David ma taura pu Saul
1 David wa ya komupristeri Ahimelek kOnob, nu Ahimelek wa pita ne mu tjakanene ama zezera, na tja: “Okutjavi tji wa yende erike?”
2 Nu David wa zira omupristeri Ahimelek a tja: “Ami mbe ya moviungura vyombara. Oyo ye ndji raera kutja e ha tjivisa omundu imbi mbi ye ndji hindire okutjita. Nami opu mba raerera ovandu vandje kutja tu kahakaenene poṋa porive. 3 Nambano u na tjike moyoye? Ndji pa ozomboroto ndano ozombomba poo ngamwa atjihe tji u na tjo.”
4 Nomupristeri wa zira David a tja: “Ami hi nozomboroto zauriri posi yozomboroto ozondjapuke. Ove mo pewa zo, tjinangara momayuva omasupi nga kapita ovarumendu voye kave rarere povakazendu.”
5 David wa zira a tja: “Owo, tjiri, kave tjitire nao. Eṱe katu rarere povakazendu. Ovandu vandje aruhe ve riṱiza oukohoke, nandarire tji matu i motjiungura tja kauriri. Nu ndino owo ovakohoke katjotjiri!”
6 Omupristeri otja yandja ozomboroto nḓa ozondjapuke ku David, orondu ozomboroto, nḓa ri na zo, ozo nḓa zomaraisiro porwazo, nḓa isiwa po komurungu wa Muhona, tji pa tuwa ozongwao ozombe.
7 Nu omutjevere wovarise va Saul, wena Doeg, Omuedom, wa ri mbo meyuva ndo, eye tjinga e sokuyenenisa otjiungura tjouyapuke komurungu wa Muhona.
8 David wa pura nai ku Ahimelek: “Ko nenga poo engaruvyo, ndi mo ndji pe? Ami hi etere engaruvyo randje poo otjirwise tjarwe, orondu omarakiza wombara ye ndji hakahanisa okuyenda.”
9 Nu ingwi omupristeri wa tja: “Engaruvyo, ndi mbi na ro, oro ndi rOmufilisti Goliat ngu wa zepera mOtjanatjomimbonde; oro ri ri kongotwe yombanda yomupristeri yokoviṱuve, nu ra mangwa merapi. Tji mo ri vanga, toora, otjo otjirwise atjiyerike tji mbi na tjo mba.”
David arire tja tja: “Ndji pa ro, kape na rarwe ewa tjinene pu indo.”
10 Nu David wa taura pu Saul meyuva ndo na i ku Akis, ombara ya Gat. 11 Nungwari imba ovakarere va Akis va tja nai ku ye: “Ingwi ka David are, ombara yehi re omuini? Kaye ngwi ovakazendu nguyave imbura tjaave pundu ave tja: ‘Saul wa zepa eyovi, nungwari David wa zepa omayovi omurongo are?’ ”
12 Omambo nga ya yandja omeripuriro omazeu ku David, nu David otja tira Akis, ombara ya Gat, tjinene. 13 David opa za okuritjita komurungu wawo aayo wa vera oviyoze, nu tji ve mu ṱiza momake wawo, otjaa rokoha tjimuna omundu nga puruka ozondunge, a pambara komuvero na randatisire omate moruyezu rwe. 14 Akis otja tja nai kovakarere ve: “Kamu nokumuna kutja omurumendu ngo wa vera oviyoze are? Mwe mu etere tjike ku ami? 15 Mba hepa ovanaviyoze are kutja mamu ndji etere ingwi wina, e ritjite omunaviyoze mba? Ngwa sana ngwi, wa yenene okuhita mondjuwo yandje are?”
© Herero Revision Bible © Bible Society in Namibia, 2021.
