2 Ozombara 17 - Herero Revision Bible (HRR)

Hosea ma rire ombara mOisrael

1 Mombura oitjamurongo na mbari youhona wa Ahas, ombara ya Juda, Hosea, omuzandu wa Ela, otja rira ombara mOisrael; neye wa honapara oure wozombura muvyu mOsamaria. 2 Eye wa tura ondjo komurungu wa Muhona, nungwari ka katukire tjinene tjimuna inḓa ozombara nḓa honaparere komurungu we mOisrael. 3 Salmanasar, ombara ya Asirie, wa tjita ovita kuna ye. Hosea we riyandja okuhuurwa i Salmanasar nu aa sutu otjisuta tjouhona ombura aihe. 4 Nungwari ombura imwe Hosea wa tuma ovahindwa ku So, ombara ya Engipte, okuningira ombatero ku ye, na ha sutu otjisuta tjouhona tjombura aihe kombara ya Asirie. Salmanasar tja zuva otjiṋa hi, otja rakiza kutja Hosea a kamburwe na yumbwe motjovakamburwa.

Omawiro wa Samaria

5 Tjazumba Salmanasar wa rwisa Ovaisrael, na havere Samaria. Nombura oitjatatu yomahaverero nga, 6 ndja ri ombura oitjamuvyu youhona wa Hosea, ombara ya Asirie, otji ya kambura Samaria, ai twara Ovaisrael kOasirie otja ovahuurwa nai katurisa tjiva motjihuro Halak na tjiva popezu nonḓonḓu Habor, mehi ra Gosan, na tjiva movihuro vya Medie.

7 Samaria tja wa mena rokutja Ovaisrael va tura ondjo komurungu wa Muhona, Ndjambi wawo, ngwe ve kuturire kombara ya Engipte ne ve pitisa mehi ra Engipte. Owo ve rikotamena koomukuru vovisenginina, 8 nu va horera kovikaro vyoviwaṋa Muhona mbya rambere mehi otjiwaṋa tje tji tje ya, na kovikaro mbya etwa i ozombara za Israel. 9 Ovaisrael va tjita oviṋa Muhona, Ndjambi wawo, mbye ha vangere. Owo va tunga poṋa pomerikotameneno kovisenginina movihuro vyawo avihe, okuza kotjirongo otjiṱiṱiṱiṱi nga kotjihuro tjinenenene. 10 Owo va zika ozongunḓe zomawe noviserekarera vyomukuru wotjisenginina oserekaze Asera kozondunda azehe, na kehi yomuti ngamwa auhe womuzire 11 nave twimisire ovyomoro omuwa kovipunguhiro avihe vyovisenginina, amave horere kovitjitwa vyoviwaṋa Muhona mbya rambere mehi. Owo va pindikisa Muhona nozondjito zawo ozombi 12 nave ha kara nonḓuviro komarakiza wa Muhona, ngwe ve tjaera kutja ave he rikotamene koomukuru vovisenginina.

13 Muhona wa tumine ovahindwa novaprofete ve okukaronga Ovaisrael nOvajuda ama tja: “Iseye ozondjira zeṋu ozombi, nu kareye nonḓuviro komarakiza wandje nge ri momatwako ngu mba yandja kooiho mukururume na ku eṋe wina notjinyo tjovakarere vandje, imba ovaprofete.” 14 Nungwari owo kave karere nonḓuviro; va ri ovirangaranga tjimuna ooihe mukururume mbe ha ṱakamene mu Muhona, Ndjambi wawo. 15 Owo va panḓa okukara nonḓuviro komazikamisiro we, nu kave yenenisire omerikutiropamwe eye nga tjitire puna ooihe mukururume nave nyengwa omaronga we. Ve rikotamena koomukuru vovisenginina ovehinohepero, nowo oveni va rira oviporoporo nu va horera komihingo vyoviwaṋa vyopopezu na wo, amave kara nokuhinonḓuviro komarakiza wa Muhona nave ha horere ku wo. 16 Owo va katuka omatwako aehe wa Muhona, Ndjambi wawo, nave riungurire ozondwezu mbari zozongombe povitenda okurikotamena ku zo; wina va ungura otjiserekarera tjomukuru wotjisenginina oserekaze Asera, ave rikotamene kozonyose nave karere omukuru wotjisenginina Baal. 17 Owo va punguha ovazandu novasuko vawo okurira ozombunguhiro ozoningiririsiwa koomukuru vovisenginina; va kapura kozondjai na kozombetere nave riyandja oparukaze mokutjita imbi mbi ha tjatere ku Muhona; komuhingo mbwi otji ve mu pindikisa. 18 Muhona otja pindika nOvaisrael ne ve ramba komurungu we, na sye po imbwi ouhona wa Juda porwe.

