Ouvere nomaverukiro wombara Hiskija
(2Ozo 20:1-112Eku 32:24-26)1 Moruveze mangara tjingero ndo, ombara Hiskija wa vera na hara okukoka. Omuprofete Jesaja, omuzandu wa Amos, we kemutara ne kemu raera a tja: “Muhona ma tja nai: ‘Ṱuna oviṋa avihe nawa, orondu ove ko nokuveruka. Rirongera, mo koka.’ ”
2 Hiskija wa tanaurira omurungu we kekuma rondjuwo na kumbu ku Muhona a tja: 3 “Zemburuka, Muhona, kutja ami mbe ku karera nouṱakame nomutima omupore, nokutja aruhe mba kondja okutjita imbi ove mbi wa vanga.” Neye arire tja utu okurira tjinene.
4 Tjazumba Muhona wa rakiza Jesaja kutja 5 yaruke ku Hiskija, nu a katje nai ku ye: “Ami, ngu mbi ri Muhona, Ndjambi waiho mukururume David, mba zuu ongumbiro yoye, nu mba munu omahoze woye; me ku hupisa oure wozombura omurongo nandano komeho. 6 Ami me ku yama notjihuro hi Jerusalem momake wombara ya Asirie, nu me kara pokutjitjevera.”
7 Jesaja wa zira a tja: “Muhona me ku pe otjiraisiro tjokutja eye ma yenenisa omakwizikiro we. 8 Eye ma tjiti kutja otjizire tjeyuva tji kawondje ovihahambunda omikambo omurongo kozondondo, nda ungurwa i ombara Ahas.” Notjizire otji tja ka wondja ovihahambunda omikambo omurongo.
9 Hiskija tja za nokuveruka komutjise we wa tjanga eimburiro rondangero ndi:
10 Ami mbe ripura kutja momayuva woumutanda wandje
me sokupunda motjovakoke;
mba yekwa ozombura zandje zokuhupa komurungu.
11 Mbe ripura kutja mehi rovanamuinyo ndi
ami himee munu Muhona rukwao;
himee munu omundu omunamuinyo ngamwa auhe.
12 Omuinyo wandje wa kondwa nau yandisiwa
tjimuna ondanda yomurise ndja haṋewa,
tjimuna ombanda ndja kondwa i omuwoze kotjiwozero.
Ami mba tjangovasi Ndjambi ma yandisa omuinyo wandje.
13 Ami ee uru mena romihihamo vyandje ouṱuku auhe;
Muhona wa teya omaṱupa wandje tjimuna ongeyama tji i tjita.
Ami mba tjangovasi Muhona ma yandisa omuinyo wandje.
14 Eraka randje ra pungara nu ra ngundipara,
nami mba vandara otja onguti.
Omeho wandje ya urwa okutara keyuru.
Muhona, ndji yama komaumba aehe nga.
15 Ami me tja tjike? Muhona ongwa tjita otjiṋa hi.
Omutima wandje mau tetara, nami hi nokusora okurara.
16 Muhona, ami me hupire ove, ove erike;
ndji verukisa nu tjita kutja mbi kare nomuinyo.
17 Okuhihamwa omutima kwandje maku runduruka okurira ohange.
Ove wa yama omuinyo wandje komaumba aehe;
Ove we ndji isira ourunde wandje auhe.
18 Kape na umwe motjovakoke ngu ma yenene okukutanga;
ovakoke kamaave kara nongamburiro mouṱakame woye.
19 Ovanamuinyo porwe ombu mave ku tanga
otja ami tji me ku tanga nambano.
Ooihe ve raera ovanatje vawo kutja oove omaṱakame.
20 Muhona, ove we ndji verukisa.
Eṱe opu matu zu okunyanda oviharpe,
nokukutanga nomaimburiro,
nu matu imburire mondjuwo yoye ngunda atu nomuinyo.
21 Jesaja wa raera kutja ombara i twe po evanda romukuyu petwiyu rayo, noyo otji mai veruka. 22 Ombara Hiskija wa pura a tja: “Pe notjiraisiro tjiṋe tji matji raisa kutja ami me yenene okuyenda kondjuwo ya Muhona?”
© Herero Revision Bible © Bible Society in Namibia, 2021.
