1 Ozombara 6 - Herero Revision Bible (HRR)

Omatungiro wondjuwo ya Muhona

1 Kombunda yozombura 480, Ovaisrael tji va za nokupita mOengipte, mombura oitjaine youhona wa Salomo mOisrael, momueze outjavari Sif, Salomo otja uta okutunga ondjuwo ya Muhona.Ondjuwo ya MUHONA ndja tungwa i Salomo 2 Nu indji ondjuwo Salomo ndja tungira Muhona, moukoto ya ri noure wozometa omirongo vivari na hambombari, nouparanga wozometa muvyu, noutonga wozometa omurongo nandatu nohinga. 3 Netuwo romahitiro ra ri noukoto wozometa ine nohinga, nouparanga wozometa muvyu, pu pe ṱeki imbwi ouparanga wondjuwo oini. 4 Inga omakuma wondjuwo ndji ya ri notuiho tu twa ri otumango pendje, notuparanga moukoto. 5 Keṋe yomakuma nga wopendje, komikuma mbi vyoure wondjuwo nokongotwe, kwa weziwa omatungiro yetatu nga tendekasana. Etungiro arihe peke ra ri noutonga wozometa mbari nohinga. 6 Etuwo arihe romatungiro nga wokehi ra ri nouparanga wozometa mbari nohinga, nu indi arihe romatungiro wopokati ra ri nouparanga wozometa ndatu, nu indi arihe romatungiro wokombanda ra ri nouparanga wozometa ndatu nohinga. Indi ekuma rondjuwo ra tungwa tjimuna ozondondo okukondoroka kutja omatuwo womatungiro nga yetatu nga tendekasana ye haame kozondondo nḓa nokuhinozongunḓe nḓu maze tungwa mekuma.

7 Inga omawe, nga tunga ondjuwo, ya ungurirwa motjitoto tjomazukuriro womawe kutja ape ha zuvaka ombosiro yozongowa noyomakuva noyoviungurise vyarwe vyovitenda, ondjuwo ngunda amai tungwa.

8 Omahitiro womatungiro nga wokehi ya ri keyuva kokumuho kwondjuwo, nozondondo aaze rondo komatungiro nga oyetjavari noyetjatatu. 9 Salomo tja mana okutunga omakuma wondjuwo ya Muhona otja twako omututu womiti omityakaṋa vyotupapa. 10 Nomatungiro nga yetatu nga tendekasana nu nga weziwa ya tungwa keṋe yomakuma nga wopendje wondjuwo; omatungiro aehe ya ri noutonga wozometa mbari nohinga, nu ya pambwa nomiti vyotupapa kumwe.

11 Nu Muhona wa tja nai ku Salomo: 12 “Tji mo ṱakamisa omazikamisiro nomaraerero nomatwako wandje aehe nokuyetjita, ami me ku tjitire imbi mbi mba kwizikira iho David. 13 Me tura motjiwaṋa tjandje Israel mondjuwo ndji ndji mo tungu, nu himee tji esa ko.”

14 Salomo otja mana okutunga ondjuwo ya Muhona.

Omaharekero womoukoto wondjuwo ya Muhona

(2Eku 3:8-14)

15 Omakuma womoukoto wondjuwo ya Muhona Salomo we ye vandeka nomiti vyotupapa mbya hongwa, okuza pehi nga komututu; nu imba pehi pa ungurwa nomiti vyomiparara mbya hongwa. 16 Etuwo romoukoto, ndi isanewa kutja Otjouyapukeyapuke, ra tungwa mokuara kwondjuwo. Oro ra ri noure wozometa muvyu, nu ra haṋewa nekuma romiti vyotupapa mbya hongwa, okuza pehi nga komututu. 17 Nu etuwo, ndi ri komurungu wOtjouyapukeyapuke, ra ri noure wozometa omurongo na hambondatu. 18 Imbi omiti vyotupapa mbya hongwa vya harekerwe nourenga mbwa kororwa notuvyo, nu mbwa sana komakungu wokuti nozongara; ondjuwo ya Muhona aihe moukoto ya vandekerwe nomiti vyotupapa mbya hongwa, nga omawe womakuma wayo tjiyaye ha munika.

