1 Tjazumba omuengeri wina e ndji raisire onḓonḓu yomeva womuinyo. Oyo i nyenanyeṋa otja ewe ekristal, nu i za kotjihavero tjouhona tja Ndjambi notjOndjona, 2 nai pupu mokati komuvanda wotjihuro. Nu kovikere aviyevari vyonḓonḓu kwa hapa omiti vyomuinyo; ovyo aavi eta ovikurya povikando omurongo na vivari mombura, rumwe momueze, nomaso wavyo ye yandja omberukiro koviwaṋa. 3 Nu motjihuro kamu nokukara ko otjiṋa tji tja sengwa i Ndjambi.
Notjihavero tjouhona tja Ndjambi notjOndjona matji kara motjihuro, novakarere ve mave rikotamene ku ye. 4 Owo mave munu omurungu we, nena re mari tjangwa kovipara vyawo. 5 Nouṱuku kau tji nokukara ko. Ovandu kave tji nakuhepa ondjerera yemunine noyeyuva rukwao, orondu Muhona Ndjambi ongu ma rire ondjerera yawo, nowo ave honapara otja ozombara aruhe nga ko nga aruhe.
Omakotokero wa Jesus
6 Nomuengeri arire tja tja ku ami: “Omambo nga owo ouatjiri nomaṱakame. Muhona Ndjambi, ngu yandja Ombepo ye kovaprofete, wa hinda omuengeri we okuyekuraisira ovakarere ve imbi mbi mavi tjitwa tjimanga.”
7 Nu Jesus a tja: “Tara, ami meya tjimanga! Omuṋingandu ingwi ngu ma ṱakamisa omambo womaprofetero wembo ndi!”
8 Nami, ngu mbi ri Johanes, mba zuvire nu mba munine oviṋa avihe mbi. Nu tji mba zu nokuvizuva nokuvimuna arire tji mbe riwisa pozombaze zomuengeri ngwi ngwe ndji raisirire oviṋa mbi okurikotamena ku ye. 9 Nungwari eye a tja ku ami: “Ngoo roro, o tjiti nao! Owami omukarere omukweṋu otja ove notja ovakweṋu mongamburiro, imba ovaprofete, na imba mbe ṱakamisa omambo wembo ndi. Rikotamena ku Ndjambi!”
10 Neye a hungire komurungu a tja: “O horeke ko omambo womaprofetero wembo ndi, orondu oruveze ru ri popezu avihe mbi tji mavi tjitwa. 11 Ngu tjita ouvi nga panḓere pokutjita ouvi, ngu nondova nga kare nondova; nungwari ngu tjita ousemba, nga panḓere pokutjita ousemba, nu ngu ri omuyapuke, nga kare uri omuyapuke.”
12 Jesus arire tja tja: “Tara, ami meya tjimanga? Me eta ondjambi okuyekuiyandja ku auhe otja ku imbi mbya tjita. 13 Owami Oalfa na Omega, Omutenga nomusenina, Ombutiro nOndjandero.”
14 Ovaṋingandu imba mbe koha ozombanda zawo, kokutja ve kare nousemba wokurya kovihape vyomuti womuinyo, nokuhitira momivero motjihuro. 15 Nungwari pendje yotjihuro pe nozombwa novahonge vakaseruseru novanavineya novavakirasane novazepe, na imba mbe rikotamena koomukuru vovisenginina, na imba avehe mbe suvera ovizeze nokuvikora.
16 “Ami, ngu mbi ri Jesus, mba hinda omuengeri wandje okukahongonona oviṋa mbi ku eṋe mozombongo. Owami ondekurona ndja za momuhoko wa David. Owami Onyose ongeṋangeṋe yOmuhuka.”
17 NOmbepo nOmuvarekwa mave tja: “Indjo!”
Auhe ngu ma zuu omambo nga, wina nga tje: “Indjo!”
Nu auhe ngu nonyota nge ye; nu auhe ngu ma vanga omeva womuinyo nge ye okukambura uriri!
Omambo womapatero
18 Nami, Johanes, me hongonona ku auhe ngu ma zuu omambo womaprofetero wembo ndi: Tji pe nomundu ngu ma weza ko otjiṋa komambo nga, Ndjambi wina me mu wezire ko oviwonga mbya tjangwa membo ndi. 19 Nu tji pe nomundu ngu ma isa ko otjiṋa komambo womaprofetero wembo ndi, Ndjambi ma isa ko orupa rwe komuti womuinyo na kotjihuro otjiyapuke mbya tjangwa membo ndi.
20 Ingwi ngu ma hongonona avihe mbi ma tja: “Ii, ami mee ya tjimanga!”
Amen! Indjo, Muhona Jesus! 21 Otjari tja Muhona Jesus ngatji kare na eṋe amuhe!
© Herero Revision Bible © Bible Society in Namibia, 2021.
