2 Ekuruhungi 20 - Herero Revision Bible (HRR)

Ovita kuna Ovaedom

1 Kombunda yoruveze rworive ovimbumba vyovita vyOvamoab novyOvaamoni puna Ovameuni mbe rikuta kumwe novimbumba mbi vya rwisa Josafat. 2 Ovahindwa tjiva ve ya kombara Josafat nave tja nai ku ye: “Otjimbumba otjinene tjeya okukurwisa, ama tji zu kOedom na komukuma mbwina wOmuronga wOmongwa. Otjo tja huura rukuru otjihuro Haseson-Tamar, tji tji ri Engedi.” 3 Josafat wa mumapara na kumbu ku Muhona kutja e mu pe ondunge, ndji ma sokutjita. Tjazumba otja rakiza kutja pe kare omeritjaerero kovikurya mehi arihe ra Juda. 4 Okuza kotjihuro atjihe peke mOjuda ovandu va hakahana okuyenda kOjerusalem kutja ve ka ningire ondunge ku Muhona, 5 nowo novandu va Jerusalem va woronganena morupanda orupe rwondjuwo ya Muhona. Ombara Josafat wa ya na kakurama komurungu wawo, 6 na kumbu nomasa a tja: “Muhona, Ndjambi wootate mukururume, ove u honaparera meyuru kombanda yomihoko avihe mouye. Ove oove omunauvara nomunamasa, nu kape na umwe ngu me ku pirukire. 7 Oove Ndjambi wetu. Otjiwaṋa tjoye Israel tji tje ya mehi ndi, ove wa ramba ovandu, mba turire mu ro, no yandja ehi ndi kozondekurona za Abraham, ingwi epanga roye, ri rire orawo nga aruhe. 8 Owo va tura mu ro nave ku tungire ondjuwo yomerikotameneno okukuyozika, amave tjiwa 9 kutja tji va munu otjipo ngamwa atjihe, kutja ovita ovinyone poo omutjise omuzeu poo ourumbu, mave kakurama komurungu woye na komurungu wondjuwo ndji ove mu u rikotamenenwa. Owo mave ku kove mombamisiro yawo, nove mo ve zuvire no ve yama.

10 “Nambano Ovaamoni nOvamoab nOvaedom mave tu rwisa. Ootate mukururume tji va pita mOengipte, ove ko ve yandjerere okuhita momahi ngo, nu ootate mukururume ve ye varama nave he ye nyono. 11 Owo mave tu sutisa komuhingo mbwi; ve ya okuturamba mehi ove ndi we tu pa. 12 Ove oove Ndjambi wetu. Ve vera, orondu eṱe twe rihahiza komurungu wotjimbumba tjovita otjinene hi, tji matji tu rwisa. Katu nokutjiwa kutja ngatu tjite vi, nungwari matu undju ombatero kove.”

13 Ovarumendu avehe va Juda puna ovakazendu novanatje vawo va kuramene mbo pondjuwo ya Muhona. 14 Nombepo ya Muhona ye ya kombanda yOmulevi umwe ngwa ri mombongarero ndji. Ena re ra ri Jahasiel, omuzandu wa Sakaria; eye wa ri owonganda ya Asaf, nu wa ri ondekurona ya Asaf mu Matanja na Jeiel na Benaja. 15 Jahasiel wa tja nai: “Muhona ombara, na eṋe ovandu amuhe va Juda nova Jerusalem, Muhona ma tja: ‘Amu mumapara nu amu tira otjimbumba tjovita otjinene hi.’ Otjirwa hi otja Ndjambi, ka tjeṋu. 16 Ve rwiseye muhuka tji mave rondo pomakapitiro wa Sis. Mamu hakaene na wo potjikoro tjomukutu mbwa hungama okuti onguza, popezu na Jeruel. 17 Otjirwa hi ka tjeṋu okutjirwa. Kurameye potuveze tweṋu, nu undjeye; mu mune Muhona tji me mu pe outoṋi. Vandu va Juda na Jerusalem, amu ivaiva, nu amu tira! Twendeye kotjirwa, nu Muhona ma kara puna eṋe!”

18 Tjazumba ombara Josafat we ripeta, omurungu we amau tara mehi, novandu avehe ve ripeta puna ye nave rikotamene ku Muhona. 19 Ovalevi vonganda ya Kehat noya Kora va sekama nave tanga Muhona, Ndjambi wa Israel, neraka enene.

