O pangura omukweṋu
1 Yakureye ingwi ngu ri otjingundi mongamburiro, nu amu patasana na ye otja kouripura we omuini. 2 Omundu umwe u nongamburiro yokutja omundu u sokurya otjiṋa ngamwa atjihe, nungwari ingwi ngu ri otjingundi mongamburiro u rya ozombowa porwazo. 3 Ingwi ngu rya ngamwa a ha tondo ingwi ngu ha ri; ingwi ngu rya ozombowa porwazo a ha pangura ingwi ngu rya ngamwa atjihe, orondu Ndjambi tjinga e mu yakura. 4 Oove aṋi ngu mo pangura omukarere womukweṋu? Omuhona we porwe ongu ma pangura kutja eye ma tjiti ouwa. Nungwari eye ma tjiti ouwa, Muhona tjinga ame mu pe omasa okutjita nao.
5 Omundu umwe u tjangovasi eyuva rimwe enanḓengu tjinene pomakwao, nu umwe u tjangovasi omayuva aehe ye ri tjimwe. Auhe nga isiwe a kare nouripura we omuini momutima we. 6 Ingwi ngu vara eyuva rorive momuhingo kaaṋi, u tjita nao kokuyozika Muhona; nu ngu rya otjiṋa ngamwa atjihe, u tjita nao kokuyozika Muhona, tjinga ama tja okuhepa ku Ndjambi. Nu ingwi ngu ha ri oviṋa ngamwa avihe, u tjita nao kokuyozika Muhona, neye wina u tja okuhepa ku Ndjambi. 7 Kape nomundu ngu rihupira omuini, nu kape nomundu ngu riṱira omuini. 8 Tji tu nomuinyo, tu hupira Muhona; nu tji twa ṱu, tu ṱira Muhona. Nu kutja tu nomuinyo poo kutja twa ṱu, oweṱe ova Muhona. 9 Orondu Kristus wa ṱa na penduka movakoke kokutja a rire oMuhona wovanamuinyo novakoke. 10 Nove mo pangurire tjike omukweṋu? Nove mo nyengurire tjike omukweṋu? Eṱe atuhe matu kakurama komurungu wa Ndjambi okupangurwa i ye. 11 Orondu omatjangwa maye tja:
“Nu, tjiri, otja ngu mbi ri Ndjambi omunamuinyo,
Muhona ma tja nai,
auhe ma woro ozongoro komurungu wandje,
nu auhe ma hongonona kutja
owami ngu mbi ri Ndjambi.”
12 Auhe mokati ketu opu ma zu okurizirira omuini komurungu wa Ndjambi.
O rire otjipwite komukweṋu
13 Nu atu ha pangurasana. Nu amu tjiti otjiṋa omukweṋu mu ma yumbu ohama poo tji matji mu putarisa. 14 Ami tjinga ambi tjiwa Muhona Jesus, mbi kambura, tjiri, kutja kape notjikurya tji tji rira otjihakohoke ku tjo otjini, nungwari omundu tji me tji vara kutja otjihakohoke, okutja otjo ku ye otjihakohoke. 15 Tji wa hihamisa omukweṋu omutima notjikurya tji wa ri, ove ko nokutjita otja korusuvero. Kondja kutja otjikurya tji wa ri atji ha zunḓa omundu Kristus ngwa ṱira. 16 Nu wina kondjeye kutja ihi eṋe tji mu tji vara kutja otjiwa atji ha yambururwa. 17 Orondu ouhona wa Ndjambi katjiṋa tjokurya nokunwa, nungwari owo otjiṋa tjousemba nohange nondjorokero, ndji za kOmbepo Ondjapuke. 18 Nu ingwi ngu ma karere Kristus komuhingo mbwi eye ma tjata ku Ndjambi, novandu mave kara nonyuṋe mu ye.
19 Opu matu sokukondja okutjita oviṋa, mbi eta ohange nu mbi tu vatera okuzeuparisasana. 20 Otjiungura tja Ndjambi o tji hahaurire ovikurya. Ovikurya avihe ovyo ovikohoke; nungwari okokuvi okuputarisa omundu na imbi mbi mo ri. 21 Okokuwa omundu tje hi nokurya onyama poo tje hi nokunwa omavinu poo tje hi nokutjita otjiṋa ngamwa tji matji putarisa omukwao. 22 Ihi ove, tjiri, mu wa kambura ngatji rire otjeṋu na Ndjambi porweṋu. Omuṋingandu ingwi ngu hi nokuripangurira omuini mu ihi eye tja munu kutja otjisemba! 23 Nu ingwi ngu me ripura pevari, nu vari a ri otjiṋa ho, Ndjambi we mu pangura, tjinga e hi nokutjirya otja kongamburiro. Nu atjihe omundu tje hi nokutjita otja kongamburiro, otjo ourunde.
© Herero Revision Bible © Bible Society in Namibia, 2021.
