Rut mehi romakunino ra Boas
1 Naomi wa ri nomuzamumwe wena Boas, omurumendu omutumbe nomutjiukwa, nu ngwa zire meṱunḓu romurumendu we Elimelek.
2 Eyuva rimwe Rut wa tja nai ku Naomi: “Ndji esa mbi yende komahi womakunino okukawonga ovihweka mbi ovakonde mbi mave vyesa; ami me kayenda ame nyanganyanga kombunda yaingwi ngu me ndji yandjere.”
Naomi wa zira a tja: “Twende, muatje wandje!”
3 Rut opa sekamena okuyenda komahi womakunino na kakongorera ovakonde ama nyanga ovihweka. Komuhingo mbwi Rut otja ya kehi romakunino ra Boas, omuzamumwe wa Elimelek.
4 Kombunda yanao Boas omuini weya okuza kObetlehem. Neye wa minika ovaungure na tja: “Muhona nga kare puna eṋe!”
Nowo va zira ave tja: “Muhona nge ku sere ondaya!”
5 Boas arire tja pura komukarere we, ingwi omutarere wovaungure, na tja: “Omukazendu omutanda ngwi owauṋe?”
6 Omukarere ngwi wa zira a tja: “Eye omukazendu wozonganda ngwa kotoka puna Naomi okuza kOmoab. 7 Neye we ndji ningire kutja mbi mu yandjere a nyange ovihweka mokati komikuta kombunda yovakonde. Neye wa utu okunyanga okuza komuhuka omunene ngandu tja hirimana nai okusuva kaṱiṱi momuzire.”
8 Boas wa tja ku Rut: “Puratena ku ami, muatje wandje; o nyanga ovirya kwarwe posi yomehi romakunino ndi. Kara mba u ungure puna ovakazendu. 9 Ve tjevera, u tarere koṋa ku mave kondo ovirya, nu u kare puna wo. Ami mba rakiza ovakarere vandje kutja ave he ku tjiti ouhahu. Nu tji wa ṱonyota, twende u kanwe omeva ngu va tekere movikuve.”
10 Nu Rut wa wa onḓurumika komurungu wa Boas na tja ku ye: “Okutjavi tji u notjari na ami nu mo rikendere ami nai, ngu mbi ri owozonganda?”
11 Nu Boas we mu zira a tja: “Ami mba raerwa avihe, mbi wa tjita ku nyoko, ingwi omukwe woye, okuza konḓiro yomurumendu woye. Ami me tjiwa kutja wa isa iho na nyoko nehi reṋu, nu weya okutura mokati kovandu mbu u hi naa we ve tjivirwe rukuru. 12 Muhona, Ndjambi wa Israel, ku weya okupaha ondjamo, nge ku sutire po avihe, mbi wa tjita, nu nge ku pe ondjambi ndja yenene.”
13 Nu Rut wa zira a tja: “Muhona, ove u nondjiririsa ku ami; ove we ndji huhumiṋa tji wa hungire noutarazu ku ami, omukarere woye, nandarire kutja hi ṱeki pu umwe wovakarere voye.”
14 Nu pomariro Boas wa tja nai ku Rut: “Ryama nguno; kambura okahumburwa nu u ke tjaveke movitjatise.” Rut otja haama puna ovaungure, nu Boas arire tje mu pe ovikurya mbya ngarurwa, neye wa rya nga tje kuta na hupisa tjiva. 15 Rut tja sekama okunyanga ovirya rukwao, Boas wa rakiza kovakarere ve a tja: “Mu eseye a nyange ovirya nandarire mokati komikuta, nu amu mu humbu, kako. 16 Nu povikandokando naneye ovihweka momikuta nu mu vi ese pehi kutja a toore; nu amu mu tjaere, kako.”
17 Rut otja nyanga ovihweka vyovirya mehi romakunino nga kongurova; nu tja pukumuna ovirya mbi mbya nyanga wa wonga ozokirograma mangara omurongo. 18 Neye wa toora ovirya vye na yaruka kotjirongo okukeviraisa ku ina omukwe we kutja wa nyanga mbi ṱa pi. Nu wina wa toora ovikurya mbya hupisa pomariro ne kemupa. 19 Naomi we mu pura nai: “Ovirya mbi wa nyanga pi ndinondi? Wa kaungurire mehi romakunino rauṋe? Ndjambi nga sere ondaya komurumendu ngwe ku tjariparere.”
Rut otja raera Naomi kutja eye wa kaungurire mehi romakunino romurumendu wena Boas.
20 Naomi arire tja tja nai ku ye: “Eye nga serwe ondaya i Muhona, ngu ha isa ko ondjingonekero ye kovanamuinyo novakoke.” Neye wa hungira komurungu na tja: “Omurumendu ngo omuzamumwe wopopezu na eṱe, eye iumwe wa imba mbe nousemba okutuzirira po.”
21 Rut wa tja ku ina omukwe: “Kombanda yaavihe eye we ndji raere kutja hi ungure puna ovakarere ve, ngandu owo tji va mana omakondero aehe.”
22 Naomi wa tja ku Rut: “Okokuwa kove, muatje wandje, okuyenda puna ovakarere va Boas ovasuko komurungu wokuyenda kehi romakunino romundu warwe, ku mo katjitwa navi.” 23 Rut otja ungura puna ovakarere ovasuko va Boas na nyanga ovihweka nga omakondero wovirya nowovikokotwa tji ya yanda. Neye wa kara mbo na tura puna ina omukwe we.
© Herero Revision Bible © Bible Society in Namibia, 2021.
