1 Josafat wa koka na pakwa momaendo wozombara mOtjihuro tja David, nomuzandu we Jehoram we mu pingena mouhona.
Jehoram ma rire ombara mOjuda
(2Ozo 8:17-24)2 Jehoram, omuzandu wa Josafat, wa ri novangu hamboumwe mba: OoAsarja na Jehiel na Sakaria na Asarja na Mikael na Sefatia. Avehe mba va ri ovanatje va Josafat, ombara ya Juda. 3 Ihe we ve pa ongoldo nosilveri onyingi, novihuze vyarwe ovinanḓengu puna imbi ovihuro vya Juda mbya zeuparisiwa. Nungwari Jehoram tjinga a ri erumbi, Josafat we mu urika okurira omupingene we. 4 Jehoram tja za nokukakatera kouhona wa ihe nokuzikamisa ouhona we omuini nomasa, otja zepa ovangu ve avehe, novahongore tjiva va Israel wina.
5 Jehoram wa rira ombara e notjiwondo tjozombura omirongo vitatu na mbari; eye wa honapara mOjerusalem oure wozombura hambondatu. 6 Eye wa horera kotjikaro tjourunde wombara Ahab nowozombara zarwe za Israel, tjinga a kupire omusuko wa Ahab, nu wa tura ondjo komurungu wa Muhona. 7 Nungwari Muhona ka vangere okunyona ouhona wa David, eye tjinga a tjitire omerikutiropamwe na David na kwizikire kutja ozondekurona za David maze karerere mouhona nga aruhe.
8 Jehoram ngunda a ri ombara, Ovaedom va sekamena Ovajuda nave rizikire ombara yawo oveni. 9 Jehoram novahongore ve va sekama nomatemba wawo wovita nave karwisa Edom. Notjimbumba tjOvaedom tjovita tja kovera Ovajuda, nungwari mokati kouṱuku Ovajuda va kondja okutaura nave hene. 10 Okuzambo ehi ra Edom otji ra kutuka ku indi ra Juda nga ku ndinondi. Moruveze tjingero ndo, otjihuro Libna wina tja sekamena Jehoram, eye tjinga a poka ku Muhona, Ndjambi wooihe mukururume. 11 Eye wina wa tunga poṋa pomerikotameneno kovisenginina kozondunda za Juda, na turisa ovandu va Juda nova Jerusalem ondjo komurungu wa Muhona.
12 Omuprofete Elia wa hindira Jehoram orutuu, ndu maru tja nai: “Muhona, Ndjambi waiho mukururume David, me ku vere, ove tjinga au ha horerere kotjikaro tjaiho Josafat poo ihi tja Asa, ombara ya Juda. 13 Moruveze rwanao, ove wa horera kotjikaro tjozombara za Israel, nu wa twa ovature va Juda nova Jerusalem mokuhinakuṱakama mu Ndjambi tjimuna Ahab novemupingene tji va tjitire. Ove wina wa zepa ovangu voye, mba ri ovarumendu ovasemba pove. 14 Komuhingo mbwi Muhona otji ma vere ovandu voye tjinene, novanatje novakazendu voye, nu ma nyono ouini woye wina. 15 Ove omuini mo vere omutjise omuhihamise, okutja omutjise woura mbu mau ririre ko omuvi eyuva arihe.”
16 Ovafilisti nOvaaraba tjiva va turire popezu nopoṋa pu pa turire Ovaetiopi, komukuro wokuvare. Muhona we ve tjita kutja ve hinge ovita kuna Jehoram. 17 Owo va rwisa Juda, ave huura oviṋa avihe vyondjuwo youhona nave twara ovakazendu novanatje avehe vombara mouhuura posi ya Ahasia ingwi ongero.
18 Tjazumba kombunda yaavihe mbi, Muhona wa verisa ombara omutjise woura omuhihamise. 19 Oure wozombura mangara mbari omutjise mbwi wa ririra ko omuvi tjinene, nga kombunda oura tji wa pita, nombara otji ya koka momihihamo omizeu. Nu imba ovakarere vayo kave yakisire omuriro wondjozikiro okumutjitira omutambo otja pu pa tjitirwe kooihe mukururume.
20 Jehoram wa rira ombara e notjiwondo tjozombura omirongo vitatu na mbari, nu wa honapara mOjerusalem oure wozombura hambondatu. Kapa ri omundu ngwa ṱondjenda eye tja koka. Owo ve mu paka mOtjihuro tja David, nungwari kave mu pakere momaendo wouhona.
© Herero Revision Bible © Bible Society in Namibia, 2021.
