Oviungura 18 - Herero Revision Bible (HRR)

Paulus mOkorinte

1 Kombunda yoviṋa mbi Paulus wa zire mOatene a i kOkorinte. 2 Koṋa ngo wa kahakaena nOmujuda wena Akuila, ngwa kwaterwa mOpontus, nu ngwa zire kOitalie puna omukazendu we Priskila, ombara Klaudius tjinga a rakizire kutja Ovajuda avehe ve ze mo mOroma. Paulus we keve varura, 3 nowo tjinga ava ri ovaungure vomarapi tjimuna ye, arire tja sekire pu wo nu ave ungura pamwe. 4 Eye aa patasana novandu mosinagoge mesabata arihe peke ama roro okurundurura omeripura wOvajuda nowOvagrike.

5 Silas na Timoteus tji ve ya okuza kOmakedonie, oruveze rwe aruhe Paulus wa panḓera pokuzuvarisa embo ra Ndjambi ama hongonona kutja Jesus onguri Omutwirisiwa. 6 Nowo tji va panḓera pokupataṋisa omambo we nokumuyamburura, arire tje ve pirukire nokupukumuna oruuma kozombanda ze na tja ku wo: “Tji mwa pandjara, eṋe oveni nga rire mbu mwe riturisa ondjo! Ami hi nokukara nomerizirira wotjiṋa hi. Okuzamba ami me kaungura mokati imba mbe he ri Ovajuda.” 7 Neye otje ve esa a katura mondjuwo yOmugrike wena Titus Justus, omurumendu ngwa ri nondira ku Ndjambi; ondjuwo ya Titus Justus ya ri meṋe yosinagoge. 8 Nu Krispus, omunane wosinagoge wa kamburire mu Muhona puna eṱunḓu re arihe; novature ovengi varwe va Korinte va zuva indi embo ra Ndjambi, ave kambura, narire tji va papitisiwa.

9 Ouṱuku umwe Muhona wa hungirire ku Paulus motjirimunikise a tja: “O tira, nungwari hungira nu o rihahiza, 10 Ami tjinga ambi ri puna ove. Kape nomundu ngu me ku tjiti otjipo, orondu ovature ovengi motjihuro hi owo ovandje.” 11 Paulus otja kara mo oure wombura imwe nomieze hamboumwe ama hongo ovandu indi embo ra Ndjambi.

12 Nu Galio tja za nokuzikwa okurira ongooneya yOmuroma ya Akaja, Ovajuda va woronganena Paulus ave mu kambura nave mu twara kotjombanguriro. 13 Owo va katja: “Omurumendu ngwi ma popere ovandu kokurikotamena ku Ndjambi momuhingo mbu ha i kumwe nomatwako!”

14 Paulus tja hara okuhungira, Galio arire tja tja nai kOvajuda: “Andakuzu otjiṋa hi tja ri ouhasemba poo ouvi mbwa tjitwa, atja rira osemba ku ami okukara nomuretima na eṋe Ovajuda. 15 Nungwari tjinga e ri ombatasaneno yomambo noyomana noyomatwako weṋu uriri, eṋe oveni ombu mwa sokuripurira otjiṋa hi. Ami hi nokuvanga okurira omupangure moviṋa otja imbi.” 16 Neye e ve ramba motjombanguriro. 17 Owo avehe va kambura Sostenes, omunane wosinagoge nu ave mu tonene momurungu wotjombanguriro. Nungwari Galio ka ningire ko na tja nangarire kaṱiṱi.

Paulus ma yaruka kOantiokie

18 Paulus wa kara puna ovakambure omayuva omengi mOkorinte, tjazumba e ve esa a kondo okuvare mondjuwoyomomeva puna Priskila na Akuila okuyenda kOsirie. Ngunda e hiya konda okuvare okuza kOkenkrea rutenga we rihorisa ozondjise mena roruyano eye ndwa tjitire. 19 Owo ve ya mOefese, nu Paulus tja ya, Priskila na Akuila ave sewa mo. Eye wa kahita mosinagoge na kayaruka okupatasana nOvajuda. 20 Ovandu ve mu ningira kutja a kare omayuva omare, nungwari eye ka vangere ko. 21 Notje ve virikiza nomambo nga: “Ndjambi tji ma vanga, ami me kotoka rukwao.” Narire tja kondo okuvare okuza kOefese.

22 Nu tje ya mOsesarea, wa ya kOjerusalem a kaminika ombongo, okuzambo a i kOantiokie. 23 Tja za nokukara omayuva tjiva mOantiokie, arire tja zu mo nu a tuurunga ehi ra Galatie nora Frigie ama yende ama zeuparisa ovakambure avehe.

Apolos mOefese na Korinte

24 Momayuva ngo Omujuda wena Apolos, ngwa kwaterwa mOaleksandrie, we ere kOefese. Eye wa ri nomirya mokuhungira, nu wa ri onongo tjinene momatjangwa. 25 Eye wa hongerwe ondjira ya Muhona, nu wa zuvarisa nonḓero onene na hongo ovandu noukahu imbi avihe mbya tjama na Jesus. Nungwari eye aa tjiwa indji ombapitisimo ya Johanes porwayo. 26 Apolos wa uta okuzuvarisa nouvanḓe mosinagoge. Priskila na Akuila tji ve mu zuva, arire tji ve mu twara koyawo nave kemumangururira nawa komurungu indji ondjira ya Ndjambi. 27 Apolos otje rimana okuyenda kOakaja, novakambure mOefese opu ve mu vaterera okutjanga orutuu kovakambure kOakaja okuveningira kutja ve mu yakure nawa. Neye tje ya ngo, wa rira ombatero onene ku imba mba rira ovakambure motjari tja Ndjambi, 28 tjinga a toṋa mozombata ze ozonene nOvajuda mokati kovandu ama raisa momatjangwa kutja Jesus onguri Omutwirisiwa.