Omapsalme 56 - Herero Revision Bible (HRR)

Ongumbiro yokuriyameka ku Ndjambi

Komuimburise otja kombosiro yOnguti ndji ri kOmiti vyOkokure. Epsalme ra David, Ovafilisti tji va za nokumukamburira mOgat.

1 Ndji tjariparera, Ndjambi,

ovandu tjinga ave ndji rwisa;

omayuva aehe ovanavita na

ami ve ndji tatumisa.

2 Ovendjipirukire ve ndji rwisa,

nu ovandu ovengi ve ndji pirukira.

3 Ami tji me tira, Muhona Omunamasaaehe,

me riyameke kove.

4 Ami me riyameke ku Ndjambi,

hi nokutira ko;

me mu tanga mena raimbi mbya kwizika.

Omundu uriri ma sora okundjitjita tjike?

5 Ovanavita na ami omayuva

aehe ve ndji tjita oumba;

nowo aruhe ve ripura okundjitjita otjipo!

6 Owo ve rikuta kumwe poṋa pomaṱarero,

nu ve tjevera otjiṋa atjihe tji me tjiti,

amave undju okundjizepa.

7 Ve verera ouvi wawo, Ndjambi;

wisa ovandu mba kehi momazenge woye.

8 Ondjenda yandje, tjiri, u yi i;

omahoze wandje we ye pakera motjikuve.

Owo kaye tjangerwe membo roye are?

9 Ovanavita na ami mave yaruka ombunda,

meyuva ndi me ku kove,

nu ami mbi tjiwa kutja Ndjambi u ri puna ami.

10 Nami me tanga embo ra Ndjambi,

11 ami me riyameke ku Ndjambi,

hi nokutira ko;

omundu uriri ma sora okundjitjita tjike?

12 Ndjambi, ami me kupe imbi

mbi mba kwizika;

me ku punguhire ombunguhiro

yandje yokutja okuhepa,

13 ove tjinga awa yama omuinyo

wandje konḓiro

nozombaze zandje kombutarero.

Komuhingo mbwi otji me kayenda

moukarepo wa Ndjambi

mondjerera yovanamuinyo.