Numeri 35 - Herero Revision Bible (HRR)

Ovihuro mbya yandjewa kOvalevi

1 Nu Muhona wa hungira ku Moses motutjandja twa Moab, munda mbwina na Jordan, omuhunga wa Jeriko, na tja: 2 “Raera kOvaisrael ve yandje ovihuro okuza motjirumatwa tjawo kOvalevi, wina indi ehi romaryo nda kondoroka ovihuro vyawo. 3 Ovihuro mbi ngavi rire vyomaturiro wawo; indi ehi romaryo ngari rire orovinamuinyo vyawo avihe. 4 Indi ehi romaryo mari tandavara okuza kotumbo twovihuro oure wozometa mangara omasere yetano kominda avihe. 5 Kominda avihe vine vyotjihuro ngave nane mo omuruko woure wozometa mangara eyovi rimwe; nu ihi otjihuro otjini ngatji kare mokati. Indi ngari rire ehi romaryo movihuro. 6 Movihuro mbi mbi mamu yandja kOvalevi, ngamu kare ovihuro hamboumwe vyomaundiro ku maku taurire ngamwa auhe ngwa zeperere omundu; nu ku imbyo wezeye ko ovihuro omirongo vine na vivari. 7 Ovihuro avihe kumwe mbi mamu yandja kOvalevi ngavi rire omirongo vine na hambondatu puna omaryo wavyo. 8 Ihi otjivaro tjovihuro, mbi mavi yandjewa kOvalevi momuhoko auhe, ngatji zikamisiwe otja kounene wehi romuhoko auhe.”

Ovihuro vyomaundiro

(Deu 19:1-13Jos 20:1-9)

9 Norukwao Muhona wa hungira ku Moses a tja: 10 “Raera kOvaisrael nu itja nai ku wo: ‘Tji mwa kakonda Jordan namu kahita mehi ra Kanaan, 11 keritoororereye ovihuro, mbi mavi rire ovihuro vyomaundiro, nu ku maku taurire ngamwa auhe ngwa zeperere omundu. 12 Ovyo mavi rire ovihuro ku mamu taurire ku ingwi omusutise wombinḓu, kokutja ngamwa auhe ngwa zeperere omundu a ha ṱu, ngunda e hiya kurama komurungu wombanguriro yombongo. 13 Novihuro mbi, mbi mamu yandja kOvalevi nga rire ovihuro hamboumwe vyomaundiro. 14 Yandjeye ovihuro vitatu komukuma wokomuhuka wa Jordan, na vitatu ovikwao mehi ra Kanaan. 15 Ovihuro mbi hamboumwe ngavi rire ovyomaundiro kOvaisrael na kovozonganda, na ku ingwi ngwa tura mokati kawo kutja auhe ngwa zeperere omundu a taurire ko.

16 “ ‘Omundu tja tono omukwao notjitenda nga tja koka, okutja eye omuzepe; nomuzepe ngwi, tjiri, nga ṱe. 17 Nu tje mu tono newe nga tja koka, okutja eye omuzepe; nomuzepe ngwi, tjiri, nga ṱe. 18 Nu tje mu tono notjiti nga tja koka, okutja eye omuzepe; nomuzepe ngwi, tjiri, nga ṱe. 19 Nu ingwi omuzamumwe wopopezu ngu ri omusutise wombinḓu nga zepe ingwi omuzepe tje mu munu.

20 “ ‘Nomundu worive tja humisa omukwao, ne mu vanda pehi poo e mu vete notjiṋa, 21 poo e mu tono nongomi nga tja koka, ingwi omutone, tjiri, nga ṱe; eye omuzepe. Nomusutise wombinḓu tje mu munu nge mu zepe.

22 “ ‘Nungwari ngatu tje, omundu worive wa zeperere omukwao ngwe ha humisire, kutja we mu vanda pehi poo we mu vete notjiṋa. 23 Poo ngatu tje, eye wa yumbu ewe nokuhinakutara, noro ari vete omukwao ngunda ave ha ri novita kumwe, na koka. 24 Oviṋa otja imbi ombongo aihe ngai pangure pokati kaingwi omuzepe na ingwi omusutise wombinḓu. 25 Ombongo ngai yame ingwi omuzepe komake womusutise wombinḓu, noyo ngai mu ese a yaruke kotjihuro tjawo tjomaundiro kataurira; neye nga kakare mu tjo, nga ingwi Omupristeri Otjiuru tja koka. 26 Nu ingwi omuzepe tja zu motjihuro tjawo tjomaundiro kataurira, 27 nomusutise wombinḓu e mu munu ne mu zepa, ingwi omusutise wombinḓu ke nokutura ondjo yokutirahi ombinḓu. 28 Omuzepe nga kare motjihuro tjawo tjomaundiro nga ingwi Omupristeri Otjiuru tja koka; nungwari kombunda yanao eye ma yenene okuyaruka konganda ye. 29 Owo ngaye rire omazikamisiro womatwako ku eṋe na kozondekurona zeṋu momaturiro weṋu aehe.

30 “ ‘Omundu worive tja zepa omukwao, ingwi omuzepe nga ṱe otja komahongonona wovandu vevari poo vetatu; nungwari omahongonona womundu umwe uriri kaye nokuyenena okumuzepaisa. 31 Eṋe amu kambura ko otjimariva momuinyo waingwi omuzepe ngu nondjo yokuṱa; eye tjiri nga ṱe. 32 Amu yandjere ko omundu ngwa taurira kotjihuro tjomaundiro a sute otjimariva kutja a yaruke konganda ye, Omupristeri Otjiuru ngunda e hiya koka. 33 Tji mwa tjiti nai, mamu yamburura ehi ndi mu mwa tura. Omazepero ye yamburura ehi, nu kape nomuhingo wokutjita ombunguhiro yomakohororero kehi mu mwa ṱira omundu posi yainga omatirahiro wombinḓu yomuzepe porwe. 34 Amu yamburura ehi mu mwa tura, orondu ami owami Muhona, ngu mbi tura mu ro mokati kOvaisrael.’ ”