Omeero kondundu Sinai
1 Momueze outjatatu kombunda yomapitiro wOvaisrael mOengipte meyuva tjingero, owo ve ya mokuti onguza kwa Sinai. 2 Owo va womboroka mOrefidim nave kavaza mokuti onguza kwa Sinai, nave tungu ozondanda mokuti onguza, ouhunga nondundu. 3 Nu Moses wa ronda kondundu okukahakaena na Ndjambi.
Nu Muhona we mu isanena okuza kondundu ne mu raere kutja a katje nai kOvaisrael, inḓa ozondekurona za Jakob: 4 “Eṋe oveni mwa muna imbi mbi mba tjita kOvaengipte, na tji mbe mu tjinda tjimuna onguvi, ndji mai tjindi ounguvyona wayo kombanda yovivava vyayo, ne mu eta ku ami. 5 Nambano tji mamu puratene tjiri keraka randje namu ṱakamisa omerikutiropamwe wandje, mamu rire ouini wandje mokati koviwaṋa avihe; orondu ouye auhe owandje. 6 Neṋe mamu rire ouhona mbu mau ndji karere otja ovapristeri, otjiwaṋa otjiyapuke ku ami erike.”
7 Nu Moses wa ya na isana ovanane votjiwaṋa ne ve tjivisa omambo nga aehe Muhona nge mu raere. 8 Nu ihi otjiwaṋa atjihe otji tja zira embo rimwe kumwe, atji tja: “Avihe, Muhona mbye tu raera, matu vi tjiti.” Nu Moses wa yarura omambo nga otjiwaṋa ngu tja zira ku Muhona.
9 Nu Muhona wa hungira ku Moses a tja: “Tara, ami meya kove motjikamba otjizorondu kutja otjiwaṋa tji zuve, ami tji me hungire puna ove, nowo ve kambure move aruhe wina.” Moses wa yarura omambo otjiwaṋa ngu tja zira ku Muhona.
10 Nu Muhona wa hungira ku Moses na tja: “Twende kotjiwaṋa nu ketjitjivise kutja tji riyapure ndino na muhuka, ngave kohe ozombanda zawo, 11 nu ngave rirongerere muhuka yandina. Meyuva ndo Muhona ma rauka kondundu Sinai momeho wotjiwaṋa atjihe. 12 Nu zikira otjiwaṋa omuruko okukondoroka indji ondundu, nu u ve raera nai: ‘Ṱakamiseye kutja amu ha rondo kondundu, nandarire okuṱuna kehi yayo; orondu auhe ngwa ṱunu kondundu ndji, ma ṱu. 13 Kape neke ndi mari ṱunu ku yo. Nungwari auhe ngu ma tjiti nao nga ṱe nomawe poo nga yahwe noviku; nangarire omundu poo otjinamuinyo katji nokukara nomuinyo.’ Onya yondwezu yonḓu tji ya posisiwa orure, ovandu otji mave rondo kondundu.”
14 Moses otja heruka kondundu, ne ya kotjiwaṋa na raere kutja tji riyapure. Nowo otji va koha ozombanda zawo. 15 Nu Moses wa tja kotjiwaṋa: “Rirongereye nga komuhuka wandina; ape ningi umwe ngu ma hakaene nomukazendu.”
16 Nu meyuva oritjatatu, tji pa tja, pa kara otuṱuṱumo notutjeno, notjikamba otjizorondu kombanda yondundu. Nu wina pa kara ombosiro onamasa yohiva nga otjiwaṋa atjihe tji tja ri mozondanda tji tja zezera. 17 Moses otja pitisa otjiwaṋa mozondanda okukahakaena na Ndjambi, notjo tja kakurama meṋe yondundu. 18 Nu indji ondundu Sinai aihe ya twima omuise, orondu Muhona wa rauka kombanda yayo momuriro, nomuise wa yeruruka meyuru tjimuna omuise wezuko, nondundu aihe ya nyingayinga tjinene. 19 Nombosiro yohiva ya posira ko nomasa. Nu Moses wa hungira, nu Ndjambi we mu zira neraka romasa. 20 Muhona ngunda ama rauka kondundu Sinai, eye otja isanena Moses kondomba yondundu. Nu Moses wa ronda. 21 Nu Muhona wa tja ku Moses: “Heruka, karonge otjiwaṋa kutja atji ha roro okukonda omuruko okundjimuna. Tjapo ovengi vawo mave ṱu. 22 Nangarire ovapristeri, mba iririra okuya popezu na Muhona ngave riyapure kutja Muhona e he ve vere.”
23 Moses otja zira ku Muhona a tja: “Otjiwaṋa katji nokuyenena okuronda kondundu Sinai; orondu, Muhona, ove omuini we tu rakiza kutja tu zike omuruko kondundu kokutja tu i yapure.”
24 Muhona opa tjera ku Moses: “Punda pehi, nu u kaeterere Aron. Nungwari imba ovapristeri na ihi otjiwaṋa ave roro okukonda omuruko okuya ku ami, tjapo ami ngee ve vere.” 25 Moses otja punda pehi kotjiwaṋa ne ketjiraera.
© Herero Revision Bible © Bible Society in Namibia, 2021.
