Otjirimunikise tjembo emangwa ndaari tuka
1 Ami mba tara kombanda rukwao, notjikando hi mba muna embo emangwa ndaari tuka meyuru. 2 Omuengeri we ndji pura kutja me munu tjike. Nami e ziri e tja: “Me munu embo emangwa ndi mari tuka meyuru; oro ri nozometa muvyu koure, nozometa ine nohinga kouparanga.”
3 Neye wa tja nai ku ami: “Mu ro mwa tjangwa osengiro, ndji mai piti mehi arihe. Mu ro mwa tjangwa kutja erunga arihe mari isiwa mo mehi; nu rukwao mwa tjangwa kutja auhe ngu ma kora ovizeze mokuyana ena ra Muhona wina ma isiwa mo. 4 Muhona Omunamasaaehe ma tja eye ma hindi osengiro ndji, noyo mai hiti mondjuwo yerunga arihe na mondjuwo yangamwa auhe ngu kora ovizeze mokuyana ena re. Oyo mai kara mozondjuwo zawo nai ze esa omatundu.”
Otjirimunikise tjomukazendu motjimbamba
5 Omuengeri wa munika rukwao na tja: “Tara otjiṋa tji matji yende ho!”
6 Ami mba pura nai: “otjikeṋa?”
Nomuengeri wa zira a tja: “Otjimbamba, notjo matji hee ouvi wehi arihe.”
7 Otjimbamba tja ri notjikamo tji tja ungurwa pohanga. Ami ngunda ame tarere, otjikamo tja paturuka nu motjimbamba mwa haamene omukazendu.
8 Omuengeri wa tja nai: “Omukazendu ngwi ma hee ourunde.” Tjazumba arire tja undurire omukazendu pehi motjimbamba na yarura ko otjikamo. 9 Ami mba era omeho ne munu ovakazendu vevari mbaa ve tuka ava hungama ami; owo va ri novivava ovinamasa tjimuna imbi ovyendongo, nu arire tji va toora ihi otjimbamba nave tuka na tjo.
10 Ami mba pura omuengeri e tja: “Otjimbamba hi mave tji twara pi?”
11 Eye wa zira nai: “Mave tji twara kehi ra Babilon ku mave ketjitungira ondjuwo onḓere. Ondjuwo onḓere tji ya manuka, otjimbamba matji tuwa mu yo okurikotamenwa.”
© Herero Revision Bible © Bible Society in Namibia, 2021.
