Ovaisrael mave vanga ombara
1 Samuel tja kurupire, wa zika ovazandu ve okurira ovapangure mOisrael. 2 Ena romuzandu we everi ra ri Joel, noutjavari wa ri Abija; owo va ri ovapangure mOberseba. 3 Nungwari owo kava ri nongaro ya ihe; va ri nonḓero yokumuna ovimariva ovingi mouhasemba, nu ave popwa novimariva kutja ve rundurure ousemba mombanguriro.
4 Novanane avehe vOvaisrael otji va wongara, ave i ku Samuel mOrama 5 nave katja nai ku ye: “Tara, ove wa kurupa, novazandu voye kave nongaro yoye; tu zikira ombara, ndji mai tu honaparere otja tji pe ri moviwaṋa avihe.” 6 Nungwari Samuel ka ri nohange, indu tji va tja: “Tu zikira ombara, ndji mai tu honaparere.” Neye otja kumba ku Muhona. 7 Nu Muhona wa tja nai ku Samuel: “Tjita otja kombango yotjiwaṋa mu avihe mbi mave ku raere; orondu kave imbirahire ove, nungwari va imbirahi ami kutja e ha rire ombara yawo. 8 Owo mave tjiti nai nambano kove punga ave tjiti aruhe ku ami okuza koruveze ndwina ndu mbe ve pitisire mOengipte, nga ku ndinondi; owo ve ndji esa nave karere oomukuru vovisenginina. 9 Puratena ku wo; nungwari ve ronga tjinene, nu ve raera nawa omausemba ombara ngu mai kara wo, tji mai ve honaparere.”
10 Samuel wa tjivisa kotjiwaṋa tji tja ningira ombara ku ye, imbi avihe Muhona mbye mu raera. 11 Neye wa tja: “Ombara, ndji mai mu honaparere, mai kara nomausemba nga: Oyo mai kambura ovazandu veṋu, nu mai ve ungurisa pomatemba wayo wovita, nai ve isa po ovakavire vayo; nu wina mai ve utukisa komurungu wetemba rayo. 12 Oyo mai ziki tjiva ve rire ovanane vovarwe vyovita eyovi, na tjiva vomirongo vitano; nu rukwao mave taura ehi rayo romakunino, nave wongo omakondero wayo, nave ungura ovirwise vyayo vyovita, noviungurise vyomatemba wayo wovita. 13 Oyo mai rungisa ovakazona veṋu ovyomoro omuwa, nai ve terekisa ovikurya nozomboroto aruhe. 14 Ombara ndji mai kambura omahi weṋu inga omawamawa womakunino, nomivite nomiṋinga nai vi yandja kovahongore vayo. 15 Oyo mai kambura otjitjamurongo tjovikunwa vyovikunino vyomivite vyeṋu nai tji yandja kovatjevere vondjuwo yayo na kovahongore vayo varwe. 16 Oyo mai kambura ovakarere veṋu ovarumendu novakazendu, nozongombe zeṋu ozombwa nousino weṋu, nai ve ungurisa koviungura vyayo. 17 Wina mai kambura otjitjamurongo tjozonyanda zeṋu, neṋe oveni mamu rire ovakarere vayo. 18 Oruveze ndwi tji rweya mamu unauna tjinene mena rombara, ndji mwe ritoororera oveni. Nungwari Muhona kamaa puratene ko komaunaunino weṋu.”
19 Notjiwaṋa tja panḓa okupuratena komambo wa Samuel. Otjo tja tja: “Ayee, eṱe matu vanga ombara. 20 Komuhingo mbwi otji matu kara otja oviwaṋa vyarwe, atu nombara yetu oveni, ndji mai tu honaparere nu ndji mai tu hongorere tji matu karwa ovita.” 21 Samuel wa puratena omambo aehe wotjiwaṋa ngu tja hungira, ne keyeserekarera ku Muhona. 22 Nu Muhona wa tja nai ku Samuel: “Tjita punga amave vanga, vepa ombara.” Samuel otja raera kOvaisrael kutja ve yaruke kozoyawo.
© Herero Revision Bible © Bible Society in Namibia, 2021.
