1 Embo ndi rina ombuze ohunga na Juda na Jerusalem Ndjambi ndja vandurura ku Jesaja, omuzandu wa Amos, momayuva wa Usija na Jotam na Ahas na Hiskija, inḓa ozombara za Juda.
Ndjambi ma tena otjiwaṋa tje
2 Zuveye, mayuru, nu purateneye, mahi, orondu Muhona ma tja nai: “Ami mba kora ovanatje, nu mbe ve kurisa, nungwari owo ve ndji pirukira. 3 Ongombe i tjiwa omuini wayo, nokasino ke tjiwa etemba mu ke rira romuhona wako, nungwari otjiwaṋa tjandje Israel katji na tji matji tjiwa, otjo katji nozondunge.”
4 Owee ku eṋe, muhoko omunauvi, otjiwaṋa tji tja haverwa i omauvi, ondekurona yovatjite vourunde, ovanatje ovazunḓake! Eṋe mwa poka ku Muhona, mwa imbirahi Omuyapuke wa Israel nu mwe mu pa etambo. 5 Ngamu tonwe pi, tji mamu kara pokupoka ku Muhona nai? Oviuru vyeṋu vya usuka novirwaro, nomitima vyeṋu vya vera. 6 Okuza kotjiuru nga kombaze kape nopoṋa opaveruke motutu tweṋu. Eṋe mwe ura novitumba nomisuro nomazeze. Ovirwaro vyeṋu kaviya kohoka, kaviya mangwa nu kaviya tirirwa omaze.
7 Ehi reṋu ra rira ongaango, ovihuro vyeṋu vya nyosiwa nomuriro, ovozonganda mave kambura ehi reṋu romakunino amamu tarere nave nyono oviṋa avihe. 8 Omusuko wa Sion erike, okutja Jerusalem, otji tja sewa po tjimuna ondanda yomutjevere motjikunino tjomivite, tjimuna otjitara motjikunino tjomakungu, tjimuna otjihuro tji tja koverwa. 9 Andakuzu Muhona Omunamasaaehe ka hupisire ovandu tjiva, Jerusalem itjatji nyonwa oparukaze tjimuna Sodom na Gomora tji vya ri.
10 Zuveye embo ra Muhona, vanane va Sodom! Purateneye komatwako wa Ndjambi wetu, tjiwaṋa tja Gomora! 11 Muhona ma tja nai: “Mamu tjangovasi ami mbi na ko na tja nozombunguhiro zeṋu nḓu mu kara pokundjipunguhira are? Ami mba ṱonḓi yozombunguhiro ozoningiririsiwa zozondwezu zozonḓu noyozonḓura zozondana nḓa ṋunisiwa; nami hi nonyuṋe mombinḓu yozondwezu zozongombe noyozondjona noyozongombo. 12 Owaṋi ngwe mu ningira okundji etera oviṋa mbi avihe, tji mamu yekurikotamena ku ami? Owaṋi ngwe mu ningira okutombatomba apehe mondjuwo yandje? 13 Amu uhara amamu eta ozombunguhiro zakaseruseru rukwao; omuise wazo u ndji yaukisa. Omikandi vyeṋu vyOmatendameno wOmueze nowOmasabata nowomaworonganeno weṋu omayapuke hi tji nonyuṋe mu wo, owo aehe tjinga aya zunḓiwa i omauvi weṋu! 14 Ami mba tonda omikandi vyeṋu vyOmatendameno wOmueze, nomayuva weṋu omayapuke; owo omutwaro mbu mba urwa okutjinda.
15 “Tji mamu yere omake weṋu mokukumba, ami hi nokutara ko ku eṋe. Nandi mwa kumbu tjinene pu pe ṱeki pi, ami hi nakupuratena ko, omake weṋu tjinga aye ura nombinḓu. 16 Rikoheye, rikohororeye nawa! Iseye ko ozondjito zouvi weṋu komurungu wandje; amu tjiti ouvi rukwao. 17 Rihongeye okutjita ouwa, paheye ousemba! Vatereye ovaṋiṋikiziwa, tjiteye ousemba kozosewa, karereye kovahepundu moviposa vyawo!”
18 Muhona ma tja nai: “Nambano indjeye tu tye otjiposa tjetu! Ourunde weṋu nandi u ri ouserandu pyu, ami me u yepaereke okurira ouvapa twee tjimuna ovitutukende; nandi wa seraera otja ombinḓu mau rire ouvapa twee tjimuna ohore. 19 Tji mwa kara uri nonḓuviro ku ami, mamu ri imbi oviwa, mbi mavi hapa mehi. 20 Nungwari eṋe tji mamu panḓa namu ndji pirukire, mamu ṱengaruvyo. Tjiri, ami ngu mbi ri Muhona, mba hungire.”
Otjihuro otjirunde
21 Otjihuro tji tja ri otjiṱakame, nambano tja rira otjikorondu. Mu tjo mwa ri ousemba porwe, nu mwa turire ovasemba; nungwari nambano tja rira otjovazepe. 22 Jerusalem, ove wa ri otja osilveri, nambano oove otjiporoporo; ove wa ri otja omavinu omawa, nambano oove omeva uriri. 23 Ovanane voye owo ovapirukire nu ve tjita oupanga nomarunga; aruhe ve kambura oviyandjewa noviṋa vyombopero. Owo kave karere kozosewa mombanguriro, nu kave puratene kovahepundu tji mave eta oviposa vyawo.
24 Nambano otji mamu sokupuratena ku imbi Muhona Omunamasaaehe, Ndjambi omunauvara wa Israel, mbi ma hungire: “Ami me yarura omazenge wandje mu eṋe mbu mu ri ovanavita na ami, nu eṋe amu he ndji etere oumba rukwao. 25 Ami me mu rwisa. Me mu kohorora otja otjitenda tji tji zuzurwa momuriro, nu me isa mo ouhakohoke weṋu auhe. 26 Me mu pe ovanane novayandjandunge tjimuna imba mbu mwa ri na wo rukuru. Jerusalem otji matji isanewa kutja Otjihuro tjOusemba nOtjiṱunga Otjiṱakame.”
27 Muhona tjinga e ri omusemba, eye ma yama Jerusalem na ngamwa auhe ngu ri mu tjo ngwe ritanaura. 28 Nungwari eye ma nyanyaura auhe ngu ma tjiti ourunde, nu ngu me mu pirukire; eye ma zepa ngamwa auhe ngu me mu imbirahi.
29 Eṋe mamu ṱohoṋi kutja mwe rikotamena komimborombonga, nokutja mwa kuna ovikunino ovizere. 30 Eṋe mamu sana komumborombonga womaso nga kukuta, na kotjikunino tji tji ha tjatjwa. 31 Otja otjihozu punga atji kamburisiwa i ohanḓe, ovarumendu ovanamasa opunga amave nyonwa i ozondjito zomauvi wawo oveni; nu kape na ngu ma yenene okutjaera inga omanyoneno.
© Herero Revision Bible © Bible Society in Namibia, 2021.
