Ovafilisti mave huura Otjipwikiro tjOmerikutiropamwe
1 Moruveze ndo Ovaisrael va sekama okukarwisa Ovafilisti, nave katona ozondanda zawo mOeben-Eser; nungwari Ovafilisti va katona ozondanda zawo mOafek. 2 Ovafilisti ve rirongera okukarwa; motjirwa otjizeu hi Ovaisrael va haverwa i Ovafilisti, nu pa ṱa ovarumendu mangara omayovi yane. 3 Ovarwe wovita tji va kotoka kozondanda, ovanane vOvaisrael otji va tja nai: “Okutjavi Muhona tja tjiti kutja Ovafilisti ve tu havere ndino? Ngatu kaete Otjipwikiro tjOmerikutiropamwe wa Muhona kOsilo kutja Muhona a kare mokati ketu ne tu yame momake wovanavita na eṱe.” 4 Owo opu va tumina ovahindwa kOsilo nave kaeta Otjipwikiro tjOmerikutiropamwe wa Muhona Omunamasaaehe, ngu haama kotjihavero tje tjouhona kombanda yovakerubi. Novazandu vevari va Eli ooHofni na Pinhas va yenda puna Otjipwikiro tjOmerikutiropamwe.
5 NOtjipwikiro tjOmerikutiropamwe wa Muhona tji tja hita mozondanda, Ovaisrael avehe otji va tjita ondavaerero yondjoroka nga ehi tji ra tjita omungunda. 6 Ovafilisti wina va zuva ondavaerero ndji yondjoroka nave tja: “Ondavaerero ndji onamasa mozondanda zOvaheberi, mai hee tjike?” Nowo va zuva kutja Otjipwikiro tjOmerikutiropamwe wa Muhona tja kahita mozondanda. 7 Ovafilisti va uruma ave tja: “Ndjambi wOvaisrael weya mozondanda! Owee ku eṱe! Kape na pu pa tjitirwe otjiṋa otja ihi rukuru. 8 Owee ku eṱe! Owaṋi ngu me tu yama ku Ndjambi omunamasa ngwi? Eye onguri Ndjambi tjingeye ngwi ngwa hihamisire Ovaengipte noviwonga ovingi mokuti onguza. 9 Rireye ozombanḓe nu mu ritjinde otja ovarumendu, oweṋe Vafilisti, kutja amu ha karere Ovaheberi tjimuna owo tji va karera eṋe; ritjindeye otja ovarumendu nu mu rwe!”
10 Ovafilisti otji va rwa nomasa, nOvasirael va haverwa nave tupuka, auhe koyawo. Notjiṱiro tja ri otjinene; mOvaisrael mwa ṱa ovarwe wovita omayovi omirongo vitatu. 11 Nu wina Otjipwikiro tjOmerikutiropamwe wa Ndjambi tja pundwa i ovanavita, novazandu va Eli aveyevari ooHofni na Pinhas va ṱa.
Onḓiro ya Eli
12 Omubenjamin umwe wa tupuka motjirwa na kavaza kOsilo meyuva tjingero ndo, e nozombanda nḓa tauka, nehi motjiuru. 13 Tja kavaza ngo, Eli tjandje wa haama kotjihavero pomahitiro wotjihuro ama nanḓinḓa kondjira. Omutima we wa ri nongurunguse mena rOtjipwikiro tjOmerikutiropamwe wa Muhona. Nomurumendu ngwi tja eta ombuze ndji kotjihuro, otjihuro atjihe otji tja ura. 14 Eli tja za nokuzuva ondavaerero onene ndji, wa pura a tja: “Ondavaerero onene ndji mai hee tjike?” Omurumendu ngwi wa hakahana okuya ku Eli na kora ombuze ndji. 15 Eli wa ri nozombura omirongo muvyu na hambondatu nu wa poṱuparere. 16 Nomurumendu ngwi wa tja nai ku Eli: “Owami ngu mba taura motjirwa, nu mba tupuka ondjira aihe ndinondi.”
Nu Eli we mu pura a tja: “Kwa tjitwa tjike, muatje wandje!”
17 Ingwi omutaure wa zira a tja: “Ovaisrael va taura kOvafilisti, notjimbumba tjovita tja haverwa; novazandu voye aveyevari ooHofni na Pinhas va ṱu, nOtjipwikiro tjOmerikutiropamwe wa Ndjambi tja huurwa.”
18 Omurumendu ngwi tja tamuna Otjipwikiro tjOmerikutiropamwe wa Ndjambi, Eli otja wa ondonya okuza kotjihavero tje pomuvero worumbo. Neye wa teka engoti na koka, orondu eye wa kurupire tjinene, nu wa ri omurumendu omutwezu. Neye wa kara omunane mOisrael oure wozombura omirongo vine.
Onḓiro yomuhepundu wa Pinhas
19 Nomusuko omukwe wa Eli, omukazendu wa Pinhas, wa ri otjingundi otjinene. Neye tja za nokuzuva ombuze yokutja Otjipwikiro tjOmerikutiropamwe wa Muhona tja huurwa, noyonḓiro yomukwe we ihe noyomurumendu we, kamanga arire tja vere ozongama na panduka. 20 Nu tja ri pokukoka, ovakazendu mbaa ve mu vatere, va tja nai ku ye: “O tira! Ove wa panduka okazandu!” Eye ka zirire ko, nu ka ningire ko na tja. 21 Nungwari eye wa ruka okazandu ke ena Ikabod, okutja “Ondatero ya Ndjambi ya zu mo mOisrael,” ama heere komahuuriro wOtjipwikiro tjOmerikutiropamwe wa Muhona na konḓiro yomukwe we ihe noyomurumendu we. 22 Neye wa tja: “Ondatero ya Ndjambi ya zu mo mOisrael, orondu Otjipwikiro tjOmerikutiropamwe wa Ndjambi tja huurwa.”
© Herero Revision Bible © Bible Society in Namibia, 2021.
