David ma vara otjiwaṋa
(1Eku 21:1-27)1 Rukwao Muhona wa ṱomazenge nOvaisrael, notja kondjisa kutja David a yete oumba ku wo. Muhona wa tja nai ku ye: “Twende, kavare Ovaisrael nOvajuda.” 2 David otja tja nai ku Joab, omuhongore wotjimbumba tje tjovita: “Twende puna ovahongore voye, mu tuurunge omihoko avihe vya Israel okuza kOdan nga kOberseba, nu mu kavare otjiwaṋa. Ami me vanga okutjiwa kutja mu novandu vengapi mehi ndo.”
3 Nungwari Joab wa zira kombara a tja: “Muhona, Ndjambi woye, nga takavarise otjiwaṋa tja Israel potumasere komurungu waindu pu tji ṱeki nambano, nove kara nomuinyo u mune omuini eye tji ma tjiti otjiṋa hi. Nungwari okutjavi ove, muhona wandje ombara, tji movanga okutjita nao?” 4 Nungwari ombara ya tjita kutja Joab novahongore ve ve zuve komarakiza wayo. Owo va za pu yo, nave kavara otjiwaṋa tja Israel.
5 Owo va konda onḓonḓu Jordan nave katona ozondanda komukuma wokeyuva kokumuho kwa Aroer, otjihuro tji tji ri morutjandja mehi ra Gad. Okuzambo otji va ya komukuma wokeyuva kokunene kwa Jaser, 6 nave i kOgilead na kOkades kehi rOvaheti. Tjazumba otji va ya kOdan, nokuza kOdan va kondoroka komukuma wokongurova okuyenda kOsidon. 7 Nowo va ya keyuva kokumuho kwotjihuro otjinamasa Tirus, na kovihuro avihe vyOvahevi novyOvakanaan, narire tji va kayandera kOberseba, komukuma wokeyuva kokumuho kwa Juda. 8 Nu kombunda yomieze muvyu nomayuva omirongo vivari otji va kotoka kOjerusalem, tji va za nokukaryanga mehi arihe. 9 Owo va tjivisa otjivaro atjihe kumwe tjotjiwaṋa kombara; nu ihi otjivaro tjovarwe vOvaisrael wovita tja ri 800,000, nu ihi tjOvajuda tja ri 500,000.
10 Nungwari David tja za nokuvara otjiwaṋa, omeripura we otji ye mu zunga, na tja ku Muhona: “Ami mba tura ondjo onene tji mba tjita nai: Arikana, Muhona, ndji isira, tjinga amba tjita ouyova.”
11 Nu Muhona wa tja nai komuprofete Gad, ombuke ya David: 12 “Twende, u karaere David kutja ami me mu pe oviṋa vitatu okutoorora; nu ihi tji ma toorora, otji me mu tjitire.” Nu mependukirwa David tja penduka, 13 Gad weya ku ye ne mu tjivisa imbi Muhona mbya hungire, ne mu pura a tja: “Otjiṋe tji matji kara po? Ozombura ndatu zourumbu mehi roye poo omieze vitatu vyokutaura kwovanavita na ove poo omayuva yetatu womutjise omuzeu mehi roye? Nambano ripura u ndji raere eziriro, ndi me yarura ku Muhona ngwe ndji hindi.”
14 David wa zira a tja: “Ami mbi ri mombamisiro onene! Nungwari hi nokuvanga okuverwa i ovandu. Muhona nga rire ngwe tu vere, eye tjinga e notjari.” 15 Nu Muhona otja hinda omutjise omuzeu mOvaisrael okuza komuhuka mbo nga koruveze eye ndwa twa po. Okuza kOdan nga kOberseba mwa ṱa Ovaisrael 70,000. 16 Nomuengeri wa Muhona tja hara okunyona Jerusalem, Muhona we rivingurura momeripuriro we wokuvera ovandu, na tja komuengeri nguye ve zepa: “Nambano opuwo! Yarura eke roye!” Nomuengeri wa Muhona wa ri potjitondero tjOmujebusi Arauna.
17 David tja muna omuengeri ama zepa ovandu arire tja tja ku Muhona: “Owami ngu mbi nondjo, owami ngu mba tataiza. Otjiwaṋa hi tja ungura tjike? Vera ami neṱunḓu randje!”
18 Meyuva tjingero ndo Gad wa ya ku David na katja nai ku ye: “Twende kotjitondero tja Arauna, u katungire Muhona otjipunguhiro.” 19 David wa kara nonḓuviro komarakiza wa Muhona, notja ya otja Gad pe mu raera. 20 Nu Arauna tja yevayeva na munu ombara novahongore vayo amave rondo ku ye, arire tje ve tjakanene na u onḓurumika komurungu wa David. 21 Tjazumba Arauna we mu pura a tja: “Muhona wandje ombara we ere tjike mba?”
David wa zira nai: “Mbe ya okuranda ehi roye rotjitondero okutungira po Muhona otjipunguhiro kutja omutjise omuzeu u yandje motjiwaṋa.”
22 Arauna wa tja nai ku David: “Muhona wandje ombara, kambura avihe mbi movanga, kapunguhire Muhona atjihe tji matji tjata kove. Ozongombe ozo nḓa okuzeningirisa ze rire ombunguhiro oningiririsiwa kotjipunguhiro; noviti ovinane na imbi vyovitondero okuisapo ozonguṋe zomuriro, ovyo mbi.” 23 Arauna wa yandja avihe mbi kombara na tja ku yo: “Muhona, Ndjambi woye, nga yakure ombunguhiro yoye.”
24 Nombara ya zira, ai tja: “Kako, ami me ku sutu. Ami hi nokupunguhira Muhona, Ndjambi wandje, ozombunguhiro nḓu mbi ha sutire ko otjiṋa.” Nu David wa randa otjitondero nozongombe kovimariva ovisilveri omirongo vitano. 25 Neye wa tungira Muhona otjipunguhiro mbo, na punguha ozombunguhiro ozoningiririsiwa nozohange. Muhona wa tjariparera ehi ndo, notjiṱiro mOvaisrael arire tji tja yanda.
© Herero Revision Bible © Bible Society in Namibia, 2021.
