Ouvere nomaverukiro wombara Hiskija
(Jes 38:1-8, Jes 21-222Eku 32:24-26)1 Moruveze mangara tjingero ndo, ombara Hiskija wa vera na hara okukoka. Omuprofete Jesaja, omuzandu wa Amos, we kemutara ne kemu raera a tja: “Muhona ma tja nai: ‘Ṱuna oviṋa avihe nawa, orondu ove ko nokuveruka. Rirongera, mo koka.’ ”
2 Hiskija wa tanaurira omurungu we kekuma na kumbu ku Muhona a tja: 3 “Zemburuka, Muhona, kutja ami mbe ku karera nouṱakame nomutima omupore, nokutja aruhe mba kondja okutjita imbi ove mbi wa vanga.” Neye wa uta okurira tjinene.
4 Jesaja wa zapo pombara, nungwari ngunda e hiya tuurunga orumbo indwi rwomoukoto rwondjuwo youhona, Muhona arire tje mu raere 5 kutja ma yaruke ku Hiskija, omunane wotjiwaṋa tja Muhona, meke mu raere kutja: “Ami, ngu mbi ri Muhona, Ndjambi waiho mukururume David, mba zuu ongumbiro yoye nu mba munu omahoze. Ami me ku verukisa, nu kombunda yomayuva yetatu mo i kondjuwo ya Muhona. 6 Ami me ku hupisa oure wozombura omurongo nandano komurungu. Ami me ku yama pamwe notjihuro hi Jerusalem momake wombara ya Asirie. Ami me rwire otjihuro kondjozikiro yandje omuini, na mena romakwizikiro ngu mba tjita komukarere wandje David.”
7 Jesaja wa raera ombara kutja i twe po evanda nda ungurwa pomakuyu pomusuro wayo, noyo otji mai veruka. 8 Nombara Hiskija wa pura Jesaja kutja: “Pe notjiraisiro tjiṋe tji matji raisa kutja Muhona me ndji verukisa, nokutja kombunda yomayuva yetatu ami me yenene okuyenda kondjuwo ya Muhona?”
9 Jesaja wa zira a tja: “Muhona me ku pe otjiraisiro tjokutja eye ma yenenisa omakwizikiro we. Nambano movanga otjizire tjeyuva tji kayende omikambo omurongo komurungu poo omikambo omurongo kombunda?” 10 Hiskija wa zira na tja: “Oupupu okukayendisa otjizire omikambo omurongo komurungu. Nu ketjiyendise omikambo omurongo kombunda.” 11 Jesaja wa kumba ku Muhona, neye wa yarura otjizire omikambo omurongo kombunda kotjiurike tjeyuva tji tja tuwa po i ombara Ahas.
Ovahindwa mba zire kObabilon
(Jes 39:1-8)12 Moruveze mangara ndo, Merodak-Baladan, ombara ya Babilon, omuzandu wa Baladan, wa zuvire kutja ombara Hiskija wa vera notje mu hindira orutuu notjiyandjewa. 13 Hiskija wa yakura ovahindwa mba nondjoroka ne ve raisire outumbe we auhe, okutja osilveri nongoldo, novyomoro omuwa, nomaze omahuze, novirwise vye avihe vyovita. Kapa ri otjiṋa momatuwo we womapwikiro na ngamwa akuhe mouhona we tje ha raisire ku wo. 14 Omuprofete Jesaja weya kombara Hiskija, ne mu pura a tja: “Ovarumendu mba va zu pi, nu va tja vi kove?”
Hiskija wa zira a tja: “Owo va zu kehi rokokure kObabilon.”
15 Jesaja wa ryama okupura a tja: “Va muna tjike mondjuwo yoye youhona?”
Hiskija wa zira nai: “Va muna otjiṋa ngamwa atjihe. Kape notjiṋa momatuwo womapwikiro tji mbi ha raisire ku wo.”
16 Jesaja wa raera ombara a tja: “Muhona Omunamasaaehe ma tja nai: 17 ‘Oruveze maru ya, oviṋa avihe mondjuwo yoye youhona, avihe ooiho mukururume mbi va pwika nga ku ndinondi, mu mavi huurwa i Ovababilon. Kape nokusewa otjiṋa. 18 Ozondekurona zoye omuini tjiva maze huurwa naze karira ovaungure vondjuwo youhona wombara ya Babilon.’ ”
19 Ombara Hiskija wa zuva kutja ombuze ndji mai hee ohange nouṋingandu eye ngunda e nomuinyo; eye otja zira na tja: “Ombuze ya Muhona, ndji we ndji etere ombwa.”
Ondjandero youhona wa Hiskija
(2Eku 32:32-33)20 Oviṋa avihe vyarwe ombara Hiskija mbya tjita, nozondjito ze zouvanḓe, nomuhingo eye mbwa tunga na wo erindi norurora rwokueta omeva motjihuro, avihe mbi vya tjangwa mEkuruhungi rOzombara za Juda. 21 Hiskija wa koka, nomuzandu we Manasse we mu pingena mouhona.
© Herero Revision Bible © Bible Society in Namibia, 2021.
