Omatwako wovita
1 “Tji mo twara ovita kovanavita na ove, no kamuna oukambe nomatemba wovita, notjimbumba tjovita tji tja kapita ihi otjoye, nu ove o ve tira; orondu Muhona, Ndjambi woye, ngwe ku pitisa mOengipte, tjinga e ri puna ove. 2 Nu tji mu ri pokuuta otjirwa, omupristeri nga ryame popezu, nu nga hungire notjiwaṋa, 3 a tje nai ku tjo: ‘Purateneye, Vaisrael, eṋe ndino mamu karwa novanavita na eṋe; amu kara nemuma, nu amu zezera, nu amu tira, nu amu urumisiwa i wo! 4 Muhona, Ndjambi weṋu, makaenda puna eṋe okukemurwira novanavita na eṋe, nu me mu pe outoṋi.’
5 “Novahongore ngave tje nai kotjiwaṋa: ‘Owaṋi mokati keṋu ngwa tunga ondjuwo ombe nu ngu hiye i yapura? Eye nga yaruke konganda, tjapo ngaa ṱu movita, nomundu warwe e i yapura. 6 Owaṋi ngwa kuna omuvite nu ngu hiya rya ku wo? Eye nga yaruke konganda, tjapo ngaa ṱu movita, nomundu warwe a karya kovihape mbi. 7 Owaṋi ngwa vareka omukazendu, nu ngu hiya kupa? Eye nga yaruke konganda, tjapo ngaa ṱu movita, nomukazendu a kupwa i omurumendu warwe.’
8 “Tjazumba imba ovahongore ngave tje nai kotjiwaṋa: ‘Owaṋi ngu nomburuma nomutima wemuma? Eye nga yaruke konganda kutja omitima vyovakwao avi ha mumapara otja imbwi owe.’ 9 Novahongore tji va mana okuhungira omambo wawo kotjiwaṋa, ngape zikwe ozohongora zovita okunana otjiwaṋa.
10 “Tji weya popezu notjihuro okutjirwisa, rutenga tji pa oruveze rwokuzuvasana mohange. 11 Ndoovazu otjo matji ku pe eziriro rohange natji ku yezururire omivero, nu ovature avehe, mba vazewa mo, ngave rire ovakarere voye nu ngave ku ungurire oviungura vyoṋiṋikizire. 12 Nungwari tji ve hi nokuvanga okutjita ohange na ove, nave vanga okutjita ovita, ve kovera. 13 Nu Muhona, Ndjambi woye, tje ku pe otjihuro hi mouvara woye, zepa ovarumendu vatjo avehe. 14 Nungwari ovakazendu novanatje, novinamuinyo, noviṋa avihe mbi ri motjihuro, novipundwa vyatjo avihe, mo sokuvihuura. Novihuurwa vyovanavita na ove Muhona, Ndjambi, woye, mbye ku pa, isa po vyoye. 15 Nu wina otji mo tjiti nao novihuro avihe, mbi ri kokure tjinene na ove, nu mbi he ri ovyomihoko mbi.
16 “Nungwari movihuro vyomihoko mbi Muhona, Ndjambi woye, mbi me ku pe otja otjirumatwa tjoye, o hupisa mo ngamwa tji tji nomuinyo. 17 Nyona oviwaṋa avihe mbi okumana, okutja Ovahetite nOvaamori, nOvakanaan, nOvaperesi, nOvahevi, nOvajebusi, otja Muhona, Ndjambi woye, pe ku rakiza; 18 kokutja ovyo avi he mu hongo okutjita oviyaukise vyavyo avihe, mbi vya ungurira oomukuru vavyo vovisenginina, nokutja eṋe amu ha katuka komurungu wa Muhona, Ndjambi weṋu.
19 “Tji wa kovere otjihuro orure mokutjita ovita na tjo okutjitoṋa, o nyono omiti vyatjo okuvika nekuva, ryaa uri ovihape vyavyo, nungwari imbi omiti ovini o ke. Omiti vyokuti ovyo wina ovanavita na ove mbu wa sokukovera are? 20 Nu imbi omiti, mbi mo tjiwa kutja kavi novihape oviriwa, nga rire mbi wa ke porwavyo; nu ove tunga na vyo orumbo ndu maru ku yama kotjihuro tji tji novita na ove, okutjikovera na vyo, nga tji tja kamburwa.
© Herero Revision Bible © Bible Society in Namibia, 2021.