19 Nungwari nandarire nao Ovajuda kave karere nonḓuviro komatwako wa Muhona, Ndjambi wawo; owo va horera komihingo vyOvaisrael. 20 Muhona opa imbirahira Ovaisrael avehe, e ve vere ne ve yandja kovanavita ovindandi, ngandu korusenina eye tje ve rambere komurungu we.

21 Muhona tja za nokuhaṋa Ovaisrael kOvajuda, Ovaisrael otji va zika Jerobeam, omuzandu wa Nebat, okurira ombara yawo. Jerobeam wa tjita kutja Ovaisrael ve poke ku Muhona wawo, ne ve turisa ondjo tjinene. 22 Owo va horera ku Jerobeam nave kara pokutjita omauvi aehe, eye nga tjita, 23 ngandu korusenina Muhona tje ve ramba komurungu we otja eye peverongere notjinyo tjovakarere ve, imba ovaprofete. Ovaisrael otji va twarewa otja ovahuurwa kOasirie ku va katura nga ku ndinondi.

Ovaasur mave tura mehi ra Israel

24 Ombara ya Asirie ya toora ovandu movihuro oObabilon na Kuta na Awa na Hamat na Sefarwajim, nai keveturisa movihuro vyehi ra Samaria, moruveze rwOvaisrael mba mba huurwa. Owo va kambura ovihuro mbi vi rire ouini wawo nave tura mu vyo. 25 Tji va uta okutura mo, kave rikotamenene ku Muhona; neye otje ve hindira ozongeyama nḓa zepa tjiva vawo. 26 Ombara ya Asirie ya raerwa kutja ovandu mbu ya turisire movihuro vyehi ra Samaria, kave tjivirwe omatwako womukuru wehi ndo; nu ingwi omukuru opa hindira ozongeyama nḓaa ze ve zepa. 27 Ombara ya Asirie otji ya rakiza nai tja: “Yarureye omupristeri umwe wa imba mbu twa eta otja ovahuurwa kutja a kature ngo na kahonge ovandu inga omatwako womukuru wehi ndo.” 28 Omupristeri Omuisrael ngwa etwa okuza kOsamaria otja yaruka, a katura kObetel na kahonga ovandu imbwi omuhingo wokurikotamena ku Muhona.

29 Nungwari ovandu, mba katura kOsamaria va kara pokuungura oviserekarera vyovisenginina vyawo oveni, nave vi twa mozondjuwo ozonḓere Ovaisrael nḓu va tungire. Otjimbumba atjihe peke tja ungura oviserekarera vyovisenginina motjihuro mu tja tura. 30 Ovandu, mba zire kObabilon va ungura oviserekarera vyomukuru wotjisenginina Sukot-Benot; novandu, mba zire kokuṱa va ungura oviserekarera vyomukuru votjisenginina Nergal; nu imba mba zire kOhamat va ungura oviserekarera vyomukuru wotjisenginina Asima; 31 novandu, mba zire kOiva va ungura oviserekarera vyoomukuru vovisenginina ooNibhas na Tartak; novandu, mba zire kOsefarwajim va punguhira oomukuru vovisenginina Adramelek na Anamelek ovanatje vawo ve rire ozombunguhiro ozoningiririsiwa. 32 Ovandu mba wina ve rikotamena ku Muhona, Ndjambi, nave toorora ovarumendu vorive motjivaro tjawo oveni kutja ve karerere otja ovapristeri mozondjuwo ozonḓere nokutja ve punguhire ozombunguhiro mu zo. 33 Komuhingo mbwi otjaave rikotamene ku Muhona na wina koomukuru vawo vovisenginina otja komihingo vyomahi ku va zira.

34 Owo ingee va kara nomihingo vyawo omikuru nga ku ndinondi; owo kave rikotamenene ku Muhona, nu wina kave karere nonḓuviro komazikamisiro na komatwako Muhona nga yandjere kozondekurona za Jakob, eye ngwa rukire Israel. 35 Muhona wa tjitire omerikutiropamwe na wo, ne ve rakiza a tja: “Amu rikotamene koomukuru varwe; amu ripete ku wo nokuvekarera nokuvepunguhira ozombunguhiro. 36 Nungwari tireye ami, ngu mbi ri Muhona, ngu mbe mu pitisa mOengipte neke enamasa; rikotameneye ku ami, nu ndji punguhireye ozombunguhiro. 37 Aruhe ṱakamiseye inga omazikamisiro nomatwako ngu mbe mu tjangera; amu tira oomukuru varwe, 38 nu amu zembi omerikutiropamwe ngu mba tjitire na eṋe. 39 Tireye ami, ngu mbi ri Muhona, Ndjambi weṋu, nami me mu yama kovanavita na eṋe avehe.” 40 Nungwari ovandu mbo kave puratenene ko, nowo va kara pokutjita omihingo vyawo omikuru.

41 Komuhingo mbwi ovandu mbo otji ve rikotamena ku Muhona, nungwari wina ve rikotamena koviserekarera vyovisenginina vyawo; nozondekurona zawo za kara pokutjita nao nga ku ndinondi.