1 Okuza ku Paulus, omukarere wa Ndjambi nomuapostele wa Jesus Kristus.
Ami mba pewa otjiungura tjokuvatera ongamburiro yovatoororwa va Ndjambi nokuvehongorera kondjiviro youatjiri, imbwi ouatjiri mbu ma u ve vatere okuhupa otja kombango ya Ndjambi, 2 nu mbu yandja omaundjiro komuinyo waaruhe. Ndjambi ngu ha wovisa we tu kwizikira rukuru omuinyo waaruhe mbwi. 3 Nambano eye wa tjiukisa embo re moruveze orusemba momazuvarisiro, nga yandjewa ku ami i Ndjambi, Omuyame wetu.
4 Ami me tjanga ku Titus, omuatje wandje watjiri mongamburiro.
Ndjambi Tate na Kristus Jesus, Omuyame wetu, nge ku pe otjari nohange!
Oviungura vya Titus mOkreta
5 Ami mbe ku esa mOkreta kokutja u ṱune oviṋa ingee mbi hiya manuka, nokutja u zike ovanene wombongo movirongo pekepeke. Zemburuka omaraerero wandje nga: 6 Omunene wombongo u sokukara notjikaro otjiwa; ma sokurira omurumendu womukazendu umwe; novanatje ve ve sokurira ovakambure, nu kave sokukara nongaro youndandi na mokurira ovahazuva. 7 Omunene wombongo eye aruhe omutye woviṋa vyombongo ya Ndjambi. Opa sokukara notjikaro otjiwa, nu ka sokurira otjirangaranga, a ha ṱomazenge tjimanga, a ha suvere omanuwa, a ha rire otjindandi nu a ha nanukire ovimariva. 8 Ma sokukara nondjiririsa nokusuvera ouwa, ma sokukara nozondunge nousemba noupore nomeritjaerero. 9 Eye nga kakatere kembo rouatjiri eṱakame eye ma hongwa. Komuhingo mbwi otji ma yenene okuyanḓiparisa ovakwao nomahongero wouatjiri, na wina okuraisa ozondataiziro zaimba mbe pirukira omahongero nga.
10 Pena ovandu ovengi, tjinene overitanaure mokati kOvajuda, mbe hungira oviporoporo nu mbe wovisa ovandu; tjinene imba mbe ṋiṋikiza omasukarekero otja ondjamo. 11 Owo mave sokumwinisiwa; ve zunḓa ozonganda pekepeke mokuhonga oviṋa, mbi ve ha sokuhonga, navihe ve vi tjitira okumuna ovimariva nokuhinohoṋi. 12 Umwe wovandu vawo, omuprofete wawo oveni, wa tjere: “Ovakrete owo aruhe ovanavizeze, owo ovipuka ovinauvi, nu ovanararu ovanatjirweyo.” 13 Nomahongononeno nga owo ouatjiri. Opu wa sokuvevyura oukukutu kutja ve rire ovaveruke mongamburiro. 14 Owo ave he tji ritwa movimbaharere vyOvajuda na momihingo vyovandu, mba nakaura ouatjiri. 15 Kovakohoke oviṋa avihe vari ovikohoke; nungwari ku imba ovahakohoke novahakambura kape notjiṋa tji tji ri otjikohoke, ozondunge zawo nomeritjiviro wawo womomutima tjinga avya zunḓaka. 16 Owo ve tja ve tjiwa Ndjambi, nungwari ovitjitwa vyawo vi pataṋa otjiṋa hi; owo ovayaukise novahazuva, nu kave sora okuungura ngamwa otjiungura otjiwa.
© Herero Revision Bible © Bible Society in Namibia, 2021.
