano wa munika rumwe na aruhe, komayeneneno wotuveze, okuisapo ourunde mokuripunguha omuini. 27 Omundu u sokuṱa rumwe uriri, nu tjazumba a pangurwa i Ndjambi. 28 Kristus wina otjinga a punguhwa rumwe kutja a ise po ourunde wovengi. Neye tji me riraisa porutjavari ke nokuera okuisapo ourunde, nungwari me ere okueta ondjamo ku imba mbu mave mu undju.