Eimburiro rondangero ra Hana
1 Hana wa kumba a tja:
“Omutima wandje mau yoroka mu Muhona,
nu me nyandere omasa Muhona nge ndji pa;
ami me yoro ovanavita na ami,
tjinga ame nyandere ombatero yoye.
2 “Kape na ngu ri omuyapuke otja Muhona;
posi yoye kape na warwe;
nu kape noruuwa otja Ndjambi wetu.
3 Iseye omerihiviro weṋu wokuritongamisa!
Embo romeritongamisiro
ari piti ko movinyo vyeṋu,
orondu Muhona tjinga
e ri Ndjambi ngu tjiwa avihe,
nu ngu pangura ozondjito azehe zovandu.
4 Omauta wovarwe wovita ozombanḓe ya teyewa,
nungwari ovingundi mave rire ovanamasa.
5 Imba mbe kuta mave kaungurira oviparure,
nungwari imba mbaa ve ṱondjara,
kave nakuṱondjara rukwao.
Ingwi ongandji wa panduka
ovanatje hambombari,
nungwari ingwi ngwa panduka
ovanatje ovengi, wa sewa uriri.
6 “Muhona u zepa na kotora komuinyo rukwao;
U pundisa motjovakoke,
na pitisa mo rukwao.
7 Muhona u syonaparisa na tumbisa;
u susuparisa na tongamisa.
8 Eye u yerurura owokehi moruuma,
na tongamisa omuhepe mondova;
eye meve haamisa puna ovahivirikwa
ne ve pe ovihavero vyondengero.
Omazikameno wehi owa Muhona,
kombanda yawo okatungira ouye.
9 “Eye u yama ominyo vya imba ve ovaṱakame,
nungwari ovanauvi mave nyonokere monḓorera;
orondu omundu ka munu outoṋi nomasa we omuini.
10 Ovanavita na Muhona mave nyanyaurwa;
eye meve ṱuṱumine okuza meyuru.
Muhona ma pangura ouye auhe.
Eye ma yandja omasa kombara ye
noutoṋi komutwirisiwa we.”
11 Tjazumba Elkana otja yaruka konganda kOrama, nungwari ingwi omuzandu Samuel wa kara mOsilo okukarera Muhona kehi yondjeverero yomupristeri Eli.
Ourunde wovazandu va Eli
12 Imba ovazandu va Eli va ri oviporoporo. Owo kave ningire ko na tja na Muhona, 13 nangarire nousemba ovapristeri mbu ve sokutjita kotjiwaṋa. Aruhe omundu tji ma punguha ombunguhiro ye, omukarere womupristeri ee ya notjitwere tjovipa vitatu. Onyama ngunda amai pi, 14 eye aa hweke ihi otjitwere monyungu, nonyama ngamwa aihe ndjaa i etererwa i otjitwere aa i rire oyomupristeri. Ihi aa tjitwa kOmuisrael auhe ngwee ya kOsilo okuyekupunguhira Muhona. 15 Nu posi yanao, ozonḓura ngunda aze hiya ningiririsiwa, omukarere womupristeri ee ya na tja komurumendu ngu ma punguha ombunguhiro: “Eta onyama, ndji mai katerekerwa omupristeri pomakara; eye ke nokukambura ko onyama ndja pi monyungu, posi yaindji ombihu porwayo.”
16 Ingwi omurumendu tje mu ziri na tja: “Ozonḓura ngaze ningiririsiwe rutenga, tjazumba u toore ndji movanga,” omukarere ngwi womupristeri wa tja nai: “Ayee, kako, ndji pa nambano! Tji u hi nokutjita nao, ami me toora komasa.”
17 Ourunde wovazandu va Eli wa ri ounene tjinene komurungu wa Muhona, orondu aave nyengura ombunguhiro ya Muhona.
Samuel mOsilo
18 Nu vari omuatje omuzandu Samuel wa karera Muhona, a zara ombanda youpristeri. 19 Ina ee mu ya tatere okavanda kokombanda, kee mu etere ombura aihe, tjaa i puna omurumendu we okukapunguha ombunguhiro yombura aihe. 20 Tjazumba Eli otja sera ondaya kooElkana nomukazendu we a tja: “Muhona nge ku pe ovanatje varwe momukazendu ngwi moruveze rwaingwi ngu wa yapurira Muhona.”
