Oruveze rwomaandero
1 Omuengeri ngwa zarere ozombanda zotupera wa tja nai: “Moruveze ndo omuengeri ohivirikwa Mikael ngu yama otjiwaṋa tjoye ma horoka. Nu mape kara oruveze rwomaumba, oruveze oruvi tjinene ndu ha ri po okuza koviwaṋa tji vya utirwe korutenga. Oruveze ndo tji rweya, ovandu avehe votjiwaṋa tjoye vomana, nga tjangwa mEmbo ra Ndjambi, mave yamwa. 2 Ovengi vaimba mba ṱa rukuru mave kara nomuinyo rukwao; tjiva mave kara nenyando momuinyo waaruhe, nu tjiva mave hihamisiwa mohoṋi nga aruhe. 3 Ovanane ozonongo mave keṋakeṋa tjimuna ondjerera yevaverwa. Nu imba mba honga ovandu ovengi okutjita ousemba mave yere otja ozonyose nga aruhe.”
4 Eye wa tja nai ku ami: “nambano, Daniel, pata indi Embo, nu u twe ko erose nga ouye tji mau kayanda. Ovandu ovengi mave kondjo omungandjo amave vanga okutjiwa imbi mbi mavi tjitwa.”
5 Nami mba muna ovarumendu vevari ava kurama ponḓonḓu, umwe komukuro womunda auhe. 6 Umwe wawo wa pura komuengeri ngwa kuramene munda mbwina yonḓonḓu a tja: “Ma rire oure mbu ṱeki pi oviṋa mbi ovihimise tji mavi yanda?”
7 Omuengeri wa yera omake ayeyevari keyuru na tjiti omakwizikiro omanene mena ra Ndjambi waaruhe. Ami mbe mu zuva ama tja: “Ma rire ozombura ndatu nohinga. Ondatumisire yotjiwaṋa tja Ndjambi tji ya yanda, oviṋa mbi avihe otji mavi tjitwa.”
8 Ami mba zuva imbi eye mbya hungira, nungwari hivi tjivirwe ko. Opu mba purira nai: “Muhona, oviṋa avihe mbi mavi yanda vi?”
9 Eye wa zira a tja: “Nambano twende, Daniel, orondu omambo nga maye ṱakamisiwa otja oviundikwa nu mohorekera nga oruveze rwomaandero tji rweya. 10 Ovandu ovengi mave kohororwa nave yepaerisiwa. Imba ovanauvi kamaave zuu, nungwari mave panḓere pouvi; posi yaimba porwe mbe ri ozonongo ombu mave zuu.
11 “Okuza koruveze ndwi ozombunguhiro zeyuva arihe tji maze tjaerwa, okutja okuza koruveze ndwi rwOtjiyaukise Otjitirise, mape kapita omayuva 1,290. 12 Ovaṋingandu imba mbu mave ṱakama nga omayuva 1,335 tji ya kapita!
13 “Nu ove, Daniel, rira omuṱakame nga komaandero nu mo kasuva, nungwari komaandero woruveze ove mo penduka okukambura otjirumatwa tjoye.”
© Herero Revision Bible © Bible Society in Namibia, 2021.
