1 “Ko nakupunguhira Muhona, Ndjambi woye, ongombe poo onyanda, ndji notjipo ngamwa atjihe otjivi; otjiṋa hi tjinga atji ri otjiyaukise ku Muhona, Ndjambi woye.
2 “Tjinangara, mu tjimwe tjovirongo vyoye Muhona, Ndjambi woye, tji me ku pe, mamu munika omurumendu poo omukazendu ngu ma tjiti otjiṋa tji tji hi nokutjata ku Muhona, Ndjambi woye, na katuka omerikutiropamwe we, 3 mokukarera oomukuru varwe vovisenginina nokurikotamena ku wo, nangarire keyuva poo komueze poo kotjimbumba atjihe tjozonyose, ami tji mba zerika, 4 notji tjivisiwa, nove o tji zuu, tji konḓonona nawa. Ndoovazu otjiṋa hi tja tjitwa tjiri, otjo otjiyaukise mOisrael. 5 Pitisa omurumendu poo omukazendu ngwi ngwa tjita otjiṋa otjivi hi pendje yotjirongo tjoye, u kemuzepe nomawe. 6 Omupangurwa ngwi nga ṱe, tji pe nomahongononeno wovandu vevari poo vetatu; eye ke nokuyenena okuṱa komahongononeno womundu umwe uriri. 7 Imba ovahongonone nga rire mba tenge po okumuveta nomawe, tjazumba ihi otjiwaṋa atjihe tji mu zepe nomawe. Komuhingo mbwi otji mo isa mo ouvi mokati keṋu.
8 “Nu otjiposa tji tji ri otjizeu kove okutjipangura, kutja otjokuzepa omundu poo otjousemba wouini poo otjokuhihamisa omundu korutu, okutja oviposa avihe movirongo vyoye, rirongera u yende poṋa Muhona, Ndjambi woye, pu me ritoororere. 9 Nu twende kovapristeri Ovalevi na komupangure ngu ri po moruveze ndo, u kevepure; nowo mave ku tjivisa omatyero wombanguriro. 10 Nowo mave ku pe ondyero yawo, nove tjita nawanawa otja pu mave ku raere. 11 Otja komaraerero ngu mave ku raere, nondyero yombanguriro, nga rire pu wa tjiti, nu o yepe mondjira, ndji mave ku tjivisa. 12 Nungwari omundu auhe ngu hi nokukara nonḓuviro komupristeri ngu karera Muhona, Ndjambi woye, poo komupangure, eye nga ṱe. Komuhingo mbwi otji mo isa mo ourunde mOisrael. 13 Notjiwaṋa atjihe matji zuu otjiṋa hi, natji tira natji he ritongamisa nao rukwao.
Ozombara
14 “Nu tji wa kahita mehi Muhona, Ndjambi woye, ndi me ku pe, nu o ri kambura okutura mu ro, no tja nai: ‘Ami me vanga okurizikira ombara tjimuna oviwaṋa mbye ndji kondoroka tji vi tjita,’ 15 rizikira ombara Muhona, Ndjambi woye, ndji me ku toororere; oyo ngai rire imwe yomuhoko woye, nu ai rire oyozonganda. 16 Noyo kai nakusokurirandera oukambe ouingi, nu kai nakusokuhinda otjiwaṋa kOengipte okukerirandera oukambe, Muhona tjinga a tja nai ku eṋe: ‘Eṋe kamaamu sokuyaruka nondjira ndji rukwao.’ 17 Nombara wina kai nokusokukara novakazendu ovengi, omutima wayo kutja au ha poka ku Muhona, nu wina kai nakusokuritumbisa nongoldo nosilveri.
18 “Noyo tji yautu okunana, ngai tjangurure membo inga omatwako wa Ndjambi, nge ri kehi yondjeverero yovapristeri Ovalevi. 19 Embo ndi ngai kare na ro pu yo nokuresa mu ro omayuva aehe ngunda ai nomuinyo kutja i rihonge okutira Muhona, Ndjambi wayo, nokuṱakamisa nouhirona inga omatwako nomazikamisiro aehe nokuyetjita. 20 Ihi matji i tjaere komeripuriro wokutja, oyo ondji ri osemba pOvaisrael ovakwao, nokutja ai ha yepe mondjira yomatwako nga. Noyo nozondekurona zayo mave honaparere Ovaisrael omayuva omengi.
© Herero Revision Bible © Bible Society in Namibia, 2021.
