1 Indji oyo ombuze ya Muhona ndje ya ku Sefanja moruveze ndwi Josija, omuzandu wa Amon, tja ri ombara ya Juda. Sefanja wa ri omuzandu wa Kusi, omuzandu wa Gedalja, omuzandu wa Amarja, omuzandu wa Hiskija.
Eyuva rombanguriro ya Muhona
2 Muhona wa tja nai: “Ami me yandeke oviṋa avihe kombanda yehi, 3 ovandu avehe novinamuinyo nozonḓera nozohi; me isa mo ovarunde. Me kombozora ovandu avehe; nu kape nomundu ngu ma hupu. Ami, ngu mbi ri Muhona, owami ngu mba hungire.
4 “Me vere ovature va Jerusalem nOvajuda avehe. Me kombozora ondambo osenina mbo yokurikotamena ku Baal, nu kape na nangarire umwe ngu ma zemburuka ovapristeri vovisenginina mbe karera Baal. 5 Ami me yandeke omundu ngamwa auhe ngu ma rondo komututu wondjuwo e rikotamene keyuva na komueze na kozonyose. Ami wina me yandeke imba mbe rikotamena ku ami nu mbe yana ku ami, nungwari moruveze tjingero ndo ave tjiti oruyano mena romukuru wotjisenginina Milkom. 6 Ami me yandeke imba mba poka ku ami nu mbe he tji ndji kongorere, imba mbe he ya ku ami nokundjiningira kutja mbi ve hongorere.”
7 Eyuva ra Muhona riri popezu, eyuva Muhona mu me rirongerere okuzepa otjiwaṋa tje tji rire ombunguhiro; otji mamu sokumwina momurungu wa Muhona Ndjambi. 8 Muhona ma tja nai: “Meyuva ndo romazepero ami me vere ovahongore novanatje ovazandu vombara, na imba avehe mbe horera kovikaro vyovandu wozonganda. 9 Ami me vere avehe mbe rikotamena otja ovanavisenginina tji ve tjita, nu mbe vaka nokuzepa ve urise ondjuwo youhona yombara yawo novipunda.”
10 Muhona ma tja nai: “Meyuva ndo eṋe mamu zuu ombosiro pOmuvero wOhi mOjerusalem. Mamu zuu omaririro morukondwa orupe rwotjihuro, nomaporokotero omanene mozondunda. 11 Rireye nu mu ure tji mamu zuu otjiṋa hi, eṋe mbu mwa tura morukondwa rwokehi rwotjihuro, orondu ovarandise avehe novataure vovimariva mave ṱu!
12 “Moruveze ndo ami me toora emunine nu me konḓonona Jerusalem. Me vere ovandu mbe rivara kutja ovanahepero, nu mbe riyameka ku wo oveni, mbe rihungirira nai: ‘Muhona kamaa tjiti ouwa poo ouvi.’ 13 Outumbe wawo mau pundwa, nozondjuwo zawo maze haṋewa. Owo kamaave tura mozondjuwo nḓu mave tungu, nu kamaave nu omavinu womivite mbi mave kunu.”
14 Eyuva enene ra Muhona ri ri popezu, ri ri popezu tjinene, nu mari ya tjimanga! Oro mari rire eyuva etirise tjinene, nangarire omurwe wovita ombanḓe ma uru nomerihahiziro! 15 Oro mari rire eyuva romazenge, eyuva roumba norombamisiro, eyuva romanyoneno noromayandekero, eyuva ronḓorera noromuzororema, eyuva rovikamba nezorozu, 16 eyuva nde ura nombosiro yozohiva zovita nondjuriro yovarwe wovita mbu mave rwisa ovihuro ovinamasa notuhungu oture.
17 Muhona ma tja nai: “Ami me eta oviwonga komundu ngamwa kokutja auhe a tambatambe tjimuna omupoṱu. Owo va tura ondjo komurungu wandje, nu nambano ombinḓu yawo mai tirahiwa tjimuna omeva, noturova twawo matu saravara pehi atwa woro.”
18 Meyuva Muhona mu ma raisa omazenge we nangarire osilveri nongoldo aihe yawo kamaai ve yama. Ehi arihe mari nyosiwa i omuriro womazenge we. Eye ma twa po omaandero, omaandero watjimanga kovature avehe mbe ri kombanda yehi.
© Herero Revision Bible © Bible Society in Namibia, 2021.
