Ndjambi notjiwaṋa tje Israel
1 Ami me hungire ouatjiri; owami owa Kristus, nu hi nokukora ovizeze. Nomeritjiviro wandje womomutima nge nanwa i Ombepo Ondjapuke, wina ma e hongonona puna ami kutja hi nokukora ovizeze, 2 tji me tja mbi noruhoze orunene, nokutja mbi nomuhihamwatima 3 kovakwetu, imba womuhoko wandje omuini. Ami etje zera kutja mbi sengwe i Ndjambi nokuporwa ku Kristus andakuzu ma rire ondjamo ku wo. 4 Owo Ovaisrael, otjiwaṋa otjitoororwa tja Ndjambi; we ve isa po ovanatje ne ve vandururire ounene we; eye wa tjita omerikutiropamwe omengi na wo, nu we ve pere Omatwako wa Moses; owo va perwe omerikotameneno watjiri nomakwizikiro wa Ndjambi; 5 owo va zire mozondekurona za Abraham na Isak na Jakob; nu wina Kristus, ongaro ye otja omundu, wa zire momuhoko wawo. Nu Ndjambi ngu honaparera avihe nga hivirikwe aruhe nga aruhe! Amen.
6 Ami hi nakutja omakwizikiro wa Ndjambi kaye toṋene, orondu kava Israel avehe mbe ri ovotjiwaṋa tja Ndjambi. 7 Nu wina kazondekurona azehe za Abraham nḓe ri ovanatje Ndjambi mba kwizikira Abraham. Ndjambi wa tjere ku Abraham: “Mu Isak ove mo munu mo ozondekurona nḓu mbe ku kwizikira.” 8 Ihi matji hee kutja ovanatje, mba kwatwa komuhingo wovandu owo kavanatje va Ndjambi; nungwari ovanatje mba mba kwatwa otja komakwizikiro wa Ndjambi owo ombe varwa otja ozondekurona za Abraham. 9 Orondu omakwizikiro wa Ndjambi ya yenenisiwa momambo nga: “Moruveze tjingero ndwi mombura ndji mai yende ami me kotoka, nu tjandje Sara u nomuatje omuzandu.”
10 Nu kapuwo! Ovanatje ovazandu vevari va Rebeka va ri ovaihe imwe, ingwi tate mukururume Isak. 11-12 Nungwari kokutja omatoororero womuzandu umwe ye yenenisiwe otja kombango ya Ndjambi omuini, Ndjambi otja tja ku Rebeka: “Omuatje ingwi erumbi ma karere ingwi omuangu.” Eye wa hungira omambo nga owo ngunda ave hiya kwatwa, nu ngunda ave hiya tjita ouwa poo ouvi; komuhingo mbwi omatoororero wa Ndjambi ya ri otja komaisaneno we, nu kaya ri otja ku imbi owo mbi va tjita. 13 Otja omatjangwa punga amaye hee: “Ami mba suvera Jakob, nungwari mba tonda Esau.”
14 Nu ngatu tje vi? Ndjambi omuhasemba? Kako ka tjiperi! 15 Orondu eye wa tjere ku Moses: “Ami me tjariparere ingwi ngu me vanga okutjariparera, nu me ṱire ondjenda ingwi ngu me vanga okuṱira ondjenda.” 16 Oviṋa avihe otji vi ha kara otja omundu punga ama vanga poo punga ama tjiti, nungwari vi kara otja kombango ya Ndjambi ngu notjari. 17 Momatjangwa Ndjambi ma tja kombara ya Engipte: “Ami mbe ku zika okurira ombara kokutja mbi raise omasa wandje move, nokutja ena randje ri zuvarisiwe mouye auhe.” 18 Ndjambi otje tjariparera ngamwa auhe eye ngu ma vanga, notje kukutisa omutima wangamwa auhe eye ngu ma vanga.
Ndjambi u toorora ngamwa ngu ma vanga
19 Nove motja nai ku ami: Nu tji pe ri nao, Ndjambi me ku pere tjike ondjo? Owaṋi ngu ma sora okupirukira ombango ye? 20 Nungwari, mundu, oovyaṋi ngu movanga okupatasana na Ndjambi? Otjiungurwa matji sora vi okutja nai komutjiungure: “Ove we ndji ungurira tjike nai?” 21 Nomuungure wozonyungu indu ke nouvara are okuungurisa omunoko otja puma vanga? Eye ke nokuyenena okuungura ozonyungu mbari pomunoko umwe are, imwe onanḓengu na imwe yakauriri?
22 Notjinga ape ri nao wina ku imbi Ndjambi mbya tjita. Ndjambi wa vanga okuraisa omazenge we nokutjiukisa omasa we. Nungwari eye wa ri nomuretima tjinene novandu mba mbaa ve mu pindikisa, imba ovandu mba pwira onyoneno. 23 Eye wina wa tjita nao kokutja a tjiukise ohivirikiro ye onenenene ku imba eye mba vanga okutjariparera, eṱe mba eye mba ṱunina okumuna ohivirikiro ye okuza ku rukuru. 24 Orondu oweṱe mbu tu ri otjiwaṋa eye tja isana, nu kakutja omokati kOvajuda aveyerike, nungwari wina omokati kaimba mbe he ri Ovajuda. 25 Nu imbi ombya hungira membo romuprofete Hosea:
“Kotjiwaṋa tji tji ha ri otjandje
me tja ‘Tjiwaṋa tjandje’.
Nu komuhoko mbu mbi ha ri amba suvera
me tja ‘Musuverwa wandje!’
26 Nu poṋa tjingepo mba owo pu va raerwa nai:
‘Eṋe kaweṋe otjiwaṋa tjandje’,
opu pe ri po mba pu mave
isanewa ovanatje va Ndjambi omunamuinyo.”
27 Nu Jesaja wa ravaera ohunga na Israel na tja: “Nandarire otjivarero tjOvaisrael tji tja ṱeki peheke romukuro wokuvare, ma rire ouṱiṱi uriri mokati kawo mbu mave hupisiwa komuinyo; 28 orondu Muhona tjimanga ma pangura ovandu avehe kombanda yehi.” 29 Nu Jesaja otjinga a tjere nao komeho rukuru: “Muhona, Omunamasaaehe, andakuzu ke tu esirire ozondekurona tjiva, itjatu sasanekwa na Sodom, nu itjatu kara otja Gomora.”
Paulus ma kumbire Israel
30 Nambano ngatu tje vi? Ovandu mba mbe he ri Ovajuda kave kondjere okuvarwa otja ovasemba komurungu wa Ndjambi, nungwari Ndjambi we ve vara otja ovasemba komurungu we mena rongamburiro. 31 Nungwari otjiwaṋa tja Israel tjaa tji teza etwako ndatjari ve varisa otja ovasemba komurungu wa Ndjambi kave ri vazere ko. 32 Nokutjavi tji ve ha varerwe otja ovasemba komurungu wa Ndjambi? Omena rokutja owo kave pahere ousemba wawo otja mbu za mongamburiro, nungwari ve u paha otja mbu za moviungura vyawo. Nowo otji va putara mewe romaputarero. 33 Nomatjangwa ya hungira ewe ndi aye tja:
“Tara, ami me ziki mOsion ewe
ndi mari putarisa ovandu,
noruuwa ndu maru ve wisa;
nungwari auhe ngu ma kambura mu ye,
ke nakuṱisiwa ohoṋi.”
© Herero Revision Bible © Bible Society in Namibia, 2021.
