Ombendukiro ya Kristus
1 Nu nambano, vakwetu, ami me vanga okumuzemburukisa Ombuze Ombwa, ndji mbe mu zuvarisira, nu ndji mwa yakura, nu wina mu mwa zikama. 2 MOmbuze Ombwa ndji eṋe mamu yamwa, tji mamu ṱakamisa yo otja tjinga ambe i zuvarisa ku eṋe; nu tje he ri nao, ongamburiro yeṋu atja rira omungandjo.
3 Ihi otjinanḓengu tjinene tji mba yandja ku eṋe, nu wina ami tji mba pewa, otjo hi: Kristus wa ṱira ourunde wetu, punga apa tjangwa momatjangwa; 4 Eye wa pakwa nu a pendurwa movakoke meyuva oritjatatu, punga apa tjangwa momatjangwa; 5 Eye we rimunikisa ku Petrus, ngu ya tjiukwa otja Kefas, nu kombunda yanao e rimunikisa kovahongewa mba omurongo na vevari. 6 Nu tjazumba eye we rimunikisa kovakambure, mba ri kombanda yotjivarero tjovandu omasere yetano, novengi vawo ingee oku ve ri nga ku ndinondi, nu tjiva va ṱa. 7 Nu kombunda e rimunikisa ku Jakobus, nu tjazumba a rire kovaapostele avehe.
8 Nu korusenina eye wina we rimunikisa ku ami ngu mba sana nomuatje a kwatwa oruveze aru hiya yenena. 9 Nami hapo owami omuhinanḓengu tjinene povaapostele avehe, nu hi yenene okuisanewa omuapostele, tjinga ee tatumisa ombongo ya Ndjambi. 10 Nungwari motjari tja Ndjambi ami mba tjitwa otja tjinga ambi ri nai, notjari eye tje ndji pa, katja ri omungandjo. Nu kombunda yanao ami mba ungura tjinene komeho okukapita ovaapostele ovakwetu avehe, nu ka ri ousore wandje omuini, nungwari a ri otjari tja Ndjambi tji tja ungura mu ami. 11 Nu nangarire kutja owami poo kutja owo mbena, ihi eṱe atuhe otji tu zuvarisa, neṋe omu mwa kambura.
Ombendukiro yovaṱi
12 Nambano eṱe tji tu zuvarisa kutja Kristus wa penduka movakoke, ovandu tjiva mokati keṋu mave sora vi okutja kape nombendukiro yovaṱi? 13 Nu tji pe hi nombendukiro yovaṱi, okutja Kristus wina ka pendurirwe movakoke; 14 nu Kristus tje ha pendurirwe movakoke, okutja omazuvarisiro wetu owo omungandjo, nongamburiro yeṋu wina omungandjo. 15 Kombunda yanao eṱe matu munika aayo twa tjitira Ndjambi omahongononeno wovizeze, tjinga atwa hongonona kutja eye wa pendura Kristus movakoke. Nu tjinangara pe ri nao kutja ovaṱi kave pendurwa movakoke, okutja Ndjambi ka pendurire Kristus movakoke. 16 Novaṱi tji ve ha pendurwa movakoke, okutja Kristus wina ka pendurirwe. 17 Nu Kristus tje ha pendurirwe movakoke, okutja ongamburiro yeṋu oyo omungandjo, neṋe ingee mu ri monḓomo yourunde weṋu. 18 Nu wina mape hee kutja imba mba ṱa ave nongamburiro mu Kristus, va pandjara. 19 Nomaundjiro wetu mu Kristus tje ri oworuveze ndwi uriri, okutja oweṱe ovaningisandjenda tjinene okukapita ovandu avehe mouye.
20 Nungwari Kristus, tjiri, wa pendurwa movakoke, nu ihi ku eṱe otjo ouatjiri wokutja imba mba ṱa, wina mave pendurwa movakoke. 21 Notja onḓiro punga aya etwa i omundu, ombendukiro yovakoke wina opunga amai etwa i omundu. 22 Notja ovandu avehe punga amave ṱu motjimbe tjokutja va za mu Adam, avehe opunga amave pendurwa movakoke motjimbe tja Kristus. 23 Nungwari auhe ma pendurwa movakoke mongongorasaneno: Kristus eye omutengatenga; tjazumba moruveze ndwi Kristus ndu ma kotoka a rire mba ova Kristus. 24 Nu kombunda yaimbi mape ya omaandero; Kristus ma yandeke omauvara aehe omanavita na Ndjambi na yarura ouhona ku Ndjambi Ihe. 25 Orondu Kristus u sokuhonapara nga Ndjambi tja twa ovanavita na ye avehe kehi yozombaze za Kristus. 26 Nomunavita omusenina ngu sokuyandekwa, oyo ndji onḓiro. 27 Orondu omatjangwa maye tja: “Ndjambi wa wisa oviṋa avihe kehi yozombaze ze.” Nu tji maku zu “oviṋa avihe”, omambo nga kaye nokuheya Ndjambi ngwa twa avihe kehi youvara wa Kristus. 28 Nungwari oviṋa avihe tji vya tuwa kehi youvara wa Kristus, okutja Kristus omuini, ngu ri Omuna, me riwisa omuini kehi ya Ndjambi ngwa twa avihe kehi ye, nu Ndjambi otji ma honaparere avihe okumana.