Kombunda yanao owo arire tji va yaruka koyawo.
21 Muhona wa sera Hana ondaya, nu Hana wa panduka rukwao ovazandu vetatu novakazona vevari. Nu ingwi omuzandu Samuel we kurira motjiungura tja Muhona.
Eli novazandu ve
22 Eli nambano wa kurupire tjinene. Eye aa zuu oviṋa avihe ovazandu ve mbyaa ve tjiti kOvaisrael, nokutja aave rara povakazendu mbaa ve ungura pomahitiro wOndanda yOmahakaeneno. 23 Neye otja tja nai ku wo: “Okutjavi tji mamu tjiti ozondjito ozombi otja inḓa? Omundu auhe u ndji raera oviṋa mbi ovivi, mbi mu tjita. 24 Amu tjiti nao, vanatje vandje! Ombuze ndji ndji me zuu nu ndji mai inganisiwa i otjiwaṋa tja Muhona kombanda yeṋu, kambwa. 25 Omundu tji ma tjiti navi nai komukwao ma pangurwa i Ndjambi, nungwari omundu tji ma tjiti ouvi ku Muhona, owaṋi ngu me mu pangura?”
Nowo kave zuvire komaronga wa ihe, Muhona tjinga aa vanga okuvezepa.
26 Omuzandu Samuel wa yenda ame kuru, na munine po ondjingonekero ku Muhona na kovandu.
Eli ma tjivisiwa omberero yeṱunḓu re
27 Nu pe ya omuprofete umwe ku Eli okuyekumuraera ombuze ya Muhona ndji: “Iho mukururume Aron nonganda ye tji va ri ovakarere va Farao mOengipte, ami mbe rimunikisa ku wo. 28 Momihoko avihe vyOvaisrael ami mba toorora mo ovazandu vonganda ye ve rire ovapristeri vandje okukarera potjipunguhiro tjandje, nokutwimisa ovyomoro omuwa, nokuzara orupera rwokoviṱuve. Nu kondjuwo yaiho ami mba yandja ko ozombunguhiro azehe zomuriro zOvaisrael ze rire orukondwa rwovapristeri. 29 Okutjavi tji mamu nyengura ozombunguhiro zandje zovinamuinyo nozovikurya nḓu mba rakiza kutja ze etwe momaturiro wandje? Okutjavi ove, Eli, tji mo yozike ovazandu voye pu ami, amo ve esa kutja ve riṋunise noviyambo vyozombunguhiro oviwaviwa vyotjiwaṋa tjandje Israel? 30 Ami ngu mbi ri Muhona, Ndjambi wa Israel, mba kwizikire rukuru kutja onganda yoye nonganda yaiho maze ndji karere aruhe otja ovapristeri. Nungwari nambano me tja Ami hi nokuvanga kutja pe kare nai komeho. Orondu ingwi ngwe ndji yozike, ami me mu yozike, nungwari ngu me ndji nyengura, ami me mu yamburura. 31 Tjiwa nawa kutja oruveze maru ya mu me zepa omitanda vyoye na imbi vyonganda yaiho nga tji pe hi nokuhupa omukururume monganda yoye. 32 Nu mo tara neruru kouindandu ami mbu me yandja komihoko omikwao vya Israel; nungwari monganda yoye kamaamu kakara omukururume rukwao. 33 Ami me hupisa umwe wozondekurona zoye, neye me ndji karere otja omupristeri. Nungwari eye ma poṱupara ne rihahiza; nozondekurona zoye ozongwao azehe maze ṱu onḓiro ombi. 34 Nu ihi tji matji tjitwa kovazandu voye vevari ooHofni na Pinhas matji rire otjizemburukiro kove: Aveyevari mave ṱu meyuva rimwe. 35 Ami me ripendurire omupristeri ngu ma kara nouṱakame ku Ami, nu ngu ma tjiti otjiṋa atjihe Ami tji me vanga. Ami me mu pe ozondekurona nḓu maze karere aruhe momurungu wombara yandje ondwirisiwa. 36 Nu ngamwa auhe wozondekurona zoye ngu ma hupu, ma i komupristeri ngo a kaningira ko ovimariva novikurya ama tja, ndji tjita, mbi rire umwe motjiungura tjoupristeri kutja mbi mune okahumburwa.”
© Herero Revision Bible © Bible Society in Namibia, 2021.