19 Nu mokwara kwondjuwo ya Muhona omu mwa tungwa etuwo romoukoto mu mamu tuwa Otjipwikiro tjOmerikutiropamwe wa Muhona. 20 Netuwo romokwara ndi ra ri nozometa muvyu koure na kouparanga na koutonga. Oro arihe ra vandekerwe nongoldo ongohoke. Ihi otjipunguhiro tja vandekerwe nomiti vyotupapa mbya hongwa. 21 Indji ondjuwo ya vandekerwe nongoldo moukoto; nouketanga oungoldo wa tyakanene pomahitiro wOtjouyapukeyapuke tji tja vandekerwe nongoldo wina. 22 Komuhingo mbwi Salomo otja vandeka ondjuwo ya Muhona aihe nongoldo moukoto; notjipunguhiro tjomOtjouyapukeyapuke tja vandekerwe nongoldo wina.

23 Neye wa ungura Ovakerubi vevari pomiti vyomiṋinga, auhe ngwa ri noure wozometa ndano, ne ve twa metuwo romokwara. 24 Otjivava atjihe tjomukerubi umwe tja ri noure wozometa mbari nohinga; okuza kohonga yotjivava tjimwe nga ku indji yotjivava otjikwao pa ri noure wozometa ndano. 25 Nomukerubi ingwi outjavari wina wa ri novivava vyoure wozometa ndano; aveyevari va ri nomuseka nomuhapo umwe. 26 Oure womukerubi auhe wa ri nozometa ndano. 27 Owo va zikwa ozombarakana mokati ketuwo romokwara, kokutja ovivava vyawo vivari mbya nyaturuka vi ṱunasane mokati ketuwo ndo, novivava imbi ovikwao vivari vi ṱune komakuma wetuwo ndo. 28 Novakerubi vevari mba va vandekerwe nongoldo.

29 Omakuma aehe wondjuwo ya Muhona, okutja wetuwo rokomurungu na inga wetuwo romokwara ya harekerwe noviserekarera vyovakerubi novyomavare novyozongara mbya kororwa. 30 Nandarire ondjuwo ya Muhona aihe pehi ya vandekerwe nongoldo.

31 Omivero vivari kumwe mbya ungurwa pomiti vyomiṋinga vya tuwa pomahitiro wOtjouyapukeyapuke; nozongambezero zomivero mbi za ungurirwe ovikoro vitano. 32 Imbi omivero vya harekerwe noviserekarera vyovakerubi novyomavare novyozongara. Omivero novakerubi nomavare vya vandekerwe nongoldo. 33 Pomahitiro wetuwo rokomurungu rondjuwo ya Muhona pa ungurirwe ozongambezero zomivero pomiti vyomiṋinga, nda ri novikoro vine. 34 Pa ri omivero vivari, mbi yangwa kumwe nu mbya ungurwa pomiparara. 35 Novyo vya harekerwe noviserekarera vyovakerubi novyomavare novyozongara mbya kororwa, naku tuwa ongoldo.

36 Nu pa tungirwe orupanda rwomahitiro komurungu wondjuwo ya Muhona ndwa ri nomakuma wotuteto tutatu peke twomawe nga hongwa, koruteto rumwe rwomiti vyotupapa.

37 Inga omazikameno wondjuwo ya Muhona ya zikirwe momueze outjavari Sif, mombura oitjaine youhona wa Salomo. 38 Momueze outjahambondatu Bul, mombura oitjamurongo na imwe youhona wa Salomo, ondjuwo ya Muhona otji ya manuka oparukaze okutungwa otja pu ye ripurwa. Salomo we i tunga oure wozombura hambombari.