29 Nu nambano ovaṱi tji ve hi na maave pendurwa movakoke, imba mbe papitisirwa ovakoke ve tjitira tjike? Indu owo mave papitisirwa ovakoke mena ratjike? 30 Neṱe wina, okutjavi tji matu ritwa moumba wonḓiro oiri aihe? 31 Vakwetu, ami aruhe mbi kara moumba wonḓiro. Nohiviro, ndji mbi na yo mu eṋe mu Kristus Jesus, oMuhona wetu, ondji mai ndji pe omasa okuhatira onḓiro. 32 Ami tji mbi ri aayo mba rwire novipuka ovindandi muno mOefese komuhingo wovandu uriri, mape ndji vatere tjike? Ovakoke tji ve hi nokupendurwa “Ngatu rye nu tu nwe, orondu muhuka tjandje twa ṱu.”
33 Amu pukisiwa! “Otjikaro tjovandu ovavi tji zunḓa omihingo omiwa.” 34 Kotoreye ozondunge zeṋu ozosemba, nu iseye ozondjira zeṋu zourunde. Tjiva veṋu kave nondjiviro na Ndjambi. Nu ihi me hungirire kutja mu ṱohoṋi.
Orutu ndwa penduka
35 Mape ya rumwe omundu a pura nai: “Hapo ovakoke mave pendurwa vi? Mave kara norutu ndu ri vi?” 36 Mo pura vi ouyova nao? Tji wa kunu ondwi mehi, kai hapa ngunda rutenga ai hiya koka. 37 Ihi tji mo kunu katji nokurira otjihape tjorutu orunene ndwe kura. Ihi tji mo kunu otjo okandwi uriri, ngahino kovikokotwa poo kovikunwa ovikwao. 38 Nungwari Ndjambi u yandja orutu kondwi ndjo punga e vanga; nu kondwi aihe eye u yandja ko orutu rwayo peke.
39 Onyama yoviutwa avihe kanyama imwe tjingeyo; onyama yovandu i peke, nonyama yovipuka i peke, nonyama yozonḓera i peke, nonyama yozohi i peke. 40 Nu pe notutu tweyuru notutu twehi; oupwe wotutu twi tweyuru i peke koupwe waitwi twehi. 41 Eyuva ri noupwe waro peke, nomueze u noupwe wawo peke, nozonyose ze noupwe wazo peke; nu nangarire ozonyose ozeni nao aihe i noupwe wayo oini peke.
42 Otjinga ape ri nao nombendukiro yovaṱi: Orutu tji rwa pakwa, okutja rwa ṱu; nu tji rwa pendurwa karu uhara amaru ṱu. 43 Orutu tji rwa pakwa ru ngundipara naru zunḓaka; nu tji rwa pendurwa ru hara omasa noupwe. 44 Norutu tji maru pakwa orwo orutu rwoundu, nu tji rwa pendurwa orwo orutu rwombepo. Nu tjinga ape norutu rwoundu, wina otjinga ape sokukara orutu rwombepo. 45 Orondu omatjangwa maye tja: “Omundu ngwi omutenga Adam wa utirwe omunamuinyo”, nungwari Adam ingwi omusenina eye Ombepo, ndji yandja omuinyo. 46 Orutu ndwi rwombepo kandu ri orutenga, nungwari orondwi rwoundu, nu tjazumba a rire ndwi rwombepo. 47 Nu Adam ingwi omutenga wa memwa pehi, neye owehi; nu Adam ingwi outjavari wa zira meyuru. 48 Imba ovandu vehi ve ri otja ingwi Adam ngwa memwa pehi; nu imba veyuru ve ri otja ingwi Adam ngwa zira meyuru. 49 Otja tjinga atwa zarere osaneno yomundu ngwa memenwe pehi, otjinga amatu zara osaneno yOmundu ngwi ngwa zira meyuru.
50 Nu ihi tji me hee, vakwetu, otjo hi: Onyama nombinḓu kai nokusora okurumata ouhona wa Ndjambi. Nu ihi otjiṱe katji nokusora okurumata ouhona wa Ndjambi. Nu ihi otjiṱe katji nokusora okurumata ihi otjihaṱa.
51 Tareye, ami me mu tjivisa omaundikiro nga: Eṱe atuhe katu nakuṱa, nungwari atuhe matu tjitukisiwa. 52 Ihi matji tjitwa pohiva osenina tjimanga mombapaiziro yeho, orondu ohiva mai pose, novaṱi otji mave pendurwa otja ovahaṱa, neṱe mbu matu vazewa nomuinyo matu tjitukisiwa. 53 Orondu orutu ndwi oruṱe maru tjitukisiwa okurira indwi oruhaṱa, nu indwi ndu koka maru tjitukisiwa okurira indwi ndu ha koka. 54 Norutu ndwi oruṱe tji rwa tjitukisiwa okurira indwi oruhaṱa, nu orutu ndwi ndu koka tji rwa tjitukisiwa okurira indwi ndu ha koka, okutja omatjangwa maye yenenisiwa ngu maye tja: “Onḓiro ya yandekwa, noutoṋi wa yenenisiwa!”
55 “Nḓiro, outoṋi woye u ri pi?
Nḓiro, omasa woye wokuzepa ye ri pi?”
56 Omasa wonḓiro wokuzepa ye za mourunde, nourunde u isa omasa wawo mOmatwako. 57 Nungwari eṱe matu tja okuhepa ku Ndjambi ngu tu pa outoṋi mu Muhona wetu Jesus Kristus!
58 Nu vakwetu ovasuverwa, otji mamu sokuzikama nokuhinokuteratera. Nu aruhe ungurireye Muhona nokuhaurwa, tjinga amamu tjiwa kutja ongondjero yeṋu motjiungura tja Ndjambi oyo kamungandjo.
© Herero Revision Bible © Bible Society in Namibia, 2021.