20 Menyunguhuka rependukirwa ovandu va ya kokuti onguza popezu na Tekoa. Ngunda amave womboroka, Josafat wa hungira kuna wo, a tja: “Vandu va Juda nova Jerusalem! Ṱakameye mu Muhona, Ndjambi weṋu, neṋe mamu zikama. Kareye nongamburiro mu imbi mbi mamu raerwa i ovaprofete, nu mamu ṋingapara!” 21 Nombara tji ya za nokuzuvasana notjiwaṋa, otji ya rakiza kovaimbure tjiva kutja ve zare ozombanda nḓu ve zara moviungura oviyapuke, nu ve kayende komurungu wotjimbumba tjovita amave imbura nai:

“Tangeye Muhona!

Orusuvero rwe ru karerera nga aruhe!”

22 Tji va uta okuimbura, Muhona otja mumaparisa ovimbumba imbi mbyaa vi ru. 23 Ovaamoni nOvamoab va rwisa otjimbumba tjOvaedom nave tji yandeke oparukaze; tjazumba otji va yarukasana oveni nave nyonasana. 24 Otjimbumba tja Juda tjovita tji tja vaza oruhungu ndwa ri mokuti onguza, otji tja taviza kovanavita natjo natji munu kutja avehe va saravara pehi ava koka. Kape na umwe ngwa taura.

25 Josafat notjimbumba tje tjovita va taurira mo nave kambura ovihuurwa; nowo va vaza mo ozongombe ozengi, noviṋa ovingi, nozombanda, noviungurise vyarwe ovinanḓengu. Nangarire kutja va kara omayuva yetatu amave wongo ovihuurwa mbi, ovyo vya ri ovingi tjinene nai, nga tji ve ha yenenene okutoora avihe. 26 Meyuva oritjaine va woronganena momukutu wa Beraka, nave tanga Muhona ku avihe eye mbya tjita. Omukutu mbwi opu wa zokuisanewa “Beraka”, okutja Omukutu wOndangero. 27 Josafat wa hongorera ovira vye vyovita okuyaruka kOjerusalem ave nenyando rondoṋeno, orondu Muhona wa havera ovanavita na wo. 28 Tji va vaza motjihuro Jerusalem, otji va ya kondjuwo ya Muhona amave nyanda oviharpe nozohiva. 29 Oviwaṋa avihe mbya zuva kutja Muhona wa havere ovanavita na Israel vya tira Ndjambi. 30 Komuhingo mbwi Josafat wa honapara mohange, nu Ndjambi we mu pa orusuvo ominda avihe.

Ondjandero youhona wa Josafat

(1Ozo 22:41-50)

31 Josafat wa rira ombara ya Juda e notjiwondo tjozombura omirongo vitatu nandano, nu wa honapara mOjerusalem oure wozombura omirongo vivari nandano. Ina wa ri Asuba, omusuko wa Silhi. 32 Josafat wa tjita imbi mbyaa vi tjata ku Muhona tjimuna ihe Asa, ngwa ri po komurungu we. 33 Nungwari poṋa pomerikotameneno kovisenginina kozondunda kape haṋenwe. Otjiwaṋa tjandje ingee katjiye ritanaurira nomutima watjo auhe kokurikotamena ku Ndjambi wooihe mukururume.

34 Otjiṋa ngamwa atjihe Josafat tja tjita, okuza kombutiro nga kondjandero youhona we, tja tjangwa mEkuruhungi ra Jehu, omuzandu wa Hanani, ndi ri orukondwa rwEkuruhungi rOzombara za Israel.

35 Oruveze rumwe Josafat, ombara ya Juda, we rikuta kuna Ahasia, ombara ya Israel, ngwa tjita oviṋa ovingi ovivi. 36 Owo va ungura ozondjuwozomomeva motjihuro Esjon-Geber zokuyenda kOtarsis. 37 Nungwari Elieser, omuzandu wa Dodawa, ngwa zire kotjihuro Maresa, wa ukira Josafat, a tja: “Mena rokutja we rikuta kuna Ahasia, Muhona otji ma nyono imbi mbi wa tunga.” Nozondjuwozomomeva otji za teka, nu kaze na pu za kaya kOtarsis.