David ma huura otjihuro Raba
(2Sam 12:26-31)1 Moruteṋi rwombura ndjo, oruveze ozombara hapo ndu ve yenda kovita, Joab wa hongorera otjimbumba tjovita na karwisa Ovaamoni. Neye notjimbumba tje tjovita va kovera na rwisa otjihuro Raba. Nungwari ombara David wa kara mOjerusalem. Joab wa rwisa otjihuro Raba ne tji nyono. 2 Ovaamoni vari notjiserekarera tjomukuru wotjisenginina Milkom tji tja ri nekori rongoldo nda ri nondjinda yozokirograma mangara omirongo vitatu na ine. Mu ro mwa ri ewe ehuze, David nda toora ne ri zara mekori re. Eye wina wa toora ovihuurwa ovingi motjihuro. 3 Eye wa toora ovature votjihuro ne ve ungurisa novikonde vyomiti nomatemo nomakuva. Wina wa tjita omuhingo tjingewo kovandu vovirongo vyare vyOvaamoni. Tjazumba eye novarumendu ve otji va kotoka kOjerusalem.
Ovirwa kuna ovarenaka vOvafilisti
(2Sam 21:15-22)4 Kombunda yanao pa sekama ovita rukwao kuna Ovafilisti mOgeser. Ovita mbi vya sekama, indu Sibekai, Omuhusati, tja zepa omurenaka wena Sipai; nOvafilisti va havererwe.
5 Pa ri otjirwa tjarwe kuna Ovafilisti, nu Elhanan, omuzandu wa Jair, wa zepa Lakmi, omuangu wa Goliat, ngwa zire kotjihuro Gat, nu ngwa ri nenga nda ri nomupiṋe tjimuna otjiti tjotjikweyero tjomuwoze.
6 Pa ri otjirwa tjarwe mOgat mu mwa ri omurenaka ngwa ri nominwe hamboumwe keke arihe na kombaze aihe. Eye wina wa ri ondekurona yovarenaka ovakuru. 7 Eye wa tanda Ovaisrael, nu Jonatan, omuzandu werumbi ra David wena Sima, otje mu zepa.
8 Imba ovetatu mba ṱa i David novarumendu vevari ozondekurona zovarenaka mba turire mOgat.
© Herero Revision Bible © Bible Society in Namibia, 2021.
