Onḓiro ya Saul novazandu ve
(1Sam 31:1-13)1 Ovafilisti va rwa ovita kuna Ovaisrael, nOvaisrael va taura kOvafilisti, novaṱi ovengi va saravara kozondundu za Gilboa. 2 Ovafilisti va tezera ooSaul novazandu ve nave kazepa ovazandu vetatu va Saul: Jonatan na Abinadab na Malkisua. 3 Notjirwa tji tja ri popezu na Saul tja ri otjizeu; ovanavita tji ve mu muna ve mu yaha nave mu tende tjinene. 4 Saul otja tja nai komutjinde wovirwise vye: “nana engaruvyo roye u ndji zepe kutja Ovafilisti imba ovanavisenginina ave he ya okundjinyekerera.” Nungwari ingwi omutjinde wovirwise wa panḓa, tjinga a tira tjinene. Saul otja toora engaruvyo re ne riwisire ko. 5 Nomutjinde wovirwise vya Saul tja munu kutja Saul wa koka, eye wina arire tje riwisire kengaruvyo re na koka puna Saul. 6 Saul novazandu ve vetatu otji va kokera pamwe, nouhona we a rire pu wa yandere. 7 Ovaisrael, mba tura komukuma mbwina worutjandja rwa Jesreel na movihuro vya Jordan, tji va muna kutja Ovaisrael va taura, nokutja Saul wa ṱu puna ovazandu ve, arire tji va isa ovihuro mbi nave tupuka; nOvafilisti otji ve ya nave tura mu vyo.
8 NOvafilisti tji ve ya eyuva rarwe okuhuura ovaṱi arire tji va munu otutu twooSaul novazandu ve vetatu atwa saravara kozondundu za Gilboa. 9 Nowo va konda Saul otjiuru nave mu hukura ovirwise vye nave hindi ovatumwa komikuma avihe vyehi rOvafilisti okukainganisa embo routoṋi mozondjuwo zoomukuru vawo vovisenginina na motjiwaṋa. 10 Owo va twa ovirwise vya Saul mondjuwo imwe onḓere, nave turike otjiuru tje mondjuwo onḓere yomukuru wawo wotjisenginina Dagon. 11 Ovature va Jabes mOgilead tji va zuva imbi Ovafilisti mbi va tjita ku Saul, 12 nu imba ovarumendu omapenda tjinene va toora otutu twoo Saul novazandu ve nave tu twara kOjabes. Owo va paka omaṱupa wawo kehi yomumbonde nave ritjaere kovikurya oure womayuva hambombari.
13 Saul wa koka, eye tjinga e ha ri nouṱakame ku Muhona. Eye ka ri nonḓuviro komatwako wa Muhona; eye wina aa kondjo okupura kozombepo zovaṱi, 14 nu kaa kapura ku Muhona. Muhona ope mu zepera na yandja ouhona we ku David, omuzandu wa Isai.
© Herero Revision Bible © Bible Society in Namibia, 2021.
