Muhona ma kwizike okuyarura kOjerusalem
1 Muhona Omunamasaaehe wa yandja ombuze ndji ku Sakaria a tja: 2 “Ami mba zera okuvatera Jerusalem, tjinga ambi norusuvero orunene tjinene kovature vatjo, indwi orusuvero ndwe ndji pa omazenge novanavita na tjo. 3 Ami me yaruka kOjerusalem, otjihuro tjandje otjiyapuke, nu me katura ngo. Otjo matji tjiukwa otja otjihuro otjiṱakame, nu ondundu ya Muhona Omunamasaaehe mai isanewa kutja ondundu ondjapuke. 4 Ovakururume novakurukaze mba kurupa tjinene nai nga tji ve ṱaṱera kouti mave haama rukwao motupare twotjihuro. 5 Nu nomivanda vyatjo mamu nyandere ovanatje ovengi, ovazandu novakazona.
6 “Otjiṋa hi matji munika aayo otjikumise kovandu mba votjiwaṋa hi nambano mba hupa, nungwari otjo katjikumise ku ami. 7 Ami me yama otjiwaṋa tjandje komahi ku tja twarewa, 8 nu meve kotora okuza komuhuka na kongurova kutja ve ye okutura mOjerusalem. Owo mave rire otjiwaṋa tjandje, nami me rire Ndjambi wawo ngu meve honaparere nouṱakame nousemba.
9 “Panḓipareye! Eṋe nambano mamu zuu omambo tjingewo nga hungirirwe i ovaprofete moruveze ndwi omazikameno wokutungurura ondjuwo yandje tji ya utwa. 10 Komurungu woruveze ndo omundu kaa munu ondjambi moviungura vye, nu kapa ri ovikurya kovinamuinyo; pa ri oumba ku ngamwa auhe wokurwisiwa i omunavita na ye. Ami mba handjisa ovandu kutja ve rwisasane. 11 Nungwari nambano ovandu mba votjiwaṋa hi mba hupa, meve ṱunu omuhingo warwe. 12 Owo mave kunu ovikunwa vyawo mohange. Omivite vyawo mavi eta omandjembere. Ehi mari hapisa ovihape, nu maku roko ombura onyingi tjinene. Ami me yandja ozondaya azehe nḓa kovandu votjiwaṋa tjandje mba sewa po. 13 Vajuda nOvaisrael! Momayuva nga kapita ovandu wozonganda aave sengasana nai: ‘Otjiwonga tjingetjo tji tja wire kombanda ya Juda na Israel, wina ngatji wire kombanda yeṋu!’ Nungwari ami me mu yama, nu tjazumba ovandu wozonganda mba mave mu sengi ave tja: ‘Ondaya tjingeyo ndji ndje ya kehi ra Juda nora Israel wina ngai yandjewe ku eṋe.’ Panḓipareye nu amu tira!”
14 Muhona Omunamasaaehe ma tja nai: “Ooiho mukururume tji ve ndji pindikisa, ami mbe ve tyera otjiwonga, nu hi rundururire omeripura wandje, nungwari mbe ye yenenisa. 15 Nambano ami me tye okusera ovature va Jerusalem nOvajuda ondaya. Nu amu tira. 16 Oviṋa mbi mwa sokutjita ovyo mbi: Serekarerasaneye ouatjiri; mozombanguriro pangureye nousemba, imbwi ousemba mbu eta ohange. 17 Amu ripura omihingo vyokuhihamisasana; amu yana omahongonona woposyo. Ami mba tonda ovizeze nouhasemba nozondjito zoutwe.”
18 Muhona Omunamasaaehe wa yandja ombuze ndji ku Sakaria: 19 “Omeritjaerero kovikurya nga tjitwa momueze outjaine noutjatano noutjahambombari noutjamurongo maye rire omayuva omanene wondjoroka nowenyando kotjiwaṋa tja Juda. Opu mamu sokusuvera ouatjiri nohange.”
20 Muhona Omunamasaaehe ma tja nai: “Omayuva maye ya oviwaṋa ovingi novature vovihuro ovinene mu mave ya kOjerusalem. 21 Imba mbu mave zu kotjihuro tjimwe mave tja ku imba mbu mave zu kotjihuro tjarwe: ‘Eṱe matu kerikotamene ku Muhona Omunamasaaehe nu atu kakumbira ondaya ye. Indjeye puna eṱe!’ 22 Oviwaṋa ovingi nomihoko ominamasa mavi ya kOjerusalem okurikotamena ku Muhona Omunamasaaehe nokukumbira ondaya ye. 23 Momayuva ngo ovandu wozonganda omurongo mave ya kOmujuda umwe ave tja: ‘Matu vanga okurikuta kuna eṋe, tjinga atwa zuva kutja Ndjambi u ri puna eṋe!’ ”
© Herero Revision Bible © Bible Society in Namibia, 2021.
