Otjihorera tja Kristus
1 Eṱe mba mbu tu ri ovanamasa mongamburiro, twa sokutjinda omaungundi wa imba mbe hi nomasa. Atu tjiti otjiṋa otja konḓero yetu oveni. 2 Eṱe atuhe tu sokutjita otja konḓero nakombwiro yovakwetu, kokutja tu ve tunge mongamburiro. 3 Orondu Kristus wina ke ritjatisire omuini. Nungwari omatjangwa maye tja: “Omayamburiro wa imba mbe ku yamburura ya wira kombanda yandje.” 4 Omambo aehe nga tjangwa momatjangwa ya tjangerwa okutuhonga, kokutja tu kare nomaundjiro, nga zikama mouretima na momapanḓiparisiro ngu twa pewa i omatjangwa. 5 Nu Ndjambi, mu mu za ouretima nomapanḓiparisiro, nge mu pe kutja mu karasane nomutima umwe wokuhorera ku Kristus Jesus. 6 Eṋe amuhe otji mamu yenene okutanga Ndjambi, Hiya Muhona wetu Jesus Kristus, neraka rimwe.
Ombuze Ombwa ku imba mbe he ri Ovajuda
7 Opu mwa sokuyakurasana otja Kristus punga e mu yakura kohivirikiro ya Ndjambi. 8 Ami me mu raere kutja Kristus we era ombwiro yOvajuda, a raise kutja Ndjambi omuṱakame, a yenenise omakwizikiro we kooihe mukururume, 9 nokutja imba mbe he ri Ovajuda ve yenene okuhivirikira Ndjambi otjari tje. Orondu omatjangwa maye tja:
“Ami opu me zu okukuhivirika
mokati kaimba mbe he ri Ovajuda,
nu me imburire ena roye ondangero.”
10 Norukwao maye tja:
“Nyandeye, eṋe mbu mu he ri Ovajuda,
pamwe notjiwaṋa tja Ndjambi.”
11 Norukwao maye tja:
“Tangeye Muhona, eṋe amuhe mbu mu he ri Ovajuda;
Mu hivirikeye, eṋe vandu amuhe.”
12 Norukwao Jesaja ma tja:
“Ondekurona ya Isai mai ya;
mai ere okuyekuhonaparera imba mbe he ri Ovajuda,
nowo mave kara nomaundjiro mu ye.”
13 Nu Ndjambi, mu mu za omaundjiro, nge mu urise nenyando nohange aihe mena rongamburiro yeṋu mu ye, kokutja omaundjiro weṋu ye harere ko omasa ngu maye zu mOmbepo Ondjapuke.
Otjiungura tja Paulus tjoruhindo
14 Vakwetu, ami, tjiri, me tjiwa nawa kutja eṋe mwe ura nouwa, nokutja mu nondjiviro aihe, nokutja mu yenena okurongasana. 15 Nungwari morutuu ndwi ami mbe mu tjangere nomutima mbu ri kamwaha okumuzemburukisa oviṋa tjiva ooimba na mbena. Nu mba tjanga nai motjimbe tjotjari Ndjambi tje ndji pa 16 okurira omukarere wa Kristus Jesus wokuungura mokati kaimba mbe he ri Ovajuda. Ami mbe ve karera otja omupristeri mokuzuvarisa Ombuze Ombwa ya Ndjambi, kokutja owo ve rire ombunguhiro ndji tjata ku Ndjambi nu ndja yapurirwa ye i Ombepo Ondjapuke. 17 Nu moruwano na Kristus Jesus ami me rihivire otjiungura tji mba ungurira Ndjambi. 18 Ami hi nokurora okuhungira otjiṋa tjarwe posi na ihi Kristus tja ungura mu ami kokutja imba mbe he ri Ovajuda ve kare nonḓuviro ku Ndjambi. Kristus wa tjita nai momambo na moviungura, 19 movisanekero na movihimise ovinamasa na momasa wOmbepo ya Ndjambi. Komuhingo mbwi ami otji mba yenena okuzuvarisa okuura indji Ombuze Ombwa ya Kristus okuza kOjerusalem nga kOilirikum. 20 Ami aruhe mba zera okuzuvarisa Ombuze Ombwa potukondwa twovandu mbe hiya zuva Kristus, tjinga ambi ha vangere okutunga komazikameno nga zikwa i omundu warwe. 21 Orondu omatjangwa maye tja:
“Imba mbe hiya raerwa ye mave mu munu;
nu imba mbe hiye mu zuva mave mu tjiwa.”
Ondyero ya Paulus yokukaryanga kOroma
22 Ami potuingi otji mbi ha mwine oruveze okuya ku eṋe. 23 Nungwari nambano otjiungura tjandje motukondwa twi tja yanda, nami mba zera ozombura ozengi okuyekumumuna 24 tji me i kOspanie. Nami etje vanga kutja mbi mu mune tji me i ngo. Nu wina etje vanga okuyekukara puna eṋe okaruveze okasupi, nu tjazumba nombatero yeṋu mbi yende kOspanie. 25 Nungwari nambano me tji i kOjerusalem okutwara ombatero yotjimariva kombongo ya Ndjambi. 26 Orondu ombongo ya Makedonie noya Akaja za tya okuyandja otjiyandjewa okuvatera na tjo ovasyona movakambure mbe ri mOjerusalem. 27 Indji ya ri ondyero yawo oveni, nungwari owo wina va sere okuvevatera. Orondu ovakambure mOvajuda tji va haṋasana ouini wawo wombepo naimba mbe he ri Ovajuda, ovakambure moviwaṋa mbi wina ve sokuhaṋa oviṋa vyehupo rawo okuvatera na vyo ovakambure imba Ovajuda. 28 Nu tji mba mana otjiungura hi, nu tji mba zu nokuyandja ovimariva avihe mbya wongerwa wo, ami me yata pu eṋe tji me i kOspanie. 29 Nu me tjiwa kutja tji meya ku eṋe meya nondaya aihe okuura ya Kristus.
30 Nu me riyarikaṋa ku eṋe, vakwetu, mena ra Muhona wetu Jesus Kristus na morusuvero rOmbepo Ondjapuke kutja mu kondje tjinene pamwe na ami mokundjikumbira ku Ndjambi. 31 Kumbeye kutja e ha munu otjipo mokati kovahakambura avehe mOjudea, nokutja otjiungura tjandje mOjerusalem tji tjate kovakambure mbe ri mo. 32 Nu tje ri ombango ya Ndjambi ami meya ku eṋe nenyando enene okuyekusuva okaruveze okasupi puna eṋe. 33 Nu Ndjambi ngu yandja ohange nga kare puna eṋe amuhe. Amen.
© Herero Revision Bible © Bible Society in Namibia, 2021.
