Rut wa munu omurumendu
1 Naomi wa tja nai ku Rut: “Muatje wandje, ami me ku pahere omurumendu kutja u kare nonganda. 2 Tara, Boas, ingwi wovakarere ovasuko mbu mu ungura pamwe, eye iumwe womuhoko wetu. Nambano puratena, ongurova ndinondi eye ma pukumuna ovirya. 3 Rikoha u rivave, nu u rihwikike ozombanda zoye inḓa ozombwa tjinene. Tjazumba twende ngo, eye ku ma pukumunine ovirya; nungwari o rimunikisa ku ye ngandu tja mana okurya nokunwa. 4 Neye tja karara, ove tarera nawa poṋa puma karara. Ryama u yere otjirare kozombaze ze nu u rare mbo. Neye otji me ku raere kutja mo tjiti vi.”
5 Nu Rut wa zira a tja: “Atjihe tji mo hee, me tjiti.”
6 Rut otja sekama na i poṋa pomapukumunino wovirya na katjita otja ina omukwe punga e mu raere. 7 Nu Boas tja mana okurya nokunwa eye wa nyanda omutima na karara pondundu yovirya. Rut wa ka wondja ongumumu na kayera otjirare kozombaze za Boas, narire tja rara mbo. 8 Mouṱuku Boas wa yanḓimuka tjimanga, narire tja tanauka na uruma tjinene tja muna omukazendu ngwa rara pozombaze ze. 9 Neye wa pura omukazendu ngwi na tja: “Oovyaṋi?”
Neye wa zira nai: “Owami Rut, omukarere woye, nu kutjira otjikoro tjotjikutjire tjoye kombanda yomukarere woye, tjinga au ri omuzamumwe wopopezu nu au nousemba wokukara nourizirira ku ami.”
10 Eye wa zira a tja: “Ngo serwe ondaya i Muhona, muatje wandje. Ove wa toorora orusuvero rwoye orusenina nawa pu indwi orutenga, tjinga au ha pahere omurumendu omutanda, indu kutja omusyona poo omutumbe. 11 Nambano o tira, kako, muatje wandje! Orondu auhe motjirongo ma tjiwa kutja oove omukazendu omuhuze. Atjihe tji mo ningire ami me ku tjitire. 12 Ouatjiri ingwi okutja owami omuzamumwe wopopezu na ove nokutja mbi nousemba wokukara nourizirira naove; nungwari pena omurumendu warwe ngu ri omuzamumwe woye wopopezu pu ami. 13 Rara mba ouṱuku mbwi; nu muhuka omunene eṱe matu tara kutja omurumendu ngo ma kara nourizirira kove. Tje ri nao, osemba! Nu tji pe he ri nao, tjiri, tjimbe tja Muhona omunamuinyo, ami me kara nourizirira kove. Rara mba nga tji pa tji.”
14 Rut opa rarera pozombaze za Boas nga komuhuka na penduka menyunguhuka kutja a ha munika. Orondu Boas we ripura nai: Ape ningi ngu ma tjiwa kutja omukazendu ngwi we ere mba. 15 Boas wa tja nai ku ye: “Eta orupera ndu we rikutjire, nu u ru nyaturure.” Rut wa tjita nao, nu Boas wa tirira mo ovirya ozokirograma mangara omirongo vivari, ne mu twike. Tjazumba Rut arire tja yaruka kotjirongo.
16 Nu Rut tje ya ku ina omukwe, ingwi we mu pura a tja: “Pa kakara vi, muatje wandje?”
Rut we mu raera avihe Boas mbya tjita ku ye. 17 Komeho wa tja: “Eye wina we ndji pe ovirya mbi avihe, orondu eye we ndji raere kutja ngee kotoka kove nokuhinotjiṋa.”
18 Nu Naomi wa zira nai: “Nambano kara nomuretima, muatje wandje, ngandu indu tji wa tjiwa kutja otjiṋa matji kayenda komuhingo uṋe. Orondu Boas kamaa suva ndinondi nga tja mana otjiṋa hi.”
© Herero Revision Bible © Bible Society in Namibia, 2021.
