Amos 5 - Herero Revision Bible (HRR)

Eimburiro romutambo kOvaisrael

1 Purateneye, tjiwaṋa tja Israel, kembo ndi me imburire eṋe otja eimburiro roruhoze:

2 Omusuko Israel wa wire pehi

nokuhinokupenduka rukwao!

Eye wa saravara pehi

nokuhinomundu ngu me mu vatere okusekama.

3 Muhona Ndjambi ma tja nai: “Otjihuro mOisrael tji matji hindi ovarwe eyovi rimwe matji sewa nesere rimwe uriri; nu ihi tji matji hindi esere rimwe matji sewa nomurongo uriri.”

4 Muhona ma tja nai kOvaisrael: “Indjeye ku ami nu mamu hupu! 5 Amu paha Betel, nu amu i kOgilgal, amu tjindire kOberseba, Gilgal tjinga ama tji huurwa na Betel ama tji karira pouriri.”

6 Paheye Muhona nu mamu hupu! Tji mu hi nokutjita nao, eye ma raukire kotjiwaṋa tja Israel otja omuriro nu e tji seseta nokuhinaumwe mObetel ngu ma sora okuuzemisa. 7 Owee ku imba mbe tjitukisa ousemba au rire ouhasemba nave yata ousemba nozombaze!

8 Muhona ongwa mema ozonyose,

Otjose na Kanwamaihi.

Eye u tjitukisa

onḓorera okurira ondjerera yeyuva

nondjerera yeyuva okurira onḓorera.

Eye u woronganisa omeva wokuvare

ne ye tirire kombanda yehi.

Ena re o Muhona.

9 Eye u yandeka omunamasa

na nyono oviṱunga ovinamasa vyawo.

10 Eṋe mu humisa omundu ngu kuramena ousemba, nu mu tonda ingwi ngu hungira ouatjiri mombanguriro. 11 Eṋe tjinga amwa ṋiṋikiza omusyona namu kambura otjisuta tjovikokotwa ku ye, otjinga amamu tungu ozondjuwo ozombwa zomawe, nungwari kamu nokutura ko mu zo; mamu kunu ovikunino oviwa vyomivite, nungwari kamaamu kanwa ko omavinu wavyo. 12 Ami me tjiwa kutja ozongatukiro zeṋu za takavara, nokutja omauvi weṋu omanene tjinene. Eṋe mu tatumisa ovasemba, mu kambura ovisuta vyongarera, nu mu pikamisa ouatjiri wovasyona komurungu wombanguriro. 13 Omunazondunge opu ma zu okumwina moruveze ndwi, orwo tjinga aru ri oruvi tjinene.

14 Paheye ouwa nu amu paha ko ouvi kutja mu kare nomuinyo. Muhona Ndjambi Omunamasaaehe, tjiri, ma kara puna eṋe otja tji mu heya aruhe. 15 Tondeye ouvi mu suvere ouwa nu mu ṱakamise ousemba mombanguriro. Ngahino Muhona ma tjariparere ovandu vomuhoko wa Josef mba sewa po.

16 Nu Muhona Ndjambi Omunamasaaehe otji ma tja nai: “Momivanda avihe vyotjihuro mamu kara omutambo, mozondjira azehe zomotjihuro mamu urakanwa nai: ‘Owee, owee!’ Omuungure wotutumbo novikunwa ma kaisanewa okuya koruhoze rwovaṱi puna imba ovasore vomiṱanḓu mba sutwa okutjita okutangununa omutambo. 17 Nu mamu kara ondjuriro movikunino avihe vyomivite ami tji meya okumuvera.” Muhona ongwa hungire.

18 Owee ku imba mbe rizerira Eyuva ra Muhona! Eyuva ra Muhona ndo hapo mari rire tjike ku eṋe? Oro mari rire eyuva ronḓorera nu ka rondjerera. 19 Eyuva ndo, mari sana nomundu ngwa syepo ongeyama na hakaene nongu, poo mari sana nomundu ngu ri ponganda na ṱaṱere neke re kekuma rondjuwo na rumatwa i onyoka. 20 Tjiri, eyuva ra Muhona mari eta onḓorera nu kari nokueta ondjerera. Oro mari kara neṱuku nu kari nokukara nondjerera.

21 Muhona ma tja nai: “Ami mba tonda omikandi vyeṋu, ovyo vi ndji yaukisa. Hi norutjato mozombongarero zeṋu zomayuva ngo. 22 Eṋe tji mamu ndji etere ozombunguhiro ozoningiririsiwa nozovikurya, ami hi nokuzeyakura ko. Nozombunguhiro zovinamuinyo mbya ṋunisiwa wina hi nokuzeyakura ko. 23 Iseye ondokohero yomiimbo vyeṋu! Nombosiro yovihumba vyeṋu hi vanga okuizuva. 24 Tjinenenene amu isa okutjita ousemba otja onḓonḓu ndji ha isa okupupa nu aruhe tjiteye ihi tji tjiri otjisemba otja onḓonḓu ndji pupa aruhe.

25 “Tjiwaṋa tja Israel, ozombura nḓa omirongo vine nḓu mwa kara mokuti onguza, ami hi na indu mba vangere kutja mu ndji etere oviyandjewa nozombunguhiro. 26 Nungwari nambano, eṋe mu rikotamena kotjiserekarera tjotjisenginina Sakut, omukuru weṋu ombara, notja Kewan, omukuru weṋu wonyose, mbi mwe riungurira oveni. 27 Ami otji me mu twara mouhuura kehi, ndi ri munda mbwina na Damaskus.” Muhona, ngu nena Ndjambi Omunamasaaehe, ongwa tja nao.